Remetschwil

Remetschwil
	Wappe vo Remetschwil
Basisdate
Staat:	Schwiiz
Kanton:	Aargau (AG)
Bezirk:	Bade
BFS-Nr.:	4039
Poschtleitzahl:	5453
Koordinate:	667421 / 251528Koordinate: 47° 24′ 40″ N, 8° 19′ 55″ O; CH1903: 667421 / 251528
Höchi:	524 m ü. M.
Flächi:	3,88 km²
Iiwohner:	2070 (31. Dezämber 2022)
Website:	www.remetschwil.ch
Charte
	Charte vo Remetschwil

Remetschwil isch e Gmeind im Bezirk Bade im Schwiizer Kanton Aargau. Si ligt zwüsche Bade u-n-em Mutschälle.

Geographi

D Gmeind het drü Ortsteil. D Hauptsidlig Remetschwil ligt überm Rüüsstal am Weschthang vom Heitersbärg. E chli höcher, uf öpper 660 Meter en Kilometer witer im Oschte, isch de Wiler Sennhof. En Kilometer weschtlich, durch en tüüffe Tobel vo Remetschwil trännt, isch de Ortsteil Busslinge uf 410 Meter, wo mit de Nachbargmeind Schtette zämmegwachse-n-isch.

De Gmeindsbann isch 388 Hektare gross, dodervo sin 93 Hektare Wald u 63 Hektare überbaut. Di tüüfscht Stell vo de Gmeind ligt uf 405 Meter, di höchscht uf 695 Meter.

Nachbargmeinde sin Niderrohrdorf u Oberrohrdorf im Norde, Schpreitebach im Oschte, Bällike u Chünte im Süde u Schtette im Weschte.

Gschicht

Im 1948i het ma z Remetschwil es helvetischs Grab us em 1. Johrhundert n. Chr. gfunde, wo also us de Ziit vo de römische Besatzig isch. Ma het könne nachwiise, dass d Römer am Weschthang vom Heitersbärg Wii aapoue hei. D Alemanne hei ab em 7. oder 8. Johrhundert d Gegend besidlet. Di erscht urkundlichi Erwähnig vo Remirswilare isch us em Johr 1184 in eme Urbar vom Chloschter Engelbärg. D Landesherre sin zerscht d Kyburger gsi, schpöter – ab em 1264i – d Habsburger. Die gröschte Lehnsherre z Remetschwil sin s Chloschter Oetenbach z Zürich s Chloschter Wettige u s Schpital z Bade gsi. Au verschidnigi Bürger vo Bade hei Landbsitz z Remetschwil gha. De gröscht Lehnsherr z Busslinge isch s Chloschter Muri gsi.

Im 1415i hei Eidgenosse de Aargau erobert u e so het Remetschwil ab do zum Amt Rohrdorf vo de Grafschaft Bade ghört, ere gmeine Herrschaft. Im März 1798 sin d Franzose in d Schwiiz iimarschiert u-n-hei di Helvetisch Republik usgrüeft. Remetschwil het in dere Ziit zum Kanton Bade ghört, wo 1803 im noie Kanton Aargau ufgange isch. Im 1805i hei di Gmeinde Busslinge, Niderrohrdorf, Oberrohrdorf, Remetschwil u Staretschwil zu de noie Gmeind Roodlef (hochdütsch: Rohrdorf) fusioniert, u-n-am 22. Mai 1854 het ma Roodlef wider in drü Gmeinde teilt. Saretschwil isch do mit Oberroodlef un Busslinge bi Remetschwil blibe.