Sambo
| Enfoque | Híbridu, d'agarres y golpes |
|---|---|
| Contautu/durez | Contautu plenu |
| País d'orixe | Xunión Soviética, Rusia |
| Fundador | Viktor Spiridonov, Vasili Oshchepkov, Anatoly Kharlampiev |
| Prauticantes famosos | Oleg Taktarov, Vladimir Putin, Andrei Arlovski, Gokor Chivichyan, Igor Yakimov, Serguei Kharitonov, Fedor Emelianenko, Aleksander Emelianenko |
| Paternidá | Yudu, lluches tradicionales eslaves |
| Artes descendientes | Systema |
| Deporte olímpicu | Non |
| Sitiu oficial | International Sambo Federation |
 | |
La pallabra Sambo (en rusu самбо) ye un acrónimu de la espresión “samooborona bez orúzhiya”, que significa lliteralmente "defensa personal ensin armes”. Sambo denoma a un arte marcial modernu, arriendes de deporte de combate y sistema de defensa personal, desendolcáu na antigua Xunión Soviética y reconocíu como deporte nacional pol Comité de Deportes de Tola XRSS en 1938, tres la so presentación por Anatoly Kharlampiev. Tien raigaños principalmente nel Yudu, y tamién n’estilos tradicionales o populares de llucha llibre como’l Koch armeniu, el Chidaoba xeorxanu, el Trîntǎ moldavu, el Kurash uzbeku, y el Khapsagay mongol.
Según la Federación Internacional de Lluches Asociaes (FILA), el sambo ye una de les cuatro formes principales de llucha llibre competitiva aficionada que se prautiquen anguaño, siendo les otres tres la llucha grecorromana, la llucha llibre olímpica y el yudu.
Historia
[editar | editar la fonte]Aniciu
[editar | editar la fonte]L’exércitu imperial anterior a 1917 nun cuntaba con un sistema unificáu de combate a mano vacía, ello ye, ensin armes. Poro, tres la revolución Lenin encargó a un piñu d'espertos el desendolcu d'un sistema de combate propiu del exércitu bermeyu. Tolos recursos económicos del aparatu políticu descomanáu que yera la Xunión Soviética apurriéronse pa pescudar y desendolcar el meyor sistema personal de combate.
Esti piñu d'espertos viaxó per dayures atropando les téuniques más eficaces de disciplines como'l Yudu, Jujutsu, Kárate y Kung fu qu'amestaron a lluches autóctones de los países de la XRSS, añadiendo amás delles téuniques de disciplines olímpiques como la Llucha grecorromana, Llucha llibre olímpica y Boxéu y, col tiempu, Muay Thai.
Fundadores
[editar | editar la fonte]
En 1918 Lenin creó'l Vseobuch (Vseóbshcheye Voyénnoye Obuchéniye: Formación Xeneral Militar) baxo'l mandu de N.I. Podvoyskiy, al envís d'entrenar al exércitu bermeyu. El llabor de desendolcar y organizar l'entrenamientu del combate cuerpu a cuerpu de los militares soviéticos llevólu K. Voroshilov, que creó a esi efeutu'l centru de formación física "Dinamo" de la NKVD (Comisariáu Políticu d'Asuntos Internos). Voroshilov, col envís de pescudar fuera de Rusia, escoyó a tres persones: Anatoly Kharlampiev, Victor Spiridonov y Vasili Oschepkov. Caún d'ellos fixo un estudiu in situ de los combates llariegos y les sos téuniques, tamién col oxetivu de conocer cómo s'enseñaben n'otros países.
Caúna de les téuniques que se diben amestando al sistema estudiábase a fondu, considerando los sos méritos y la so aplicación al combate ensin armes, y d'esta miente foron afinándose les téuniques p'algamar l'oxetivu últimu del Sambo: controlar a un atacante armáu nel menor tiempu posible. Asina foi como les téuniques más amañoses del yudu y del jujutsu entraron nel repertoriu del Sambo.
