Sumed-pyplyn
Die Sumed-pyplyn (Suez-Middellandse See-pyplyn) vervoer ru-olie bestem vir Europa van die Rooisee na die Middellandse See.
Hierdie pyplyn van 320 km strek van Ain Sukhna (55 km suid van Suez) aan die Golf van Suez noordweswaarts dwarsoor Egipte na Sedi Kerir by Alexandrië aan die Middellandse See. Tenkskepe vaar van die Persiese Golf deur die Rooisee na Ain Sokhna. Daar word ongeveer die helfte van die vrag uitgepomp in die pyplyn en na Sedi Kerir gepomp. Die halfgelaaide tenkskepe kan nou maklik deur die Suezkanaal vaar omdat hul diepgang met ‘n kleiner vrag baie minder is. By Sedi Kerir word die olie dan weer in die skepe gepomp.
Na die sluiting van die Suezkanaal weens die Sesdaagse Oorlog moes tenkskepe op pad na Europa die omweg via die Kaap die Goeie Hoop volg. Daarom is die pyplyn in die jare 1974 tot 1977 aangelê as alternatief vir die Suezkanaal.
Ongeveer eenvyfde van Europa se ru-olie word deur die pyplyn vervoer.
Die gebruik van die pyplyn beteken dat minder tenkskepe om Kaappunt vaar, wat die bedreiging van ‘n moontlike groot oliebesoedelingsramp aan die Suider-Afrikaanse kuste aansienlik verminder.
Bibliografie
[wysig | wysig bron]- sumed.org