Felix Sarasin
Dialäkt: Aaglobaaseldütsch |
Dr Felix Saresii (* 7. Oktober 1797 z Baasel, † 21. Jänner 1862 z Baasel) isch e Baasler Industrielle und Politiker gsi.
Si Lääbe
[ändere | Quälltäxt bearbeite]Dr Felix Saresii isch as Soon vom Kaufmaa und Politiker Felix Saresii (1771 - 1839) uf d Wält choo. Er het e Leer gmacht in dr Bauellefabrik vo sim Vatter und het denn e Baar Joor z Frankriich und z Ängland gläbt. Er isch zrugg uf Baasel choo und isch im vätterlige Bedriib iigstiige. Im gliiche Joor het er d Dochder vom Kaufmaa Hans Georg Buurged, d Emma, ghürootet. Er het Bauellespinnereie kauft und eso s Familiegschäft usbaut.
![](http://upload.wikimedia.org/wikipedia/commons/thumb/0/0c/Haus_zum_Sch%C3%B6neck%2C_St._Albanvorstadt%2C_Basel._Umbau_%281840%E2%80%931842%29_von_Melchior_Berri.jpg/220px-Haus_zum_Sch%C3%B6neck%2C_St._Albanvorstadt%2C_Basel._Umbau_%281840%E2%80%931842%29_von_Melchior_Berri.jpg)
1829 isch er Bresidänt vo dr dr Gmäinnützige Gsellschaft worde. 1833 isch er in Groosroot gweelt worde. Er het sich vor allem für d Erziejig und für Chilleaagläägehäite iigsetzt. 1835 het er mitghulfe, die Freiwilligi Akademischi Gsellschaft z gründe, wo die wüsseschaftligi Bildig und Forschig im Allgemäine het welle fördere, bsundrigs aber d Uniwersidäät Baasel. 1840 isch er Mitgliid vom Chläine Root worde und siibe Joor druf Bürgermäister. Er isch dr Baasler Delegierti bi dr Daagsatzig gsi und noch em Sonderbundschrieg Mitgliid vo dr Kommissioon, wo an dr nöije Bundesverfasig gschafft het.
1848 het er d Rosalie Brunner ghürootet, won e Dochder vom Bärner Chemiibrofässer Karl Brunner gsi isch. Am 4. Februar 1853 häi dr Saresii und anderi, wie dr Johann Jakob Speiser, dr Achilles Bischoff und dr Karl Geigy, die Schwizerischi Centralbaan (SCB) mit Sitz z Baasel gründet.
Dr Felix Saresii isch am 21.1.1862 z Baasel gstorbe.
Si Rolle in dr Sonderbundkriise und in dr Gründig vom Bundesstaat 1947 - 1948
[ändere | Quälltäxt bearbeite]Dr Saresii isch zwar konserwativ gsi, het aber immer brobiert zwüsche de Konserwative und de Liberaale z vermiddle, so au an dr Daagsatzig. D Differänze zwüsche de Mitgliider vom Sonderbund und de liberaale Ort si aber z grooss gsi. Noch em Chrieg isch er, im Underschiid zu vile andere Baasler Konserwative, au im Bundesstaat dröi bliibe. Er isch in dr Kommission gsi, wo d Verfassig usgarbäitet het. Zerst isch er für e Däilrewision vom Bundesverdraag gsi, wo das nid gange isch, het er sich, ooni groosse Erfolg, für sovil Föderalismus iigsetzt wie mööglig. Noch siibe Wuuche Aarbet isch dr Verfassigsentwurf fertig gsi. D Baasler Oobrikäit het dä diskutiert und iiri Empfäälige em Sarasii mitgee, wo dä zur Daagsatzig gfaare isch für d Abstimmig. Die mäiste vo sine Vorschleeg si abgläänt worde und am 27 Juni 1948 isch d Verfassig mit groossem Meer aagnoo worde. Wo s denn z Baasel zur Abstimmig cho isch, het sä dr Groossroot aagnoo mit 66 zu 5 vo 134 Rööt. Dr Suverään het d Vorlaag massiiv mit 1364 Joo gege 186 Näi guetghäisse.[1]
Kwelle
[ändere | Quälltäxt bearbeite]Fuessnoote
[ändere | Quälltäxt bearbeite]- ↑ Paul Burckhardt, «Basel und die Bundesverfassung von 1848», Basler Jahrbuch 1948, S. 100