天鵝湖
《天鵝湖》(粵拼:tin1 ngo4 wu4)係一齣古典芭蕾舞劇,作曲嘅係俄羅斯作曲家柴可夫斯基[1]。齣劇首演於 1877 年,係由俄羅斯嘅波修瓦劇院演嘅[2][3]。
《天鵝湖》取材自俄羅斯嘅一個民間故事,講述悲劇公主奧德特嘅故仔:多數版本嘅《天鵝湖》有三至四幕,第一幕講生得靚仔、但唔成熟嘅王子齊格佛列德開舞會慶祝生日,喺舞會當中俾佢母后催佢結婚;齊格佛列德因為覺得自己冇得自由戀愛唔開心,就決定同朋友去湖邊打獵散吓心;第二幕講王子去到湖邊,爭啲想搵箭射隻天鵝嗰陣,見到嗰隻天鵝變咗做公主奧德特,得知奧德特受邪惡魔法師羅夫巴特詛咒,變成天鵝,喺某啲時間先可以變返做人身,兩個人跟住仲鍾意咗對方;喺跟住落嚟嗰一至兩幕當中,羅夫巴特會嘗試阻礙兩個人嘅戀情,而最後結局就視版本而定-有啲版本大團圓結局,講齊格佛列德同奧德特最後合力打低羅夫巴特解開詛咒,又有啲版本係悲劇收場,講奧德特最後俾羅夫巴特捉走[4][5]。
喺編舞方面,《天鵝湖》會有齊格佛列德做嘅變奏舞(第一幕基本上實有)同埋奧德特做嘅變奏舞(第二幕基本上實有)... 等,而且喺第二幕當中,通常仲會有班配角女舞蹈員團隊跳舞,著起白色嘅裙扮演小天鵝,呢班女舞蹈員跳嘅就係好出名嘅小天鵝之舞[6]。
《天鵝湖》初頭有唔少波折:齣劇初頭評語麻麻哋;打後喺 19 世紀尾柴可夫斯基過咗身之後,有編舞家將齣劇攞去重製同改編,跟住喺 1895 年上演嗰個版本就大受歡迎。時至今日,《天鵝湖》經已係世上其中一齣最出名、最常俾人攞嚟返炒嘅芭蕾舞劇,同《合桃鉗》以及《睡公主》一齊俾人列咗做柴可夫斯基嘅三大芭蕾舞曲傑作[4][7]。
嗌法
[編輯]《天鵝湖》喺各語言入邊嘅名:
角色
[編輯]- 奧德特公主(Princess Odette),又有叫天鵝公主(Swan Princess)或者白天鵝(White Swan):受詛咒而變成咗天鵝嘅靚女公主。
- 齊格佛列德王子(Prince Siegfried):渴求自由戀愛、鍾意咗奧德特嘅靚仔王子。
- 羅夫巴特男爵(Baron Von Rothbart):對奧德特落咒嘅邪惡魔法師。
- 奧迪妮(Odile),又有叫黑天鵝(Black Swan):羅夫巴特個女,協助羅夫巴特阻礙奧德特同齊格佛列德嘅戀情;有假扮成奧德特,不過就著住黑色裙,對應著住白色裙嘅奧德特。
- 班勞(Benno von Sommerstern):王子個朋友。
- 女王(The Queen):王子阿媽,因為希望王子成熟啲而係噉催佢結婚。
- 胡夫剛(Wolfgang):王子個老師。
- 王子班朋友、出席王子生日舞會嘅平民同其他賓客、陪同奧德特嘅一眾小天鵝(cygnets)、以及出席舞會嘅貴族
... 等等。
故仔大綱
[編輯]《天鵝湖》一般會分四幕四景(東歐以外)或者三幕四景(包括俄羅斯在內嘅東歐),結局有兩大可能性:《天鵝湖》本嚟係悲劇收場嘅,但有唔少版本將個結局改做開心嘅大團圓結局[4]。
序幕:落咒
[編輯]唔少版本嘅《天鵝湖》會有序幕,通常係展示奧德特公主遇上邪惡魔法師羅夫巴特,俾佢詛咒變成天鵝[8]。
第一幕:生日
[編輯]- 背景:皇宮前一座華麗嘅庭院
(Scène: Allegro giusto)齊格佛列德王子喺度同佢老師、朋友同埋一班平民搞佢嘅生日舞會(Waltz: Tempo di valse)。正當眾人都玩得好開心之際,女王出場,女王覺得佢個仔成日淨係掛住玩,唔得成熟,於是就開口,叫齊格佛列德要喺跟住落嚟嘅皇宮晚會度揀一個女人結婚(Scène: Allegro moderato [註 1])。
