Lega Nord
Lega Nord | |
Lega | |
Leier | Matteo Salvini |
---|---|
Gestig | 8 Januarie 1991 |
Hoofkwartier | Via Bellerio, 41 20161 Milaan, Lombardye |
Ideologie | Federalisme (met fiskale outonomie vir Italiaanse administratiewe geweste), Euroskeptisme, kritiese standpunte teen globalisering, Islamisering en immigrasie |
Amptelike kleure | Groen |
Webblad | www.leganord.org |
![](http://upload.wikimedia.org/wikipedia/commons/thumb/a/a5/Matteo_Salvini_Viminale_crop.jpg/170px-Matteo_Salvini_Viminale_crop.jpg)
![](http://upload.wikimedia.org/wikipedia/commons/thumb/e/ef/Il_Carroccio_durante_la_sfilata_del_Palio_di_Legnano_2015.jpg/170px-Il_Carroccio_durante_la_sfilata_del_Palio_di_Legnano_2015.jpg)
Lega Nord (Italiaans: Noordelike Liga, ook bekend as Lega; volledige naam: Lega Nord per l’indipendenza della Padania) is 'n politieke party (volgens sy eie beskouing politieke massabeweging) in Italië, gestig in 1991. Aanvanklik was die party hoofsaaklik in die noorde van Italië aktief waar dit vir die onafhanklikwording van welvarende Noord-Italiaanse streke (as fiktiewe gewes Padanië[1]) en beperkings op immigrasie gepleit het.
In sy beginjare het lede en aanhangers histories-politieke pelgrimstogte na die bron van die Porivier onderneem wat aan die voet van die Piëmontese bergpiek Monte Viso geleë is. In Italiaanse media is na die Lega Nord dikwels verwys as Partito del Carroccio. Die caroccio was 'n groot ossewa wat deur die Middeleeuse Italiaanse stadstate en republieke tydens triomfoptogte gebruik is en in Noord-Italië steeds as 'n simbool van stedelike onafhanklikheid beskou word. 'n Ridder met getrokke swaard was deel van hierdie simboliek. Hy herinner aan die Lombardiese Liga se oorwinning oor die magte van keiser Frederik Barbarossa in die 12de eeu en versinnebeeld die stryd teen vreemde oorheersing.
Intussen beskou die Lega homself as 'n party met 'n program vir die hele Italië. Met die algemene verkiesing van 2018 het dit sy naam in ooreenstemming met hierdie beleid vir die nasionale verkiesingsveldtog verander na Lega. Ná 'n aantal omwentelinge in die politieke stelsel van Italië met ontbindings, samesmeltings en die stigting van nuwe partye binne alle politieke strominge is Lega Nord die oudste groot party wat steeds aktief is. Sy ledetal beloop meer as 100 000[2]. Die huidige partyleier is Matteo Salvini.
Tans is die Lega op pad om Italië se grootste volksparty te word. Twee van Italië se welvarendste en ekonomies voorste nywerheidstreke, Lombardye en Veneto, word deur die Lega Nord geregeer. In die Europese verkiesing op 26 Mei 2019 het die Lega meer as 34 persent van die uitgebragte stemme op hom verenig. Baie van sy kiesers is voormalige aanhangers van Italië se kommunistiese party - 'n feit wat deur buitelandse waarnemers, wat die party as "ver-regs" bestempel, dikwels verswyg word.
Verwysings
[wysig | wysig bron]Eksterne skakels
[wysig | wysig bron]Wikimedia Commons het meer media in die kategorie Lega Nord.
- (en) leganord.org - Die party se amptelike webwerf