Altaigebergte
![](http://upload.wikimedia.org/wikipedia/commons/thumb/f/f1/Altai_Mountains.jpg/220px-Altai_Mountains.jpg)
![](http://upload.wikimedia.org/wikipedia/commons/thumb/f/f3/Altay_Mountains.500m.jpg/220px-Altay_Mountains.500m.jpg)
![](http://upload.wikimedia.org/wikipedia/commons/thumb/0/07/Altai%2C_Tienschan-Orte.png/220px-Altai%2C_Tienschan-Orte.png)
Die Altaigebergte is 'n bergreeks tussen Noord-, Oos- en Sentraal-Asië, waar Rusland, die Volksrepubliek China, Mongolië en Kasakstan ontmoet, en waar die riviere Irtisj en Ob ontspring. Die bergmassief gaan in die noordooste na die Sajangebergte oor, en word in die suidooste geleidelik laer, waar dit die hoë plato van die Gobiwoestyn ontmoet. Dit streek van 45° tot 52° N en van 84° tot 99° O. Die Goue Berge van Altai is in 1998 deur Unesco as 'n wêrelderfenisgebied gelys.
Die Altaigebergte is yl bevolk, maar beskik oor 'n etnies diverse bevolking, met etniese groepe soos Russe, Kasakke, Altai en Mongole. Die plaaslike ekonomie is gebaseer op veeteelt van onder meer beeste, skape en perde, landbou, bosbou en mynbou. Die voorgestelde en omstrede Altaïese taalfamilie is na hierdie bergreeks genoem. Daarbenewens is die Russiese deelrepubliek Altai na die Altaigebergte genoem.
Die Altaigebergte word Altain nuruu (Алтайн нуруу) in Khalkha-Mongools, altai-yin niruɣu in Chakhar-Mongools en Altay tuular (Алтай туулар) in Altaïes genoem. Dit word ook Altaı taýlary (Алтай таулары of التاي تاۋلارى) in Kasaks; Altajskije gory (Алтайские горы) in Russies; Altay Taghliri (ئالتاي تاغلىرى of Алтай Тағлири) in Oeigoers; ā'ěrtài shānmài in Chinees (阿尔泰山脉 Vereenvoudigde Chinees, 阿爾泰山脈 Tradisionele Chinees, of اَعَرتَىْ شًامَىْ in Xiao'erjing); en Arteː shanmeː (Артэ Шанмэ) in Dungaans genoem.
Die naam is afgelei van die woord alt vir "goud" in Mongoolse tale en die agtervoegsel -tai vir "met"; dié naam beteken dus "berge met goud". Dit stem ooreen met die ou Chinese naam 金山 "Goudberge". In Turkse tale is die woord vir "goud" altın.
Galery
[wysig | wysig bron]-
Sononder oor Kucherlameer in die Altaigebergte
-
Die berg Beloecha in die Altaigebergte
-
Die berg Beloecha in die Altaigebergte
-
Die Altaigebergte in Kasakstan
-
Die Altaigebergte in Kasakstan
-
Markakolreservaat in die Altaigebergte, Kasakstan
-
Katoenrivier in die Altaigebergte, Rusland
-
Koetsjerlavallei in die Altaigebergte, Rusland
Bron
[wysig | wysig bron]- (en) Hierdie artikel maak gebruik van feite en teks uit die Encyclopædia Britannica van 1911. Die bron is in die publieke domein.
Eksterne skakels
[wysig | wysig bron]Wikimedia Commons het meer media in die kategorie Altaigebergte.
- (en) "Altai Mountains". Encyclopædia Britannica. Besoek op 3 Augustus 2019.
Hierdie artikel is in sy geheel of gedeeltelik vanuit die Engelse Wikipedia vertaal. |