Nun esiste hasta'l día de güei un consensu universal sobre la esistencia d'un únicu fundador del Sambo. Sicasí los tres maestros siguientes son consideraos davezu los Padres del Sambo:
- Vasili Sergeyevich Ochschepkov (1892-1937): nació na isla de Sajalin, daquella territoriu xaponés; estudió Yudu con Jigoro Kano nel Kodokan, algamando’l cintu negru 2u Dan. Vasili Oschepkov enseñó yudu y kárate a les fuercies d'élite del Exércitu bermeyu na Casa Central del Exércitu Bermeyu. Morrió nun gulag nel añu 1933 cuando la purga estalinista, acusáu de ser espía xaponés, al reconocer el Yudu como base del Sambo. Esto consideróse como una ofiensa, yá que dende’l principiu pretendióse que’l sambo fuera un arte marcial propiu de la nueva XRSS. El sambo utilizóse como elementu de cohesión pola propaganda estatal soviética, qu'amenorgaba los sos oríxenes rexonales y foranos.
- Victor Spiridonov (1881-1943): veteranu de la Primer guerra mundial y ún de los primeros instructores de llucha y defensa personal contrataos pol centru Dinamo. Na so esperiencia marcial a lo llargo de los años prauticó Llucha grecorromana, Llucha llibre, estilos eslavos de llucha y jujutsu xaponés. Como investigador d'estilos de llucha nel centru Dinamo viaxó a Mongolia y a China a fin d'estudiar los estilos autóctonos. Dende los años 1920, y al tener una mancadura nel brazu izquierdu por un bayonetazu na Guerra ruso-xaponesa, desendolcó un enfoque del sambo más suave, el Samoz, empobináu a preparar a los policíes y guardies de la XRSS. Esta versión más afinada del sambo fundióse col sistema actual de "sambo defensa personal", usáu anguaño en situaciones reales por prauticantes de tol mundu.
- Anatoly Kharlampiev (1906-1979): alumnu d'Oshchepkov, ameyoró l'estilu propuestu pol so maestru, y siguió atropando les téuniques de Spiridinov. Munchos llámenlu’l padre del Sambo, pola mor quiciabes de que vivió lo bastante y tuvo los contactos políticos necesarios pa tar a cargu d'esti arte precisamente de la que lu llamaron Sambo. En cualquier casu foi a instancies de so l'aceutación del Sambo como deporte de combate oficial de la XRSS en 1938, y ye por eso polo que sí pue dicise que Kharlampiev ye’l padre de la Llucha Sambo, o Sambo deportivu.
Anque Oschepkov y Spiridonov tuvieron munches veces ocasión de collaborar xuntos, los sos esfuercios nunca agabitaron al empar. La fusión progresiva d'estilos foron llográndola los sos estudiantes asina como’l personal militar.
Arriendes de los mentaos, otros nomes importantes nel desendolcu orixinal del Sambo son N.I. Golkovski, I.L. Vasiliev, A.I. Chumarov, S.V. Maguirovski, V.I. Andreyev, D.S. Damanin, V.F. Maslov, A.A. Budzinski y los hermanos Niniashvili. La contribución de caún d'ellos foi la investigación intensiva de les reaiciones sicofisiolóxiques al estrés por amarraza física, les reaiciones sicolóxiques nel combate de sobrevivencia, y l'aceutabilidá llegal, médica y táutica de l'actividá del combate, asina como la esploración de les considerances téuniques.
Carauterístiques
[editar | editar la fonte]Les téuniques del Sambo deportivu son bien numberoses (más de 5.000 mañes) y clasifíquense en tres categoríes principales: los valtos, los controles articulares y les inmovilizaciones. Ye raro que los combates de seis minutos que se faen en competición acaben per aciu d'esi acotamientu del tiempu. Davezu ún de los lluchadores aporta a llograr ventaya sobre’l contrariu. El sambo estrémase de manera por un nivel mui espectacular de los valtos, y tamién poles llaves de piernes. Los combates llíbrense sobre un tapiz de llucha, controlaos por un árbitru, un xuez y un xefe de tapiz.
Estilos de Sambo
[editar | editar la fonte]El Sambo estrémase en tres formes principales, caúna con carauterístiques propies:
- Sambo Deportivu o Llucha Sambo (Borba Sambo). Pola traza ye asemeyáu a la Llucha Llibre Olímpica o al Yudu, pero con delles diferencies en regles, protocolu y vistimienta. Por exemplu, al contrario que’l Yudu, el Sambo permite dellos tipos de llaves de pierna, pero nun permite los estrangulamientos. Céntrase en valtos, trabayu en suelu y sumisiones con mui poques torgues a los agarres en comparanza col Yudu.
