Wikipedia:Puntu de vista neutral
![]() | Esta ye una política oficial de la Wikipedia. Ellaboróse por tola comunidá, y el so cumplimientu ye obligatoriu pa tolos editores. Pues camudar coses menores, como meyorar la redaición o'l formatu, pero si quies camudar coses más importantes ties que consultalo a tola comunidá. |
![](http://upload.wikimedia.org/wikipedia/commons/thumb/f/fa/Wikipedia_scale_of_justice.png/200px-Wikipedia_scale_of_justice.png)
El puntu de vista neutral (PVN, o tamién NPOV del inglés neutral point of view) ye ún de los pegollos de la Wikipedia (otru ye Wikipedia ye una enciclopedia). Según Jimbo Wales, fundador de la Wikipedia, el PVN ye «absolutu y innegociable». [1]
Esti principiu establez, en resume, que la enciclopedia tien que contener fechos, y nos casos en qu'heba opiniones diverxentes (más d'un puntu de vista) sobre un tema, se dexe claro nel artículu tala cosa, estremando aquello sobre lo qu'hai disputa de lo discutío. La neutralidá nun ye tapecer puntos de vista sinón mostrar la diversidá pa que cada persona adopte la opinión que más-y guste. Trátase de dicir lo que la xente cree cierto, y non de dicir lo que ye cierto. Asina, en casu de polémica, espondránse los puntos fuertes y débiles según cada puntu de vista, ensin tomar partíu.
El puntu de vista neutral tamién exixe que nun heba múltiples artículos contradictorios sobre un mesmu tema.
Los fechos, en sí mesmos, son neutrales, pero la so acumulación pue nun lo ser. Si sólo apaecen los fechos favoratibles a un puntu de vista nun artículu, l'artículu será non neutral.
Lo que la neutralidá nun ye
El puntu de vista neutral nun busca:
- Oxetividá: la oxetividá ye un puntu de vista únicu sobre un tema nel qu'hai varios; el puntu de vista neutral exixe que, si hai dellos puntos de vista, s'espongan toos ellos dientro de lo posible.
- Equidistancia: nun se trata de buscar un puntu de vista intermediu, sinón d'amosar los puntos de vista según la so importancia.
- La verdá: Wikipedia nun ye una fonte primera, polo que nun podemos decidir cómo son realmente les coses, o cómo habríen ser. El nuestru llabor ye esponer el conocimientu que se tien sobre elles. Si dalgo ta n'alderique, tien de describise esi alderique.
Cómo alcanzar la neutralidá
Trabayar xuntos
Como wikipedistes, el nuestru llabor nun ye editar los artículos pa que reflexen los nuestros puntos de vista y llueu defendelos contra cualquier cambiu n'otru sentíu; la nuesa xera ye trabayar xuntos; llegando, cuando se necesite, a alcuerdos sobre'l conteníu de los artículos.
Munches veces la falta de neutralidá nun ye intencionada. Por exemplu, cuando nun país se trata de mou unánime un tema d'una forma, y n'otru de la contraria, un wikipedista nun tien por qué conocer siquiera'l puntu de vista nel otru país, esto pue llevalu a una falta de neutralidá involuntaria al editar l'artículu.
Puntos de vista minoritarios
Los puntos de vista minoritarios nun tienen por qué tener tantu espaciu como los más populares. Tenemos qu'evitar que se-y dea tanta atención a un puntu de vista minoritariu como a otru mayoritariu, yá qu'eso podía llevar a confusión sobre l'estáu del alderique, y mesmo ser una forma de propaganda. Asina, pa representar xustamente'l discutiniu, tenemos que presentar los puntos de vista en conflictu en proporción a la so representación ente los espertos nel tema, o ente les partes afeutaes. Un exemplu humorísticu (n'inglés) sobre'l tema ta en [2].
N'ocasiones, surxen temes que son consideraos pseudociencia. Nun se trata de describir el puntu de vista científicu y el non científicu en pie d'igualdá, sinón de presentar el puntu de vista mayoritariu (xeneralmente, el científicu) como mayoritariu, y el minoritariu (con frecuencia, pseudocientíficu) como minoritariu; y d'esplicar el tratamientu científicu que tengan recibío les teoríes pseudocientífiques.
Tamién pue haber otros puntos de vista ofensibles pa dalguna o la mayoría de la xente, colos que tien d'actuase de la mesma forma.