Mahoma
![](http://upload.wikimedia.org/wikipedia/commons/thumb/0/0d/Maome.jpg/200px-Maome.jpg)
Mahoma[2] (20 d'abril de 571, La Meca – 8 de xunu de 632, Medina) ye la figura central del islam y consideráu como'l so fundador polos non musulmanes. Mahoma (nome completu n'árabe Abu l-Qāsim Muḥammad ibn ʿAbd Allāh al-Hāšimī al-Qurayšī — ابو القاسم امحمد ابن عبد الله ابن عبد المطلب ابن هاشم القريش) ta consideráu polos musulmanes como'l «sellu de los profetes» (jātim al-anbiyā), por ser el caberu d'una llarga riestra de mensaxeros unviaos por Dios (Alá) p'actualizar el so mensaxe, que sería básicamente, el mesmu tresmitíu polos sos predecesores, ente los que se cuenten Xesús (Isa) y Moisés (Musa). Pola so parte, el bahaísmu venéralu como un profeta o "manifestación de Dios", que les sos enseñances foren actualizaes poles de Baha'u'llah, fundador d'esta relixón.
Árabe de la tribu de Quraysh, Mahoma nació en La Meca en 570, la tradición afita la fecha del 570 como la del nacimientu, faciéndola coincidir cola espedición del gobernador abisiniu escontra La Meca, pero dicha expedición ocurrió muncho enantes. Dalgunos autores asitien el nacimientu alrodiu del 580. Morrió en Medina, l'8 de xunu de 632. Les dos ciudaes alcuéntrense na rexón d'Hiyaz n'actual Arabia Saudita. Fiyu póstumu d'Abd Allah ibn Abd al-Muttalib, miembru del clan de los hashimís, foi acoyíu y educáu primero pol so güelu Abd al-Muttalib y dempués pol so tíu paternu Abu Talib, padre del so primu y futuru califa Alí.
![](http://upload.wikimedia.org/wikipedia/commons/thumb/7/70/Mohammed_kaaba_1315.jpg/200px-Mohammed_kaaba_1315.jpg)
Trabayó como mercader na ruta caravanera ente Damascu y La Meca a les órdenes de Khadiya, fiya de Khuwaylid, una rica comerciante vilva, venti años mayor qu'él, cola qu'acabaría casándose. Tuvo cuatro fiyes, asina como dalgunos fiyos que nun llegaron a adultos. Dixo haber recibío la primera visita del ánxel Gabriel (Yibril) a los 40 años d'edá (aproximao en 612). Describió esta visita como un mandatu pa memorizar y recitar los versos unviaos por Dios que posteriormente fueron escritos nel Corán. L'arcánxel Gabriel indicó-y que fore elixíu como'l caberu de los profetes y como tal predicó la pallabra de Dios sobre la base d'un estrictu monoteísmu, prediciendo'l Día del Xuiciu Final.
![](http://upload.wikimedia.org/wikipedia/commons/thumb/6/6c/Rashid_al-Din_Tabib_-_Jami_al-Tawarikh%2C_f.45v_detail_-_c._1306-15.png/200px-Rashid_al-Din_Tabib_-_Jami_al-Tawarikh%2C_f.45v_detail_-_c._1306-15.png)
Según el Corán (Al-Qur'ān), llibru sagráu de los musulmanes, Mahoma yera analfabetu (ummi), fechu que la tradición musulmana considera una prueba qu'autentifica'l Corán como portador de la verdá revelada. A lo llargo la so vida, Mahoma confió la conservación de la pallabra de Dios (Alá), tresmitida por Gabriel a los hafiz, que la memorizaben recitándola incansablemente. A la muerte de Mahoma, los sos socesores vieron la necesidá de plasmar les sos pallabres per escritu, pola importancia de conservar el mensaxe orixinal en tola so pureza, ensin el menor cambéu nin de fondu nin de forma. Pa ello emplegaron materiales como les escápules de camellu, sobre les que grababen los versículos del Corán.
Mahoma nun rechazó completamente les relixones xudía y cristiana, pero afirmaba ser unviáu por Dios pa completar y perfeccionar les sos enseñances: atacaes por muncha xente, viose obligáu a salir de La Meca y vivir en Yathrib (dempués llamada Medina) colos sos siguidores. Nesta ciudá entamó a consolidar el so movimientu relixosu. Hubo una guerra ente La Meca y Yathrib au los siguidores de Mahoma resultaron victoriosos. La organización militar que nació d'esta guerra continuó la llucha conquistando Arabia. A la fecha de la so muerte, yá tenía unificada tola Península Arábica, asina como parte de Siria y Palestina.
Posteriormente los socesores de Mahoma estendieron el dominiu árabe a Palestina, Siria, Mesopotamia, Persia, Exiptu, el norte d'África y la península ibérica.
Referencies
[editar | editar la fonte]- ↑ Afirmao en: Siyar A'lam al-Nubala (Muʼassasat al-Risālah, 1405h). Tomu: سيرة 1. Páxina: 36. Editorial: Resalah. Llingua de la obra o nome: árabe. Data d'espublización: 1985. Autor: Al-Dhahabi.
- ↑ Esti términu apaez nel Diccionariu de l'Academia de la Llingua Asturiana. Ver: corán
Enllaces esternos
[editar | editar la fonte]
Wikimedia Commons tien conteníu multimedia tocante a Mahoma.