Cory Booker
Polaiteoir Meiriceánach is ea Cory Anthony Booker a rugadh ar 27 Aibreán 1969. Is ball den Pháirtí Daonlathach é. Bhí sé ina mhéara ar Newark, New Jersey ó 2006 go 2013. Seanadóir sóisearach ó New Jersey atá ann ó 31 Deireadh Fómhair 2013 i leith.
Óige agus oideachas
[cuir in eagar | athraigh foinse]Rugadh Cory Booker in Washington, D.C. agus tógadh é in Harrington Park, New Jersey, 32 ciliméadar ó thuaidh ó Newark. Bhí a thuismitheoirí, Carolyn Rose (née Jordan) agus Cary Alfred Booker, ar na chéad Afra-Mheiriceánaigh ar feidhmeannaigh ag IBM iad. Rinne Cory a chuid meánscolaíochta ag an gcoláiste Northern Valley Regional in Old Tappan agus sa bhliain 1986 d'ainmnigh an nuachtán USA Today é mar bhall den Fhoireann Pheile Mheánscoile Uile-Mheiriceánach.
Ansin chuaigh Booker go hOllscoil Stanford, mar a bhfuair sé céim baitsiléara (BA) in eolaíocht pholaitiúil sa bhliain 1991 agus máistreacht (MA) sa tsocheolaíocht an bhliain dar gcionn. Agus é ag déanamh staidéir ag Stanford, d'imir Booker peil Mheiriceánach na hollscoile úd.
Bronnadh scoláireacht Rhodes ar Booker agus rinne sé staidéar ag Coláiste na Banríona ag Ollscoil Oxford mar ar bhain se céim onórach amach i stair na Stát Aontaithe. D'fhreastail sé ar Scoil Dlí Yale ansin agus bhain sé céim Juris Doctor amach sa bhliain 1997. Agus é ag Yale, d'oibrigh sé i gclinic dlí le haghaidh daoine bochta i New Haven agus bhí sé gníomhach i gcumann na mac léinn gorm. Tá suim faoi leith aige sa Torah.[1]
A shaol sa pholaitíocht
[cuir in eagar | athraigh foinse]Chuir Booker faoi i Newark sa bhliain dheireanach aige ag Yale, a shúil ar shlí bheatha sa pholaitíocht ansin. Tar éis tréimhse ag obair mar dhlíodóir, toghadh Booker mar bhall den chomhairle baile i Newark. Thóg sé stailc ocrais ar feadh 10 lá mar agóid i gcoinne na ndíoltóirí drugaí. Chuir sé moltai os comhar na comhairle a bhain le daoine óga, tithíocht, póilíneacht agus gnéitheanna eile de shaol na cathrach ach theip air.
Méaracht Newark
[cuir in eagar | athraigh foinse]Ar 9 Eanáir 2002, in áit seasamh arís don chomhairle baile, d’fhógair Booker gurbh iarrthóir é d’oifig mhéara na cathrach. Thóg Sharpe James, méara na cathrach, feachtas garbh ina choinne ag rá nach raibh Booker “gorm go leor” le Newark a thuigbheáil.[2]Theip ar Booker ach fuair sé 47% de na vótaí.
Ar 11 Feabhra 2006 d’fhógair Booker arís go raibh sé ag seasamh d’oifig an mhéara i Newark. Rinne James amhlaidh ach 11 lá ní ba dhéanaí, d’éirigh sé as an toghchán le seasamh do sheanad stáit New Jersey agus ghlac Ronald Riz, cúntóir de chuid James, a áit san fheachtas méarachta. Bhailigh Booker $6 milliún dollar ar son a fheachtais féin, 25 uaire níos mó ná Riz, agus fuair sé an bua sa toghchán le 72% de na vótaí. Sheas Booker don dara téarma mar mhéara sa bhliain 2010. Atoghadh é agus 59% de na vótaí aige.
Cuireadh Booker in aithne do Mark Zuckerberg, bunaitheoir Facebook, ag dinnéar foirmeálta in Sun Valley, Idaho, i mí Iúil, 2010. Labhair Booker le Zuckerberg faoina chuid pleananna don chathair.[3] Ní ba dhéanaí sa bhliain chéanna, chuaigh an bheirt acu ar The Oprah Winfrey Show in éineacht le Chris Christie, gobharnóir New Jersey. D’fhógair Zuckerberg go raibh sé le $100 milliún a thabhairt do chóras scoile Newark.[4]
An Seanad
[cuir in eagar | athraigh foinse]Ar 20 Nollaig 2012, d’fhógair Booker go raibh suim aige sa suíochán i Seanad na Stát Aontaithe a bhí i seilbh Frank Lautenberg, rud a chuir deireadh leis an tuairimíocht go mbeadh Booker ag dul i ngleic le Chris Christie i gcomhar post ghobharnóra New Jersey. Ar 11 Eanáir 2013 chuir Booker coiste ar bun le machnamh a dhéanamh ar fheachtas seanaid. Cé go dtagann siad ó pháirtithe difriúla glactar leis go bhfuil caidreamh maith ag Booker agus Christie lena chéile.
Mar a tharla, d’éirigh Lautenberg tinn, d’éirigh sé as a phost agus, i mí Mheithimh na bliana 2013, fuair sé bás. Fógraíodh toghchán sealadach don 16 Deireadh Fómhair 2013. D’fhógair Booker go raibh sé sa rás agus i nDeireadh Fómhar fuair sé an bua ar Steve Lonegan, an Poblachtach a sheas ina choinnne, 55% ar 44%. Booker an chéad Afrai-Mheiriceánach a toghadh riamh i New Jersey don Seanad. An oíche roimh an toghcháin thug Booker cuairt ar uaigh an Raibí Menachem M. Schneerson agus dúirt sé paidreacha agus las sé coinneal i gcuimhne a athar féin. Ghlac Booker mionn na hoifige sa Seanad an mhí chéanna.
![](http://upload.wikimedia.org/wikipedia/commons/thumb/8/87/2013_Senate_Election_in_NJ_by_muni.svg/220px-2013_Senate_Election_in_NJ_by_muni.svg.png)
Tháinig an toghchán rialta don Seanad bliain ina dhiaidh seo. An uair seo sheas Jeff Bell, comhairleoir polaitíochta coimeádach agus Poblachtach, ina choinne don suíochán. Fuair Booker an bua arís agus 55.8% de na vótaí aige, i gcoinne 42.4% do Bell.
Tagairtí
[cuir in eagar | athraigh foinse]- ↑ (en) Booker and me, alt ag an BBC, 17 D.F. 2013
- ↑ "In a Debate of Newark Mayoral Candidates, Some Agreement and a Lot of Discord". New York Times.
- ↑ "Facebook Founder to Donate $100 Million to Help Remake Newark’s Schools". The New York Times.
- ↑ The Oprah Winfrey Show, 24 M.F., 2010
Naisc sheachtracha
[cuir in eagar | athraigh foinse]- United States Senator Cory Booker Suíomh Cory Booker ag Seanad na Stát Aontaithe
- Láithreán Gréasáin an fheachtais Uachtaráin
Seanadóirí reatha na Stát Aontaithe | ||||
---|---|---|---|---|
AL: Shelby (P), Jones (D) |
HI: Schatze (D), Hirono (D) |
MA: Warren (D), Markey (D) |
NM: Heinrich (D), Luján (D) |
SD: Thune (P), Rounds (P) |
Poblachtach (52) | Daonlathach (46) | Neamhspleách (2) |