Astelena pilotalekua

Astelena pilotalekua
	Irudi gehiago
Kokapena
Herrialdea	Euskal Herria
Probintzia	Gipuzkoa
Udalerria	Eibar
Koordenatuak	43°11′01″N 2°28′29″W / 43.18357°N 2.47465°W
Historia eta erabilera
Irekiera	1904ko ekainaren 24a
Inaugurazioa	1904ko ekainaren 24a
Jabea	Eibarko Udala
Kirola	pilota (euskal pilota)a
Edukiera	1.250

Astelena Eibarko (Gipuzkoa) udal pilotalekua da, 1904ko ekainaren 24an inauguratua, Eibarko jaiak ospatzen ari zirela, Donibane egunez. Pilotaren Katedrala goitizenez ezaguna,^[1] 1.250 lagunentzako edukiera du. Eraiki zenetik, hainbat aldiz eraberritu dute eraikina, azkena 2006 eta 2007. urteetan. Bergarako udal pilotalekuarekin batera, pilota partida profesionalak jokatzen diren pilotalekurik zaharrenetakoa da, eta adituen bilgune^[2] zelako jarri zioten Pilotaren Katedrala goitizena.

Historia

Pilotaleku estaligabetzat estreinatu zuten 1904ko ekainaren 24an. Hilabete batzuk geroago aurkeztu zen estalkia jartzeko proiektua. XX. mendeko lehen bi hamarkadetan, pilotaz beste, beste hainbat erabilera ere zuen pilotalekuak: jaialdiak, afariak, bazkariak, kontzertuak... Eibarko kultura eta gizarte zentroa zen.^[3]

1936ko gerran, kuarteltzat eta jantokitzat erabili zuten. Gerra haren ondoren etorri zen Astelena pilotalekuaren loraldia: 1946an lehendabizikoz jokatu zen hor Esku Huskako Buruz Buruko Pilota Txapelketa Nagusiaren finala (Atano III.ak mendean hartu zuen Akarregi, 22–16). Geroztik, txapelketa horretako beste zazpi finalen jokaleku izan da, azkena 1999koa.^[3]

1969tik 1972ra egin zioten lehenengo eraberritze handia, fatxada modernista errespetatuta. 1976an, PSOE alderdiak Astelenan egin zuen legeztatua izan ondorengo lehenengo mitina (frankismo garaian, oposizioko beste hainbat alderdi politiko bezala, legez kanpokoa zen PSOE).^[3]

2005ean, pilotalekua itxi zuten, Vidarte eta Gastañazatorre familien arteko desadostasunak zirela kausa. Vidarte familia zen pilotalekuaren % 40ren jabe eta pilotalekua kudeatzen zuen Aspe enpresaren jabe; eta pilotalekuaren % 60ren jabe zen Gastañazatorre familia. Gastañazatorre sendiak 120.000 euro eskatzen zizkien Asperi, pilotalekua erabili ahal izateko. Azkenean, 2007an ireki zen Astelena berriro, Eibarko Udalak bi familiei pilotalekua erosi eta gero. Trukean, hiru milioi euro ordaindu zizkion Udalak Gastañazatorre familiari, eta eraikinak aurrealdean dituen etxebizitzen gaineko eskubide batzuk eman zizkion Vidarte familiari.^[4] ^[3]