第26屆泰國眾議院選舉
第26屆泰國眾議院選舉
| |||||||||||
---|---|---|---|---|---|---|---|---|---|---|---|
‹ 2014 • ![]() | |||||||||||
2019年3月24號 | |||||||||||
選舉類型 | 眾議院 | ||||||||||
選舉制度 | 比例代表制 | ||||||||||
![]() 泰國首相 | |||||||||||
第26屆泰國眾議院選舉響2019年3月24號舉行[1]。
巴育響公投通過新憲法草案之後,第一次講保證泰國會響出年十一月舉行大選,呼籲要對政治進程有信心。
背景
[編輯]巴育召開內閣會議,傾完公投結果就指示官員要繼續同公眾解釋新憲法內容同跟住落嚟嘅安排。外界一直都估,軍政府可能會將選舉推遲到2018年先搞。軍方自從響2014年政變,推翻前總理英祿之後,就應承會恢復民主選舉,但係一直都未提出確實時間。
而新憲法最受爭議嘅地方,就係上議院全部改做軍方委任,而且擴充權力,畀上議院推舉同無限次彈劾總理人選。反對嘅人就認為咁樣做係延續咗軍方響政府嘅影響力。
2017年1月13號,泰國國民議會投票決定,按照泰王哇集拉隆功要求,修改新憲法草案部分內容,而投票結果以大比數支持通過,所以原定嗰年年底舉行嘅大選可能要推遲。總理巴育早幾日話,國王要求修改憲法草案有關王權嘅內容,政府已經應承。外國通訊社分析認為,泰王插手國家政治罕見[2]。
2017年4月6號,泰國國王哇集拉隆功簽署新憲法,簽署後交畀總理巴育,內閣秘書處之後宣讀正式實施新憲法公告,鳴放廿一響禮炮。新憲法生效後,按照巴育政府承諾嘅政治路線圖,泰國原定響同年年底依據新憲法舉行2014年政變以來嘅首次大選,但事前需要經泰國制憲委員會完成四部同選舉相關嘅法律重要送交到立法議會審核通過。據制憲委員會主席米猜推算,泰國大選最快可能會響2018年下半年舉行[3];今次新憲法規定參議院所有議席由委任產生,部分席位由軍人出任;眾議院選舉就由混合制改做比例代表制,削弱主流兩黨制形成,被外界批評係民主倒退,目的係要為軍方鞏固政治權力鋪路。
2017年10月10號,巴育宣布泰國將響2018年11月舉行大選,而確實舉行日期要到2018年6月先公布。呢次係巴育2014年發動軍事政變上台以來,一直以需要修憲同安全等問題做理由拖延舉行大選,今次係佢首次明確交代大選日期[4]。
2018年3月25號,泰國一批學生領袖發起示威,從國立法政大學遊行到皇家軍隊總部,有三百人左右響應出嚟。佢哋要求軍方唔好再支持巴育軍政府,又呼籲國家和平秩序委員會按照之前承諾,喺11月舉行全國大選;之後政府發言人引述巴育講話,如果社會出現越來越多示威,大選好難響動盪嘅情況下如期舉行,即係當局威脅再推遲2019年2月搞嘅大選[5]。
民意調查
[編輯]首相人選入面,民望最高係依家嘅軍頭首相巴育,排第二嘅係為泰黨嘅人選。
但係國會支持度入面,就以為泰黨最高,第二先係支持巴育嘅公民力量黨,民主黨排第三,新成立嘅未來前進黨排第四。
分析
[編輯]選前
[編輯]泰國軍方響2014年發動政變奪權,國家和平秩序委員會主席巴育多次承諾會舉行大選,最初宣布響2015年搞,但係佢之後響聯合國大會同訪問白宮嗰陣,又兩次公布舉行大選嘅時間,但係兩次都兌現唔到。2017年10月佢預計大選日期響2018年11月舉行,但係因國會修改憲法搞到大選時間又推遲到2019年2月先搞[5]。最後選舉日期定喺3月24號。
結果
[編輯]初步結果顯示為泰黨一如民調所料,攞到眾議院最多議席,支持軍頭總理巴育嘅公民力量黨就緊隨其後,新成立嘅未來前進黨成績亮眼,議席數目居然超過老牌政黨民主黨。但係真正嘅結果要喺5月先會公佈。
攷
[編輯]- ↑ (繁體中文)泰軍政府宣布明年十一月大選,now新聞,2016年8月9號。
- ↑ (繁體中文)泰國國會決定修改憲法草案 原定年底大選或推遲,香港電台,響2017年1月13號搵到。
- ↑ (繁體中文)泰國國王簽署新憲法 料最快於明年下半年大選,香港電台,響2017年1月13號搵到。
- ↑ (繁體中文)泰國總理巴育宣布明年十一月舉行大選,now新聞,2017年10月10號。
- ↑ 5.0 5.1 (繁體中文)泰民眾示威冀軍方不再支持巴育,now新聞,2018年3月26號。