Lakeview
Lakeview | |
---|---|
Koördinate: 26°13′30″S 28°01′30″O / 26.22500°S 28.02500°O | |
Land | ![]() |
Provinsie | Gauteng |
Munisipaliteit | Stad Johannesburg |
Hoofplek | Johannesburg |
Oppervlak | |
• Totaal | 0,04 km2 (0,02 vk. myl) |
Lakeview is ’n voorstad van Johannesburg, sowat 2,7 km suidwes van die stadsaal geleë.
![](http://upload.wikimedia.org/wikipedia/af/thumb/8/89/Straatplan_van_Johannesburg%2C_1929%2C_detail_Lakeview.jpg/280px-Straatplan_van_Johannesburg%2C_1929%2C_detail_Lakeview.jpg)
Die voorstad, wat net 0,04 km² beslaan, grens in die ooste en suide aan Ophirton. In die suide vorm Springstraat die grens en in die weste Wendellstraat en aan die oorkant ’n onbeboude stuk van die plaas Turffontein. Lakeview is nou uitsluitlik ’n nywerheidsbuurt, maar vroeër jare was dit ook ’n woongebied, want in 1934 was hier 87 munisipale kiesers, van wie 42 Afrikaans- en 45 Engelssprekend was. In 1949 was dit 11 Afrikaans en 10 Engels, maar teen 1961 het die inwoners verder afgeneem, want toe het net vier Afrikaans- en twee Engelssprekende kiesers oorgebly. Die skilder W.H. Coetzer se gesin het 'n ruk lank hier gewoon toe hy klein was.
Lakeview is in 1903 op ’n gedeelte van die Ophirton-landgoed uitgelê. Die naam is afgelei van die voorstad se ligging naby die Ophirtonmeer. Aangesien dit so klein is, word Lakeview nie vir sensusdoeleindes afsonderlik getel nie. Dit strek net sowat 700 m van suidwes tot noordoos en van noordwes tot suidoos skaars 80 m.
Bronne
[wysig | wysig bron]- (en) Raper, Peter Edmund. 2004. New Dictionary of South African Place Names. Johannesburg & Cape Town: Jonathan Ball Publishers
- (af) Stals, prof. dr. E.L.P (red.). 1978. Afrikaners in die Goudstad. Deel 1. 1886 - 1924. Kaapstad en Pretoria: HAUM.