Finale Oplossing
![](http://upload.wikimedia.org/wikipedia/commons/thumb/4/47/Heydrich-Endlosung.jpg/200px-Heydrich-Endlosung.jpg)
Die Finale Oplossing tot die Joodse Vraag (Duits: Die Endlösung der Judenfrage) verwys na die Nasionaal-Sosialiste se plan vir die stelselmatige volksmoord van die Europese Joodse bevolking tydens die Tweede Wêreldoorlog. Die term is die eerste keer deur Adolf Eichmann gebruik. Hy was 'n hoë Nazi-amptenaar wat toesig gehou het oor die volksmoordveldtog en gevang, vervolg en ter dood veroordeel is deur die Israelse regering in 1961-62. Die uitvoering van die Finale Oplossing het die dodelikste fase van die Sjoa tot gevolg gehad. Die uitdrukking weerspieël die Nazi-geloof dat die Joodse Europese bevolking hulself 'n "vraag" gestel het en 'n probleem was.
Massamoorde van oor die 1 miljoen Jode het reeds plaasgevind voor die planne van die Finale Oplossing ter uitvoering gebring is in 1942, maar dit was slegs met dié besluit om die hele Joodse bevolking uit te wis dat verdelgingskampe gebou is en die industriële massamoord van die Jode in alle werklikheid begin het. Die besluit om die Jode van Europa stelselmatig uit te wis, is gemaak tydens die Wannsee-konferensie, wat in Berlyn by die Wannsee Villa op 20 Januarie, 1942 plaasgevind het. Tydens die konferensie het daar 'n bespreking plaasgevind tussen 'n groep Nazi-amptenare om te besluit oor die "Finale Oplossing tot die Joodse Vraag". Die rekords en notule van die vergadering is deur die Geallieerdes aan die einde van die oorlog gevind, en het as kosbare bewyse gedien tydens die Neurenberg-verhore. Teen die lente van 1942 het Operasie Reinhard met die stelselmatige uitmoring van die Jode begin, alhoewel honderdduisende reeds vermoor was in ander gevalle van Jodevervolging. In Heinrich Himmler se toespraak by die Posen-konferensie op 6 Oktober, 1943 het Himmler vir die eerste keer eksplisiet aan die versamelde leiers van die Reich, in onomwonde en brutale terme, verduidelik waarna die "Finale Oplossing" eintlik verwys.
Notas
[wysig | wysig bron]- ↑ Sien die vertaling van die brief Geargiveer 2 November 2012 op Wayback Machine by die Memorial House of the Wannsee Conference se webwerf.
Bronne
[wysig | wysig bron]- Browning, Christopher R. The Origins of the Final Solution, William Heinemann, London, 2004.
- Christian Gerlach. The Wannsee Conference, the Fate of German Jews, and Hitler's decision in principle to exterminate all European Jews, The Journal of Modern History. Chicago: Dec 1998.Vol.70, Iss. 4; pg. 759, 54 pgs
- Baumslag, Naomi. Murderous Medicine – Nazi Doctors, Human Experimentation, and Typhus, Praeger Publishers, (an imprint of Greenwood Publishing Group, Inc.), 2005. ISBN 0-275-98312-9