Gamelan
 Nesta página se gasta una ortografía destinta ala que normalmenti se gasta ena Güiquipedia. |
Un gamelan es un conjuntu musical de Indonesia y Malaysia, especialmenti de Java y Bali que nolmalmenti pue contenel una seri d'istrumentus cumu metalofonus, xilofonus, tamboris, gongs, frautas de bambú, istrumentus de cuerda pursá y frotá, y jata vocalistas puen sel incruyíus. Los tamboris sonin un istrumentu emportanti que dirigi el conjuntu.
El términu se refíri más a la balburda los istrumentus qu'a los que los tocan. Un gamelan es un conjuntu d'istrumentus cumu una entiá propia, costruíu y afináu pa que toquin juntus. Istrumentus de gamelan diferentis nu sonin entrecambiabris.
La parabra "gamelan" víni de la parabra javanesa "gamel" que quíi iðil golpeal u martillal, con el sufiju -an, que jorma un nombri colectivu.
Varieáis de conjuntus de gamelan
[Edital | Editá'l códigu]Las divelsas jolmas de conjuntus de gamelan han de distinguilsi polos istrumentus qu'encrúin y pol usíu la vo, afinacionis, repertoriu, estilu y contestu curtural. En general, nu hay dos conjuntus de gamelan igualis, y de los que sulgierun en cortis prestigiosas a menú se considera que tínin el su propiu estilu. Ciertus estilus son compartíus pol conjuntus de gamelan de zonas cercanas, criandu un estilu regional.
Las variantis s'agrupan geograficaenti, juendu la principal división la que se da entre los estilus de los balinesis, los javanesis y los sundanesis. Los gamelan sundanesis s'associan a menú con el gamelan degung, un conjuntu sundanés qu'utiliða un subconjuntu d'istrumentus modificáus con un mou particulal de la escala pelog. Los gamelan balinesis se suelin associal a un virtuosismu y cambius velocis de tempu y dinámica del gamelan gong kebyar, el su estilu más conocíu. Algotrus estilus popularis balinesis encrúin el gamelan jegog y el kecak, tamién conocíu cumu el "cantu el monu".
Juera el nucliu principal de Java y Bali, los gamelan s'estendierun hestóricaenti a través del entrecambiu y intrés curtural u pol migracionis, surgiendu estilus nuevus. Los gamelan malayus (principalmenti de las regionis de Terengganu y Pahang) se diseñan de jolma similal a los javanesis menus en que carecin d'angunus istrumentus elaboráus y qu'están afináus en una escala slendro cuasi equidistanti en intervalus, a menú jiðiendu usíu d'un do u un si bemol occiental cumu la basi. Los imigrantis javanesis de Surinam tocan gamelan en un estilu autáu al de las aldeas del centru Java. El gamelan está relacionáu conos conjuntus kulintang de Filipinas. Tamién s'usan agora los gamelan en occidenti, encruyendu lo mesmu conjuntus tradicionalis cumu esprimentalis.