عبد الرحيم بوعبيد
عبد الرحيم بوعبيد
| ||
![]() | ||
معلومات عامة | ||
زيادة | 23 مارس 1922 سلا | |
لموت | 8 يناير 1992 (69 عام) الرباط | |
لجنسية | لمغريب | |
لحرفة | سياسي و محامي | |
لّوغات لي كيعرف | عربية و لفرانساوية | |
معلومات خرى | ||
لحيزب | تيحاد شتيراكي د لقوات شعبية (1975–1992) تيحاد لوطني د لقوات شعبية (1959–1975) حيزب ستيقلال (1944–1959) | |
عبدالرحيم بوعبيد (تولد ف 23 مارس 1922 فسلا - مات نهار 8 يناير 1992 ف الرباط) كان محامي ؤ سياسي ؤ مناضل يساري مغريبي. بوعبيد كان من لقياد ديال لحاراكة لوطنية لمغريبية، ؤ شد مناصب سياسية ؤ حوكومية كبيرة مورا سّتيقلال د لمغريب.
تولد عبدالرحيم بوعبيد ف سلا ف وسط عائيلة شعبية. مورما خدا شهادة ديال لبتيدائي ف 1934، قرا لإعدادي و لّيسي ف مولاي يوسف ف الرباط، ؤ خدا لباكالوريا ف 1938.
بدا نضال باش يستاقل لمغريب من فرانسا ملي مشا ل فاس باش يخدم كا موعليم تما. عام 1945، مشا ل معهد الدراسات السياسية ف پاري، بعدما كان واخد ليسونص ف لقانون. ف 1949 نخارط ف لهيأة د لموحامين ف رّباط. و بعدها عاون لمناضلين ديال لحركة لوطنية حتا ستاقل لمغريب ف 1956.[1]
فاش كان كيوجّد لباكالوريا، نخارط ديجا ف خلايا د لمقاومة د سّتيعمار لفرانساوي ؤ لكتلة د لعامال لوطني. تلاقا ب بنبركة فاش كان ف ليسي مولاي يوسف ف رّباط، ؤ من بين لمهام لي ساهم فيها ف إطار لكتلة كانو تأطير لجماهير ؤ نشر لوعي ب لمطالب ؤ دّيفاع على لحقوق ديال لمغاربا.[1]
ساهم ف تقديم لوتيقة د لمطالبة ب سّتيقلال نهار 11 يناير 1944، ؤ كان من أصغر لّي سناو عليها. تّعتاقل جوج مرات من طاراف لفرانسيس، ؤ ساهم ف نشر لوعي لقومي عند لمغاربا زّماݣريا ف فرانسا فاش مشا يقرا تماك. شارك ف لمفاوضات ديال إيكس ليبان، ؤ كان معا لوفد لي مشا ل ماداݣاسكار باش يتلاقا ب محمد لخامس ف شتنبر 1955. ف ماي 1956، تعرّض ل محاولة غتيال لي نجا منها.[1]
ف 1955، كان أول سفير ديال لمغريب ل فرانسا باش يعاون ف لمفاوضات ديال ستيقلال لمغريب. و مبعد خدم وزير ديال الدولة مكلّف ب شؤون لمفاوضات ف حوكومة لبكاي لولا، من 1955 تال 1956. ؤ شد وزارة لقتيصاد لوطني ؤ لمالية من أكتوبر 1956 تال ماي 1960، ؤ تزادت ليه تا لمسؤولية د وزير لفلاحة، ؤ كان تا نايب د لوزير لّول ف لحوكومات ديال أحمد بلافريج ؤ عبدالله براهيم. وكان قيادي ف حيزب سّتيقلال و مبعد لإتحاد لإشتراكي معا لمهدي بن بركة.[1]
بوعبيد خدم على تطوير لقتيصاد د لمغريب، ؤ طلق أول خطة خامسية د تّنمية (مابين 1960 ؤ 1964). ف 1975 تّنتاخب أمين عام ديال حيزب ليتيحاد شّتيراكي، ؤ تعاود نّتيخاب ديالو تلاتة د لمرات متّابعين. رفض باش ياخد لمنصب ديال والي بنك لمغريب باش يركّز على تنضيم لحيزب ديالو.[1]
ف شتنبر 1959، وافق بوعبيد باش يكون عضو مؤسس ديال ليتيحاد لوطني د لقوات شّعبية (لي منبعد تبدلات سميتو ل "ليتيحاد شّتيراكي")، لي نشق من حيزب سّتيقلال. ف ماي 1963، تّنتاخب عضو ف لبرلمان، ولاكين تّعتاقل موراها معا قياديين خرين فاش قرر لحيزب باش يقاطع نّتيخابات لمحلية. ف 1974، ستقبلو لماليك لحسن تّاني، ؤ تطلق سراح بعض لمعتاقلين د لحيزب. دار موراها جولة ف لخاريج باش يعرّف ب لقضية د صّحرا لمغريبية.[1]
ف شتنبر 1981، تّعتاقل بوعبيد ؤ أعضاء خرين د لمكتب سّياسي د لحيزب، ؤ تّحكم عليهوم ب عام د لحبس، فاش تحفضو على لمسألة د سّتيفتاء ف صّحرا. ف مارس 1989، تّنتاخب آخر مرة على راس لحيزب، ؤ ف 3 فبراير 1991، وخا كان ديجا مريض، شارك ف مسيرة شعبية كبيرة ف رّباط باش يساند شّعب لعيراقي. آخر ضهور جماهيري ديالو كان ف 1 ماي 1991 ف مهرجان نقابي ب موناسبة عيد شّغل.[1]
![]() |
تقدر تزيد شوف بزاف د تّصاور و لمعلومات ديال Abderrahim Bouabid ف ويكيميديا كومنز. |