Tinem
 Söl'ring
|
Tinem es en Tērp üp Uast-Söl. Hat liit uastern direkt achter Weesterlön en jert sent di 1. Januwaari fan 2009 tö di Gimiindi Söl.
Dit Hiili jert tö di Krais Nuurđfriislön, wat tö't Bundslön Sleeswig-Holstiin jert.
Naam
[Bewerke | Kweltekst bewerke]"Tinem" es töhopset fan "Tins" wat sa fuul üs Zinsen of Stjüüren jit. Dat Jening "-em" staant fuar Plaats (Dütsk sa fuul üs "Ort").
Jerer skel't sa wesen wiis, dat di Sölringer ön di Tinem Borig jaar "Skat en Tinsi" bitaali maast, en diaraur jeft et forskelig Tialen en Staatjis.
Bidüüting ön ualing Tiren
[Bewerke | Kweltekst bewerke]Di Sölring Kēmpers en Köningen skel bi Tinem Borig raaket haa, fuar Ting tö hual of langs tö gung, wan Krich wiar.
Hat jeft jit üđer Tialen aur di Kēmpers, hur di raaket haa skel, man sa fuul es wes:
Hat jeft bitö Tinem Borig en Straat, wat "Königskamp" jit, en des Naam giar üp des Varianti töbeek.
Fuar des Tialen spreekt uk, dat Tinem sa temelk ön di Meren fan Söl liit.
Tinem sent 1970
[Bewerke | Kweltekst bewerke]Wertskep
[Bewerke | Kweltekst bewerke]
Weesterlön en Tinem sen al lung töhopwukset.
Tinem liit mal zentrāl:
Deling es di Flugplaats ek olter fiir fan di Königskaamp en Tinem Borig, en di forskelig Iirsenbaanen stair jaar Loks en Wainer ön Tinem hen, wan di ek brükt uur.
Wan di Autotoch omdrai skel, da köört hi naa Tinem en weđer töbeek naa Weesterlön. San Trum es man uk ombi 500 m lüng. Wan hi weđer ön Weesterlön es, da köör di Lokomotiiwen jit jens trinjom di Toch naa Tinem en töbeek, dat jat uasterfuar di Toch kum.
Dat Giwerbi fan Söl fent Plaats ön Tinem, wan em Kraam fuar tö Bech haa wel, skel em diar hen.[1]
Di jerst Supermärkti wiar ön Tinem, en ön di soowentiger Jaaren skel Weesterlön langsen niisgiirig "aur di Telerrand" glüüret haa, dat di nii Gimiindi Sylt-Ost sa fuul Stjüüren diarfan fing.
Lij Gimiindi giar gurt Wertskep
[Bewerke | Kweltekst bewerke]Tinem es dit jest Tērp, hur di nii Gimiindi sa wat üs jaar "Großstadtambitsjoonen" weeget: En wit Tērpsskelt, jüst üs ön di gurt Staten.
Hat sjocht man sa üt, üs wan em uk Tinem ek förter me "Taust-Uuningen" techtbech wel: Üp't hiili Ailön uur fuar't miist öfrewen en üp dit Lön nii becht. - Fuar't Miist uur dit nii Hüs wat gurter of heer hok muar Hüsdüüren.
Fuar Baarilir
[Bewerke | Kweltekst bewerke]
Fuar di Baarilir es Tinem mesken bluat interesant, wan em ek sa fuul eeđer sin Uuning of Rüm luket, man gau tö Strön kum wel. Ön Tinem staan ek muar fuul ual Hüsen. Dat Tērp wukset hentö Weesterlön, en dit weeget höm uk ön di Bechningen en Straaten diar.
Di Wai tö Strön of Dik es bluat ombi 3 km, wat em gur me Rad skafi ken, en diar sen hok Radwaien, wat süđern bi Tinem en Weesterlön forbi gung.
Ön di Süđersir jeft et en Campingplaats, diar mesken di iinfachst Wai es, ön Tinem Forhaaling tö fo.
Tinem es fuar't miist wert, tö biluki, hur niin Hüsen staan. Dit es fuar't miist di Süđersir, hur fan di Koog, diar 1937 me di Dik kemen es, en dailk Mērsklönskep tö finj es.
Ön des Huk sen uk di Radwaien, hur't üt gair, hentö di Dik en aur di Dik fan Raantem-Beken.
Di Tinem Borig es ek bluat fuar Archäoloogen wert en luki jens hen. Ön di drüger Muunen ön Somer ken em diar waker ön di Senskiin sit; en Radwai giar man jüst diar langs. Hentö Oktoober uur't diar weđer mērsk, aurdat dat Rijnweeter aaftinoch staan blift. Da ken em diar jit fain spatsiari gung.
Luki uk jir / Futnooten
[Bewerke | Kweltekst bewerke]
- ↑ Dit stemet ek gans, aurdat ön Kairem jit en Bechstofkraamer es.
Di diari es man muar wat fuar Fachlir, ek sa gur fuar Lir, wat fuar bilig wat salev maaki wel.
