塔防遊戲

塔防遊戲taap3 fong4 jau4 hei3（英文：tower defense game）係源於 1980 年代嘅一種戰略遊戲，特色係強調防守自己陣地，通常（但唔一定）係即時嘅。一隻典型嘅塔防遊戲會有以下嘅機制：

• 玩家會由上空望到一笪地圖，當中有若干部份係玩家嘅陣地，玩家冇得擴張自己嘅陣地；
• 一場對局會分做若干浪（wave），每浪到嗰陣都會有一定量嘅敵人（可以由電腦或者另外一位玩家控制）對玩家陣地進行攻擊，呢啲敵人會嘗試衝破玩家嘅陣地或者攻擊陣地裏面嘅某一個地點（例如係一座塔噉）；
• 玩家要做嘅嘢係喺場對局開始打前或者中途喺陣地上設下各種嘅障礙物同埋陷阱，用呢啲障礙物或者陷阱擋截或者打低進犯嘅敵人（呢點係塔防遊戲嘅定義性特徵之一），呢啲障礙物或者陷阱可以受到敵人破壞，而玩家好多時都有能力「修理」甚至「強化」呢啲障礙物或者陷阱；
• 如果敵人進攻成功（破壞咗座塔或者成功越過陣地），就算玩家輸，而如果玩家成功噉將某個特定量嘅敵人冚唪唥擋住或者打低，或者成功噉保護個據點一段時間，就算玩家贏。

簡史

塔防遊戲出名嘅例子有 2009 年出嘅《植物大戰喪屍》（Plants vs. Zombies）。呢隻遊戲講玩家角色嘅花園俾喪屍侵襲，玩家要做嘅嘢就係喺花園嗰度種落一啲特殊嘅植物，例如係曉產生能量嘅太陽花、曉自爆殺死喪屍嘅地雷薯仔、同埋識射青荳嚟攻擊喪屍嘅青荳草呀噉，喺對局進行途中，喪屍會出現並且嘗試行入玩家角色嘅屋企，想要食玩家角色嘅腦，而玩家就要一路種低啲植物，靠呢啲植物嘅力量嚟打低喪屍，成功打低若干浪就算過到一關。