Герб Асіповічаў

Герб Асіповічаў — герб горада Асіповічы Асіповіцкага раёна. Герб і сцяг зацверджаны Указам Прэзідэнта Рэспублікі Беларусь ад 3 студзеня 2005 г. № 1.

Герб Асіповічаў
Дэталі
Зацверджаны	3 студзеня 2005
Шчыт	Іспанскі
Заснаванне	3 студзеня 2005
Аўтар герба	Віктар Аляксандравіч Ляхар
Ідэя герба	Віктар Аляксандравіч Ляхар

Апісанне

Герб уяўляе сабой іспанскі шчыт, на зялёным полі якога ў сярэдняй частцы паміж дзвюма чорнымі палосамі на сярэбраным полі паравоза чорнага колеру.

Сэнс герба

Сюжэт герба грунтуецца на гістарычным факце ўзнікнення ў 1872 г. чыгуначнай станцыі на Лібава — Роменскай чыгунцы, якая будавалася ў той час. Сваю назву станцыя атрымала ад невялікай вёскі Асіповічы, якая знаходзіцца ў 3 км ад яе. Усё далейшае развіццё горада звязана з чыгуначным транспартам, узнікненнем прадпрыемстваў і устаноў, якія абслугоўваюць чыгунку.

Асноўнае поле шчыта — зялёнае. Зялёны колер герба, згодна з агульнапрынятай геральдычнай трактоўкай, з’яўляецца сімвалам жыцця, абнаўлення, дастатку і дабрабыту. Ва ўсходнеславянскай сімволіцы зялёны колер лічыцца сімвалам гонару, даверу. Зялёны колер звязаны таксама з тым, што горад размешчаны ў цэнтры ляснога масіву. Асіповіцкі раён на 60 % заняты лясамі.

Срэбны пояс у гербе азначае чысціню, добрапрыстойнасць, высокую мараль. Срэбра здаўна шанавалася ў беларусаў як самы каштоўны метал і ўвасабляла высакароднасць, годнасць і доблесць. Жыхары горада на працягу ўсяго яго існавання з’яўляліся стваральнікамі і абаронцамі. Асноўная геральдычная фігура — сярэбрны пояс — перадае колер вады ракі, на берагах якой узнік горад.

Чорныя палосы — колер надзейнасці і стабільнасці, азначаюць шлях, рух, развіццё, нарэшце, чыгуначны шлях, рэйкі. Гэта суадносіцца з гісторыяй узнікнення горада як чыгуначнай станцыі, а таксама паказвае. што горад дынамічна развіваецца, рухаецца наперад па шляху эканамічнага і сацыяльнага развіцця на карысць яго жыхароў. Чорны паравоз, адлюстраваны на поясе, мае ідэнтычныя абрысы з некалі рэальна існуючай машынай з паравым рухавіком.

Гл. таксама

• Сцяг Асіповічаў

Спасылкі

• г. Асіповічы – Афіцыйныя геральдычныя сімвалы Рэспублікі Беларусь  (бел.). Праверана 7 кастрычніка 2023.
• Указ(недаступная спасылка) Прэзідэнта Рэспублікі Беларусь ад 3 студзеня 2005 г. № 1.(недаступная спасылка)