- Combat Sambo (Boyevoye Sambo). Utilizáu y desendolcáu polos militares, el Combat Sambo aseméyase a les modernes artes marciales mestes, incluyendo mui bien delles formes de golpiar con puños y pies y d'agarrar, arriendes de que (al contrario que la Llucha Sambo) ta permitío estrangular y facer mañes de torcimientu articular. Los competidores lleven chaquetes como na llucha sambo, pero tamién proteiciones de manes y delles veces d'espiniyes, de cabeza, de xenitales... Asóciase dacuando al “sambo militar”.
- Sambo Defensa Personal, Combat Sambo Spetsnaz o Samoz. Téunica de defensa personal que combina toles téuniques de deportes de combate esistentes. Prautícase con pantalón llargu en cuentes de curtiu, del mesmu color que la chaqueta. Esti enfoque asóciase cuasi siempre col “sambo militar”.
Vistimienta y graos
[editar | editar la fonte]Un prauticante de sambo viste davezu una chaqueta encarnada o azul (inclusive de cualesquier otru color) llamada kurtka, un cintu del mesmu color (o a veces negru), pantalones curtios (trus) del color de la chaqueta y unos sambovki (zapatos de sambo) fechos en cueru dondo. El kurtka estrémase de los uniformes d'otres artes marciales en que permite que’l cintu se meta peles trabielles de la cintura al envís de torgar que la chaqueta s’escape del cintu. Amás pa la práutica del Combat Sambo precísense guantes d'artes marciales mestes, que permiten facer agarres; cascu, proteutor bucal, proteutor xenital y proteutor de caníes. Polo xeneral la vistimienta d'un prauticante de sambo nun reflexa’l so grau de maestría o la so clasificación competitiva como nos deportes de contautu del tipu del kick-boxing, boxéu, etc.
En Rusia, al mesmu tiempu que s’usa’l sistema de Kyu-Dan nes artes marciales xaponeses, utilízase tamién un sistema de graos de competición denomáu Sistema unificáu de clasificación deportiva de la XRSS (Единая Всесоюзная спортивная классификация), na que’l grau cimeru de maestría denómase Maestru deportivu distinguíu en Sambo.
Organizaciones
[editar | editar la fonte]En 1968 la FILA (Federación Internacional de Lluches Asociaes aceutó’l Sambo como estilu internacional de llucha, xuntamente cola llucha grecorromana y la llucha llibre olímpica, modalidaes éstes que yá taben consideraes como deportes olímpicos.
En 1985 creóse una organización propiamente de Sambo, la FIAS (Federación Internacional de Sambo Amatéur.
En 1993 la FIAS dixebróse en dos organizaciones, qu'utilizaron entrambes el mesmu nome y logotipu. A estos dos grupos llámenlos FIAS oriental (controlada dende Rusia) y FIAS occidental (controlada dende los Estaos Xuníos).
Doce años más tarde, nel 2005, la FILA apautóse cola FIAS occidental y fíxose otra vuelta cola xurisdicción sobre’l sambo [1].
Actualmente la FIAS (y non la FILA) tien la xurisdicción sobre les competiciones internacionales de sambo deportivu y de combate. Los resultaos de les competiciones pueden atopase nel sitiu de la FIAS [2].
Referencies
[editar | editar la fonte]- ↑ «Struggling To Survive - Can FILA End Sambo's Civil War?». Archiváu dende l'orixinal, el 2007-09-28.
- ↑ Resultaos de Competiciones Archiváu 2017-08-09 en Wayback Machine - (Sitiu de la FIAS)
Enllaces esternos
[editar | editar la fonte]
Wikimedia Commons acueye conteníu multimedia sobre Sambo.
- Páxina oficial de la Federación Rusa de Sambo
- Páxina oficial de la Federación Europea de Sambo
- Páxina oficial de la Federación Canadiense de Combat Sambo Archiváu 2009-05-27 en Wayback Machine
- Páxina oficial de la FIAS (The International Sambo Federation (FIAS)