女王走咗之後,齊格佛列德有啲唔開心,覺得自己冇得自由噉談戀愛。王子個朋友班勞同王子個老師胡夫剛見狀,就諗住做返啲嘢等齊格佛列德開心返。咁啱到咗黃昏嗰時(Sujet),班勞見到有群天鵝喺天上面飛過,就提議佢哋一齊去打獵散吓心(Finale I)。於是佢哋就攞埋弩等嘅架生,出發去打獵[2]。
第二幕:湖邊
[編輯]- 背景:明月映照嘅夜晚,森林深處嘅一個湖畔,隔離有座荒廢咗嘅小聖堂
打打吓獵,齊格佛列德同佢啲朋友走散咗。佢嚟到湖畔,見到有群天鵝喺湖度降落(Scène: Moderato)。齊格佛列德於是攞起把弩,瞄準想射隻天鵝(Scène: Allegro moderato),但喺下一刻隻天鵝就變身-變成生得好靚女嘅奧德特公主(Scène: Moderato)。奧德特一見到齊格佛列德把弩對住佢,第一個反應係好驚,但齊格佛列德見狀即刻掉低把弩,應承唔會傷害奧德特。跟住奧德特就向齊格佛列德解釋成件事係點:奧德特同佢班同伴因為俾邪惡魔法師羅夫巴特詛咒,日頭嗰陣會變成天鵝,要等到夜晚喺有魔咒嘅湖畔度先至可以化返做人身[註 2];破解詛咒嘅方法只有一個-要有個從來未談過戀愛嘅人發誓永遠愛奧德特。
喺呢個時候,羅夫巴特突然間現身(Scène: Allegro vivo),齊格佛列德想對羅夫巴特郁手,但奧德特阻止佢-如果羅夫巴特死咗,個咒就會永遠解唔到[2]。
![](http://upload.wikimedia.org/wikipedia/commons/thumb/5/5a/Swanlake014.jpg/450px-Swanlake014.jpg)
羅夫巴特消失咗之後,奧德特同佢班同伴喺湖邊唞涼(Scène: Allegro, Moderato assai quasi andante)。望住班天鵝嘅齊格佛列德一嘢打爛佢把弩,佢仲同奧德特互相鍾意咗對方。堅信自己搵到真愛嘅齊格佛列德暗中下定決心,想要得到奧德特嘅信任,幫佢解咒。過咗冇幾耐,天光,奧德特同佢嘅同伴變返做天鵝,焗住要返去湖度[2]。
第三幕:舞會
[編輯]- 背景:皇宮嘅舞殿
(Entrance of the Guests and Waltz)到咗皇宮開舞會嘅日子。皇宮嘅舞殿迫滿嗮賓客。女王請咗六位公主嚟出席,想佢個仔揀一個做老婆,唔知佢個仔已經心有所屬。
舞會進行途中,羅夫巴特喬裝扮成賓客,仲帶住佢個女奧迪妮(個樣變到同奧德特一樣)到場(Scène: Allegro, Allegro giusto)。六位公主嘗試跳舞吸引齊格佛列德嘅注意(Pas de six),但齊格佛列德成個腦都淨係得奧德特,留意住奧迪妮(Scène: Allegro, Tempo di valse, Allegro vivo)[註 3]。齊格佛列德諗住奧迪妮就係奧德特,走上前去請奧迪妮跳舞,跳完之後佢仲向在座嘅人宣布話想同奧迪妮結婚。
羅夫巴特同奧迪妮大笑。心知不妙嘅齊格佛列德跟住就快馬趕去湖嗰度[4]。
![](http://upload.wikimedia.org/wikipedia/commons/thumb/7/7a/Swanlake005.jpg/450px-Swanlake005.jpg)
第四幕:終結
[編輯]- 背景:湖畔
奧德特同佢班同伴好唔開心。齊格佛列德趕到嚟湖邊,即刻係噉向奧德特道歉。奧德特唔怪佢,但而家個咒解唔到。
跟住落嚟發生咩事就視版本而定:喺悲劇收場版當中,奧德特唔想再做天鵝,於是選擇自殺,深愛奧德特嘅齊格佛列德聽到,就選擇陪佢一齊跳入湖嗰度死。此舉跟住就打破咗羅夫巴特嘅魔法,令到奧德特啲同伴變返做人類,而羅夫巴特就死亡;最後嗰段會係奧德特班同伴望住齊格佛列德同奧德特一齊升上天堂,永遠喺愛當中團聚[4]。
