流動電話遊戲
![](http://upload.wikimedia.org/wikipedia/zh-yue/thumb/e/e8/Pokemon.png/240px-Pokemon.png)
流動電話遊戲(英文:Mobile Game),又叫手機遊戲(簡稱手遊),係指運行喺智能電話上面嘅遊戲軟件。目前用嚟編寫流動電話程序最多嘅係Java程式語言,其次係C程式語言。
例如喺 2010 年代尾風靡全球嘅 AR 遊戲 Pokémon GO 就係一隻好出名嘅手遊:呢隻遊戲唔係直接將《寵物小精靈》擺落去手機度咁簡單,而係用咗手機先至做到嘅功能-畀玩家攞嚟攞去-嚟配合全球定位系統,達致畀用家喺現實世界嘅唔同位置度「捉寵物小精靈」;呢隻遊戲嘅創新取得咗重大嘅成功,仲吸引到研究者做研究,睇吓(例如)玩 Pokémon GO 可以點樣用嚟鼓勵啲人多啲郁動。
發展
[編輯]由於大多數早期手提電話嘅機能所限,流動電話遊戲普遍比較簡單,畫面亦比較粗糙,更唔好講操作性啦(事實上,好少有手提電話嘅鍵盤適合玩遊戲)。因此,益智類遊戲(例如俄羅斯方塊、貪食蛇、推箱等)係常見嘅遊戲類型。目前由於智能電話、平板電腦等設備發展,電話處理信息嘅能力增強,逐漸出現咗更大畫面、更加複雜嘅流動電話遊戲。
另外,流動電話遊戲嘅銷售模式亦係個問題。雖然通過冇物理介質嘅網上商店或者GPRS下載可以節省成本,不過盜版仍然係個棘手嘅問題。為此,有啲廠商諗出咗將在線內容同本地內容捆綁嘅主意,玩家要在線激活先可以玩到完整嘅遊戲。
有唔少電子遊戲設計領域相關嘅工作者指,手機遊戲呢種新嘅遊戲類型,為遊戲設計帶嚟咗新嘅啟示,例如手機遊戲嘅一大特徵係唔似得電腦遊戲或者遊戲機遊戲有咁多掣畀玩家撳,所以一隻手機遊戲嘅操作系統唔可以太過複雜,於是就引起咗係噉跑遊戲(endless runner)等嘅創新-係噉跑遊戲係一種遊戲類型,特徵係唔使玩家控制主角前後郁,主角都會係噉向前跑,玩家淨係需要控制主角左右郁避開啲障礙物,例如 2011 年出嘅《Temple Run》就係噉。係噉跑遊戲呢種遊戲少咗「向前郁」同「向後郁」兩個掣,自然操作方式簡單咗,被指零舍適合攞嚟做手機遊戲[1]。
編寫
[編輯]目前最流行嘅流動電話遊戲程序語言係Java。由於大多數嘅流動電話都內置咗Java嘅運行環境,加上Java語言自身嘅跨平台特性,Java成為咗編寫流動電話遊戲嗰陣最常使用嘅語言之一。用於喺流動電話上運行喺Java一般按照J2ME標準進行編程。