Frico

Il frico (cul non origjinâl in marilenghe, doprât fin ae fin dal votcent, che al è fricò) al è un plat tipic furlan fat cul formadi. Par solit si metin dentri diviers gjenars di formadi, insieme a cevole e cartufulis (patatis).

Frico (o fricò) fof

Il frico al è, cence dubis e pardabon, il vêr plat furlan. Si po cjatâlu nome di formadi (ma di plui cualitâts), cu lis patatis, cu la cevole, fintremai cui miluçs. Al è un plat tipic des monts furlanis e e je une version par ogni valade. La recipe pe polente e je chê (plui o mancul mole), ma chê dal frico e à miârs di variazions locâls. Ûs propon la classiche recipe, une di chês che si tramandin di une gjenerazion a di une altre. Intal mê câs mi rive de mame di une mê cjarissime amie che e ven de val Cjanâl.

Par fâ un bon frico si doprin diviers gjenars di formadi e strissulis di formadi fresc (miôr se di Montâs). Si scomence cuntune base di cevole e un fîl di vueli; cuant che le cevole e tache a rosolâ, si butin dentri 3-4 cartufulis fatis a tocuts e si fasin cuei par un pôc, fin che no son molis. Dopo si zonte il formadi a tocuts piçui cuntun pôc di sâl e si messede fin che il formadi no si cuei e nol devente brustulît, scuasit come une fertaie. Dispès il frico si mangje cuntune fete di polente. Si pues ancje fa cussì: cence cevole, si dopre nome formadi latarie e cartufulis. E cence vueli, parcè che il formadi di bessôl al bute fûr un grum di ont.

Il Frico di Martin

Casi in patelecte dal mestri Martin da Como, cogo dal Patriarcje di Aquilee, dal Libri 'de arte coquinaria' (1450)

Cjol dal casi gras, o che nol sedi masse vecjo, ni masse salât e tu taiarâs in fetulutis o bocons cuadris, o cemût che ti plâs, et che tu vedis dalis padielutis fatis par chel mistîr. e sul font, tu metarâs un toc di spongje, o pûr di saìn fresc, metintlu a scjaldâ su lis boris e dentri tu metarâs i tocuts di formadi che o ven dit, e come che ti plâs, che al sedi fat tenar, tu i darâs une voltade, metintgj parsore dal zucar e canele, e mandilu subite in taule, che si vûl mangjâlu daûr dal past, cjalt, cjalt.

Recipe

Par i solits dôi plens di fan i vuelin:

400g di patatis farinosîs 200g di formadi di chel di latarie o Montâs (miscliçât, un pôc fresc e un pôc plui vecjo): al so puest si po doprâ un altri formadi di malghe di preference di chei a paste cuete. La robe di tignî di cont e je che il formadi nol fasedi il fîl cuant che al si disfe (la mozarele, il emmenthaler o pareli no van ben, ma ad esempli o podês meti un pôc di formadi vecjo o parmigjan) un fîl di vueli di ulive extravergine.

Peladis lis patatis si lis taie a fetutis finis (plui finis a son e mancul timp staran a cuei). Si fasin rustî te fersorie intun fîl di vueli, cence cjariâ parcè che il formadi al è za gras di so. Dôs peraulis su la fersorie: larès benon la vecje padiele di fiâr, ma une buine che e no tache larà ben compagn, ancjemò miôr se fos tignude e doprade nome par chel, di fat al sarès miôr no lavâle ma netâle passantle cun cjarte che supe.

Cuant che lis patatis a son ben rustidis, si scomence a zontâ aghe taponantlis cuasi dal dut, si va indenant a cuei, messedant di tant in tant e zontant aghe se al covente. Lis patatis a àn di disfâsi fruçantsi (i volarà une orute).

Infratant si prepare il formadi taiantlu a dadui e cuant che lis patatis a son cuetis lu si zonte a la preparazion. Si messede cuntune sedon di len fintant che nol si disfe e duncje si lasse cjapâ, spacant la fersorie par no lassâlu tacâ sul font.

Daspò un cuart di ore, de bande sot al sarà ben rustît crustulint: si à cumò di voltâlu sot sore (tant che la fertaie), judantsi cuntun plat, miôr se prin al è stât scjaldât parcè che no tachi. Si va indenant a cuei di chê altre bande par altris dîs minûts simpri spacotant la fersorie.

Curiositâts

Fin a la fin dal votcent il non di chest plat veve l'acent su la finâl "o": si clamave duncje fricò. Tacant da la seconde metât dal votcent la pression da lenghe taliane je stade simpri plui fuarte sul furlan fevelât e, viodût che il talian à ben pocjis peraulis cun l'acent tes ultimis vocâls/silabis, biel planc l'acent l'è stât puartât su la i; un pôc come al sucêt a svariâts nons, toponims o cognons tipics furlans (picolìt→pìcolit, Cormòns→Còrmons, Tomât→Tòmat e v.i.) che vegnin in dî di vuê simpri plui dispès falâts.