Стацыя

Ста́цыя (ад лац.: statio — месцазнаходжанне) — пэўны ўчастак прасторы асяроддзя, які валодае сукупнасцю ўмоў (рэльефу, клімату, ежы, прытулку і г. д.), неабходных для існавання і пражывання на ім пэўнага віду жывёл. Паняцце стацыя ўжываецца толькі ў адносінах да віду. Кожнаму віду ўласцівы пэўны набор стацый, гэтакі характэрны, што можа служыць яго важнай адметнай прыкметай. Часцей ужываецца ў адносінах да наземных жывёл.

Стацыяй у больш вузкім сэнсе прынята называць участкі месцапражывання, якія выкарыстоўваюцца жывёлай для выканання якой-небудзь функцыі (гнездавыя, кармавыя стацыі) ці ў пэўны час дня ці года (дзённыя, начныя, сезонныя стацыі).

Характэрныя для кожнага віду стацыі размяшчаюцца ў межах відавага арэалу мазаікай. У сувязі з гэтым арэал віду ніколі не бывае заселены цалкам. Асобныя стацыі, якія засяляюцца відам, могуць вызначыцца шэрагам адрозненняў ў асаблівасцях рэльефу, расліннасці і т. п., То ёсць від звычайна валодае наборам стацый, некаторыя з якіх могуць мець рознае значэнне ў жыццёвым цыкле жывёл.

Літаратура

• Ста́цыя // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 182. — 10 000 экз. — ISBN 985-11-0035-8. — ISBN 985-11-0251-2 (т. 15).
• Большой энциклопедический словарь «Биология». — под ред. М. С. Гилярова, — М.: Большая российская энциклопедия, 1998. — ISBN 5-85270-252-8.
• Дубровский Ю. А. Стация // Большая медицинская энциклопедия / Гл. ред. Б. В. Петровский. — 3-е изд. — М.: Советская энциклопедия, 1988. — Т. 24. — 150 800 экз. (руск.)