![](http://upload.wikimedia.org/wikipedia/commons/thumb/a/a9/KC_Ballet_BDPX9243-2_%2825041396961%29.jpg/450px-KC_Ballet_BDPX9243-2_%2825041396961%29.jpg)
原版大綱
[編輯]![](http://upload.wikimedia.org/wikipedia/commons/thumb/9/91/Swanlakedecor.jpg/300px-Swanlakedecor.jpg)
以下係 1877 年原版《天鵝湖》嘅大綱[9]:
第一幕:齊格佛列德同佢班朋友一齊喺度慶祝齊格佛列德嘅成年禮;女王喺呢個時候嚟到,叫齊格佛列德快啲結婚,想確保齊格佛列德唔會因為娶埋嗮啲來路不明嘅女人而令佢哋嘅家族蒙羞;女王仲話會搞個舞會,要齊格佛列德到時喺出席嘅貴族閨女當中揀個做老婆。成年禮後,齊格佛列德同佢朋友班勞見到天上有群天鵝飛過,決定去打獵。
第二幕:齊格佛列德同班勞一路跟住群天鵝去到湖邊,但跟跟吓群天鵝唔見咗;喺呢個時候,有個戴住皇冠嘅女人出現喺佢哋面前,個女人自稱叫奧德特,話自己係頭先嗰群天鵝嘅其中一隻,跟住就解釋成件事-奧德特嘅阿媽係一個善嘅仙子,佢嫁咗俾位騎士,奧德特阿媽過咗身之後,佢阿爸再娶;而奧德特個後抵乸係個女巫,想殺奧德特,但奧德特阿爺救返佢,帶奧德特嚟呢個(由佢嘅眼淚形成嘅)湖嗰度住。奧德特同佢嘅朋友有能力變身成天鵝,於是佢哋就喺個湖嗰度暫住,避開奧德特個後抵乸。根據奧德特話如果佢一結婚,女巫就唔會再有能力害佢。呢個時候,齊格佛列德話咁快已經鍾意咗奧德特話想同佢結婚,但奧德特驚女巫會傷害齊格佛列德,所以婉拒咗。
第三幕:女王搞舞會,一眾貴族閏女喺城堡嘅舞殿跳舞,想引王子齊格佛列德嘅注意,但齊格佛列德唔肯揀老婆;喺呢個時候,男爵羅夫巴特帶住佢個女奧迪妮到場,齊格佛列德覺得奧迪妮生得好似奧德特(但班勞唔係噉覺得),就開始同奧迪妮跳舞,對奧迪妮產生好感,最後仲宣布話想同奧迪妮結婚。喺嗰一刻,羅夫巴特變身成一隻邪靈,而奧迪妮就大笑,一隻戴住皇冠嘅天鵝出現喺窗外面;齊格佛列德嚇到跑咗去城堡外面。
第四幕:奧德特喊嗮口噉話俾佢班同伴知,齊格佛列德冇遵守愛嘅承諾;冇幾耐齊格佛列德嚟到湖邊,奧德特嘅同伴見到佢就想走,仲叫奧德特一齊走,但奧德特肯留低一陣見齊格佛列德最後一面;同一時間,個湖開始颳起風暴。齊格佛列德嚟到奧德特面前
最後個景係湖變返一片平靜,有一群天鵝降落喺湖水面。
原版 1877 年《天鵝湖》唔多受歡迎,好多人都覺得個故仔嘅結局有少少無厘頭,所以就有咗後嚟嘅改版[10][11]。
出名組曲
[編輯]- 《天鵝湖華爾茲》(Swan Lake Waltz)
睇埋
[編輯]註釋
[編輯]參考
[編輯]- G. Abraham, ed. Tchaikovsky: a Symposium (London, 1945/R, R 1970 as The Music of Tchaikovsky. London: W.W. Norton, 1974).
- C. W. Beaumont. The Ballet called Swan Lake (London, 1952).
- Brown, David. Tchaikovsky: The Man and His Music. London: Faber & Faber, 2006. 108–119.
- Brown, D. (1984). Tchaikovsky's Mazeppa. The Musical Times, 125(1702), 696-698.
- Norris, George. Stanford, the Cambridge Jubilee and Tchaikovsky (London, 1980).
