Luis Chamizo
Luis Chamizo | ||
---|---|---|
Enhormación pressonal | ||
Nombri de nacencia | Luis Florencio Chamizo y Trigueros | |
Nacencia |
7 de noviembre de 1894 Guareña (España) | |
Muerti |
24 de diciembre de 1945 (51 años) Madrid (España) | |
Nacionalidá | Española | |
Lengua materna | Estremeñu | |
Educación | ||
Educación | estudius nuversitarius en Derechu | |
Educau en | Universidad de Murcia | |
Enhormación profissional | ||
Oficiu | Avogau, escrevienti, poeta y alcaldi | |
Seudónimu | Luis Chamizo | |
Obras notablis | El miajón de los castúos | |
Luis Florencio Chamizo Triguero [ˈlwis floˈren̟θjo ʧaˈmiθo tɾiˈɣeɾo], mas anombrau comu Luis Chamizo, hue un avogau i pueta estremeñu, autol de El miajón de los castúos i punteru enas letras en castú.
Via
[Edital | Editá'l códigu]Luis Chamizo tuvu nacéncia ena villa de Guareña (Baajós) el 7 Noviembri el 1894. La su família es d’origin estremeñu, pos de destintus puebrus pacensis proceian los agüelus. Los sus pairis huerun Joaquín Chamizo Guerrero, cacharreru local, fegura cravi ena su puesia[1], i Asunción Triguero Bravo. Ubu un gelmaninu, Julián Chamizo, el qual enfeneció con poca eá.
Los primerus endirguis los tuvu en Guareña. Pa hazel los superioris, aballó a Mairil, andi vivió en cá una tia suya, raceandu pal Colegio las Maravillas. Arremató en Sevilla, ciá a la que dende altonci anduvu atijau. Allina velollí topa el títulu de péritu mercau. Aluspués, aballa otra ves pa los Mairilis a estuyal Derechu. Pol estus tiempus conoci al muelnista estremeñu Manuel Monterrey, nuna ciá que pa ná tinia que vel con el su puebru i de la que pelcebia lo charramanduscu la crutura urbana, dalcuerdu conos datus autobiográficus los sus própius puemas[2]. Pal 1918 se gradua comu avogau. Namás acabijaus los estuyus, güervi pa Guareña a trebajal nel negóciu familial, comu comelcianti los conus, vendiendu pahuera, mas que ná, pa Ciá Real.
Endispuesinu, ahilandu mas pa lo suyu, trebaja nuna notaria Dombenitensi de passanti, ena bicha Victoriano Rosado Munilla [3]. Pol mé el su amigu i vizinu Francisco Valdés, Chamizo s’enrea a escrebil pal pedióricu La Semana.
Entri los añus de que acabija la carrera i el su casamientu, trascurri la epoca de mayol hechura puética el autol, apresentándusi a los juegus froralis Almendraleju nel 1919 i espubricandu dos añus mas tardi la su obra mas soná, El miajón de los castúos.
Se convoa en 1922 con Virtudes Cordo Nogales ena villa de Gualdacanal (Sevilla). Conoció a la muchacha pol mé dun amigu el pairi, Cándido Cordo, el qual espenó i Chamizó viajó a Guadalcanal a dal la cabeçá a la família. Pol mé dellu, Chamizo passa a vivil en ambienti andalús, bichandu en Guadalcanal i raceandu a ca no ná pol Sevilla, enos colrichis literárius i curturalis la epoca, desaculándusi de lleval las tierras de pa Sevilla i pa Guareña. El matrimoñu ubu muchus ijus. Los primerus huerun mellizus, unu dellus nonatu i el otru muertu al ratininu de bel naciu. Aluspués vinun cincu ijas, chascu pal pueta que siempri quiju un machu ena família. Las ijas huerun, pol eá, María Luisa, María Victoria, María de las Virtudes Julia, Consolación y María Asunción.
La su relación con Sevilla favoreció el contautu cona revista Mediodía i los autoris que nella escrebian. Tamién hizu que en 1930 estrenara allí la su gran obra teatral en castú, Las Brujas, andi participarun emigrantis estremeñus, con grandi acogia. Nessi mesmu añu, ya pa Outubri, la estrenó en Mairil i la tercel puesta en escena aconteció pol fin en Baajós, nel López de Ayala.
