Tino Casal
Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
Tino Casal![]() | |
---|---|
![]() | |
Vida | |
Nacimientu | Veguín, 11 de febreru de 1950[1] |
Nacionalidá |
![]() |
Muerte | Madrid, 22 de setiembre de 1991[1] (41 años) |
Causa de la muerte | accidente de tráficu |
Estudios | |
Llingües falaes | castellanu |
Oficiu | cantautor, escultor |
Premios | |
Xéneru artísticu | Glam rock |
Discográfica | EMI |
IMDb | nm1863257 |
tinocasal.com | |
![]() |
José Celestino Casal (11 de febreru de 1950, Veguín – 22 de setiembre de 1991, Madrid), más conocíu como Tino Casal, foi un cantante y compositor clave de la Movida Madrilana de los años 1980.
La dómina pre-Neocasal
[editar | editar la fonte]Estudiando na Escuela d'Artes y Oficios d'Uviéu, Tino formó con unos amigos un grupu de rock que llamaron «Zafiros Negros». Unos años depués tuvo la oportunidá d'ingresar como cantante con Los Archiduques, grupu punteru del rock asturianu que llograra grabar un discu. Casal foi'l cantante escoyíu pa la so segunda grabación, Lamento de gaitas. Depués el grupu entraría nun tiempu de pasividá y cuando en 1968 editaron el siguiente discu nun tivieron una respuesta afayadiza del mercáu y Tino Casal decide abandonar el grupu.
Dedicóse a estudiar arte y decoración y a viaxar pel extranxero, n'especial Alemaña y Londres, onde se rellacionó con delles de les estrelles del naciente Glam, ente ellos Brian Ferry y David Bowie.
Depués d'abandonar a «Los Archiduques», y entamar la so carrera como cantante solista, presentóse al Festival de Benidorm onde coyechó un enorme ésitu na so edición de 1975, pero abandonó esta nueva etapa pa dedicase a la producción porque «queríen llanzame como un cantante melódicu/folkloricu». Dientro d'esta actividá de productor trabayó con grupos como «Goma de Mazcar», «Salvajes», «Obús» y «Tacones».
Tamién tentaría de dedicase a la pintura, pero nun algamó nengún ésitu.
Primera mitá de los 80
[editar | editar la fonte]Finalmente, en 1981 asoleya'l so primer LP en solitario, Neocasal. Esti discu, el primeru de los que fairía en collaboración con Julián Ruiz, cuntaba con ésitos memorables de la Movida como Champú de Huevo o Billy Boy. Dientro d'esti discu inclúinse tamién dos versiones: ¿Vida en Marte?, versión de Life on Mars? de David Bowie, y Blanca estancia, versión de White Room de Bowie y Pete Brown.
Esti primer trabayu tuvo un ésitu rotundu de públicu, al mesmu tiempu que coyechaba males crítiques.
Dos años más tarde, en 1983, publicaba Etiqueta Negra, discu paradigmáticu del estilu enlloquecíu, plásticu y sensualmente glam rock que caracteriza tola obra de Casal. Esti trabayu inclúi ún de los mayores ésitos de la so carrera, Embrujada, y otros grandes cantares como Póker para un perdedor y Los pájaros. Etiqueta negra foi de nuevo un ésitu de ventes.
Existe una reedición d'Etiqueta negra col cantar Tigre Bengalí, sacada de la banda sonora de la película Sal Gorda de Fernando Trueba.
El siguiente discu, de 1984, ye Hielo Rojo. L'estribillu d'unu de los cantares incluyíos nesti discu, Pánico en el edén, serviría como banda sonora oficial pa la TVE de la Vuelta Ciclista a España.
Posteriormente a la publicación d'esti discu, nel branu de 1985, Tino Casal sofre una torcedura de todíu nun conciertu na sala Pachá de Valencia, en plena xira. Desoyendo los encamientos de los médicos que lu atienden, Tino sigue de xira demientres dos meses, hasta que tien de ser hospitalizáu a piques de la muerte por mor d'una necrosis.
Demientres la so estancia en vixilancia intensiva, los médicos que lu traten lleguen a sospechar que l'artista tien SIDA, dada la gravedá de la so infeición.
El regresu
[editar | editar la fonte]Depués de la enfermedá, el cantante permanez desparecíu de la escena musical hasta 1987, añu nel qu'asoleya'l que pa munchos constitúi'l so meyor álbum, Lágrimas de cocodrilo. Nesti discu inclúise'l so mayor ésitu, Eloise, tema grabáu nos estudios Abbey Road de Londres, cola collaboración de la London Philarmonic Orchestra, baxo la direición d'Andrew Powell (arreglista collaborador d'Alan Parsons Project). Esti tema ye una versión remota d'un cantar de Barry Ryan, que'l propiu Casal ya versionara na so primer dómina con «Los Archiduques».
Histeria, asoleyáu en 1990, supón l'últimu discu de la so carrera. Nun foi un ésitu rotundu como Lágrimas de cocodrilo o Hielo Rojo, pero ye un trabayu dignu. Destaquen nesti discu dos versiones Tal como soy, versión de Killing me softly with this song de Roberta Flack y No fuimos héroes, versión de Don't you want me de Human League.
Muerte y obres póstumes
[editar | editar la fonte]Un añu dempués, el 22 de setiembre de 1991, Tino Casal regresa de madrugada d'una fiesta na discoteca Ática, pela carretera M-501 (n'Aravaca, Madrid). Al tomar una curva d'esta carretera con escesu de velocidá, el conductor pierde'l control del coche y estréllase escontra una de les faroles que bordeen esta carretera. Tino Casal resulta l'únicu muertu de los que diben nel coche.
Esi mesmu añu asoléyase una escoyeta de los sos mayores ésitos, tituláu Grandes ésitos (Etiqueta negra). Esti discu, nel que Casal taba trabayando nel momentu de la so muerte, foi publicáu de manera póstuma.
Esiste una posterior recopilación de grandes ésitos, que data del añu 2000, col títulu de Casal Vive.
Discografía
[editar | editar la fonte]Lp's
[editar | editar la fonte]- Neocasal (1981)
- Etiqueta negra (1983)
- Hielo rojo (1984)
- Lágrimas de cocodrilo (1987)
- Histeria (1990)
- Grandes Éxitos (Etiqueta negra) (1991)
- Casal vive (2000)
- Recopilatorio Casal Unico (2006)
Referencies
[editar | editar la fonte]- ↑ 1,0 1,1 Afirmao en: Find a Grave. Identificador Find a Grave: 12181175. Apaez como: Tino Casal. Data de consulta: 9 ochobre 2017. Llingua de la obra o nome: inglés.
Enllaces esternos
[editar | editar la fonte]- Tino Casal na Internet Movie Database (n'inglés)
- «Tino Casal». en Find a Grave. (n'inglés)