- Nuzzo, Nancy B. "Swan Lake: a chronology; The sleeping beauty: a chronology; other Tchaikovsky ballets." Dance magazine, 55 (June 1981), 57–58.
- Pudelek, Janina. "Swan Lake" in Warsaw, 1900. Dance Chronicle, 13 (1990–1991): 359–36.
- Robinson, Harlow. "Review: Untitled." The Slavic and East European Journal, 31 (1987): 639–640.
- Wiley, Roland John. Tchaikovsky’s Ballets: Swan Lake, Sleeping Beauty, Nutcracker (Oxford, 1985, 2/1991).
引述
[編輯]- ↑ Chaĭkovskiĭ, Modest Ilʹich; Newmarch, Jeaffreson; Rosa Harriet (1906). The life & letters of Peter Ilich Tchaikovsky. J Lane. p. 735.
- ↑ 2.0 2.1 2.2 2.3 2.4 C. W. Beaumont. The Ballet called Swan Lake (London, 1952).
- ↑ Chaĭkovskiĭ, Modest Ilʹich; Newmarch, Jeaffreson; Rosa Harriet (1906). The life & letters of Peter Ilich Tchaikovsky. J Lane. p. 735.
- ↑ 4.0 4.1 4.2 4.3 4.4 4.5 All you need to know about Tchaikovsky's Swan Lake 互聯網檔案館嘅歸檔,歸檔日期2019年4月4號,.. Reader's Digest.
- ↑ Kant, Marion, ed. (2007). The Cambridge Companion to Ballet. Cambridge Companions to Music. Cambridge and New York: Cambridge University Press. p. 164. ISBN 978-0-521-53986-9.; 'Old style' date March 4.
- ↑ 4 Little Swans. National Public Radio's All Things Considered, May 13, 1997. "The dancers who perform that famous chorus line in Swan Lake always strive to look as though they're dancing as one unit. Jean Battey Lewis reports on the amusing ways dancers keep it all together, remember all the steps, and look just alike while visions of stardom dance in their heads. The American Ballet Theater is starting its season with several performances of Swan Lake this week."
- ↑ The Immortal Swan Lake 互聯網檔案館嘅歸檔,歸檔日期2019年4月4號,.. Dance Informa.
- ↑ Swan Lake 互聯網檔案館嘅歸檔,歸檔日期2019年7月2號,.. The Ballet Bag.
- ↑ Cohen, S. J. (1982). Next week, Swan Lake: reflections on dance and dances. Wesleyan University Press.
- ↑ History of Tchaikovsky's Swan Lake 互聯網檔案館嘅歸檔,歸檔日期2019年10月11號,..
- ↑ How Swan Lake Became the Greatest Ballet in the World 互聯網檔案館嘅歸檔,歸檔日期2019年10月11號,.. History Hit.
拎
[編輯]- 《天鵝湖》| 過往製作| 觀看港芭 (香港繁體),香港芭蕾舞團出咗篇文講到佢哋之前演過《天鵝湖》。
- 《BEN SIR 的童話交響:天鵝湖》 (香港繁體),歐陽偉豪同交響樂團演譯《天鵝湖》
- Tchaikovsky Research (英文),整體噉介紹《天鵝湖》呢齣芭蕾舞劇。
- Theatre / Swan Lake (英文),TV Tropes 講《天鵝湖》。
- Listening guide (英文),呢篇文討論《天鵝湖》啲組曲。
- YouTube 上面有唔少影片,紀錄咗一場一場嘅《天鵝湖》表演:
- 後台嘢:
- Swan Lake: From Planning to Performance at the Royal Opera House (英文),有講到皇家芭蕾舞團籌辦《天鵝湖》表演。
- Swan Lake choreography (英文),有講著名蘇聯芭蕾舞蹈員雷里耶夫對《天鵝湖》嘅一啲睇法。
- 影片:
- 《Swan Lake(2005) Murphy and Corella (ABT)》喺互聯網電影資料庫嘅資料(英文) .
- 《Lebedinoe ozero (Swan Lake)》喺互聯網電影資料庫嘅資料(英文) (1957).
- 《Schwanensee》喺互聯網電影資料庫嘅資料(英文) (1967).
- 《Matthew Bourne's Swan Lake》喺互聯網電影資料庫嘅資料(英文) (1996).
- 音樂:
- Swan Lake: Scores at the International Music Score Library Project (IMSLP).
- Free sheet music of Danse Napolitaine from Cantorion.org.