La nombreria i simpatia que tuvu entri los vizinus de pal su segundu puebru sevillanu, hizu que s’acupara la alcardia Guadalcanal, quandu Primo de Rivera, anombránduli alcardi en 1924. Al poquinu, se le desina acaémicu la Real Academia Sevilla de las Buenas Letras. Quandu s’enlió la Guerra Cevil, Chamizo anduvu encurtu en Guareña, encorujándusi enos hornus la cacharreria. De que acabó la guerra, Chamizo acupa un puestu nel Sindicato de Espectáculos Mairil, epoca ena que trapiqueaba de endirgaol decramación de bardi nun pisinu la ciá, andi se traslaó la família. La estáncia se prolongó, hata la su muerti.
Nel 1942 espubrica el primel cantu el su Extremadura, obra que quea sin acabijal. Luis Chamizo mueri el 24 Diziembri el 1945 en Mairil, quandu tinia namás 51 añus. Amigus i enteletualis la epoca le hizun omenagis i recordatórius en destintus papelis.
Obra
[Edital | Editá'l códigu]Chamizo no hue un autol mu prolíficu, enque cautivó en velsu destintus tipus génirus i lenguas. El primel escritu en velsu que se tien notícia es del 1913, pa polos prencípius la su carrera avogau, entitulau En el remanso, está en castellanu. El su trebaju literáriu lo llevó a apresentalsi a los juegus froralis en Almendraleju, con el puema Consejos del Tío Perico —el bichu passó endispuesinu al corpus del El miajón de los castúos—, al que le prémian con el accesit.
La su primel obra espubricá i pola que Chamizo passó a la estória las letras estremeñas i ispanas es El Miajón de los castúos. Salierun las dos primeras eicionis en 1921, pol mé el mecenalgu Ortega Munilla. L’obra tien puemas de destintus tiempus i holmatus escrita pol enteru en dialeutu castú. Es tinia pola obra épica, sigún dis el própiu sutítulu, Rapsodias extremeñas, cuyu propósitu es cantal portamientus, costumbris i “jazañas” los estremeñus, no apelandu a pressonagis i hechus estóricus namás, sino tamién a la concéncia intrastórica presentera enos sus puemas, vista en aicionis i pressonas el puebru chanu estremeñu. El primel puema Compuerta es pogramáticu, andi se ven los propósitus, tema i luenga el restu los puemas que enjaretan el libru.
![]() |
Corre’l tren retumbando por los jierros
de la vía. Retiemblan los recios arcornoques qu’esparraman al reor del troncón las hojas secas. |
![]() — El miajón de los castúos, Compuerta 1-4.
|
Al puemariu vien apellau un parabreru con vozis castuas i estremeñas.
La su segunda gran obra, enhilá pal teatru, s’entitula Las Brujas. Poema dramático de ambiente extremeño en tres cantos y en verso. La estrenó en Sevilla, Mairil i Baajós en 1930 con grandi déssitu entri el púbricu. L’obra se halla tamién escrita en castú, andi el autol juga con el usu la luenga pendienti de la posición social i eá los pressonagis.
Unus añinus enantis de moril, saca Extremadura. Chamizo namás espubrica el primel cantu, un haci berrendu puemas del ton El miajón pero con una mayol maurés.
Hueraparti la su produción en castú, Chamizo cautivó el velsu tamién en castellanu, andi demuestra la su erudición, gastandu un léssicu enliosu i arcaicu, trunfandu mas la holma qu’el continiu. El atiju puemas en castellanu s’espubricarun pol primel vezi en 1967 embaju el títulu de Poesías castellanas.
Referéncias
[Edital | Editá'l códigu]Bibliografia
[Edital | Editá'l códigu]- Luis Chamizo, Obras Completas, Baajós, Universitas Editorial, 19964.
—El miajón de los castúos (Rapsodias extremeñas), Mairil, Espasa Calpe, 200314.
- Viudas Camarasa, A., “Vocabulario de El miajón de los castúos de Luis Chamizo”, Caçris, Boletín de la Real Academia de Extremadura de Las Letras y las Artes, II-III.
Atijus p'ahuera
[Edital | Editá'l códigu]- Documental 'La voz del terruño: 100 años de 'El Miajón de los Castúos'' Canal Extremadura, 11 de noviembre de 2021
Literatura en castú | |
---|---|
Autoris: Luis Chamizo • Javier Feijóo • Carmen Vera • Ventura Villarubia Pila • Ricardo Quintana Sánchez-Bote Obras: El miajón de los castúos • Extremadura • ¡Asina! • Primera Antología de Poesía Extremeña Webs: Castuamente • [[:Categoría::Literatura en estremeñu|Guipal más endirguis al tentu...]] • |