同性戀
性取向 |
---|
![]() |
分類 |
異性戀 · 同性戀(基 · 叻士) 男性向 · 女性向 · 雙性向 · 無性向 |
相關概念 |
雙性人 · 第三性 · 性別氣質 |
相關研究 |
生物學 · 性學 · 非異性戀 · 酷兒研究 · 金賽量表 · 動物界的同性性行為 |
法律 |
婚姻 · 民事結合 · 領養 · 㚻姦法 · 兵役 · 仇恨罪行 · 性小眾權利 |
![](http://upload.wikimedia.org/wikipedia/commons/thumb/0/0e/2011_TW-KHH_2nd_LGBT_Pride_DSC7323_%286181587842%29.jpg/220px-2011_TW-KHH_2nd_LGBT_Pride_DSC7323_%286181587842%29.jpg)
![](http://upload.wikimedia.org/wikipedia/commons/thumb/e/e6/Just_married_%289178119295%29.jpg/220px-Just_married_%289178119295%29.jpg)
同性戀又叫做同性向,係指對相同性別嘅人產生性吸引或愛慕嘅一種性取向。而有呢種性傾向嘅人,叫做同性戀者。同性戀有時亦可以用來描述同性性行為,即係指同性成員間發生嘅性行為,而唔理參與者嘅性取向係點。同佢相對嘅有異性戀、雙性向、無性向。
同性戀作為人類文明嘅一個組成部分,有悠久嘅歷史。但係直到19世紀嘅現代,呢種同性社會成員之間嘅行為同關係先至被認為係一種穩定嘅性取向。1869年,Karl-Maria Kertbeny喺一份反對普魯士反㚻姦法小冊子上面首先創造咗「Homosexual」一詞。1886年Richard Freiherr von Krafft-Ebing開始喺佢出版嘅書《性精神病態》(Psychopathia Sexualis)入邊用呢個詞。從Krafft-Ebing開始,同性戀開始變成一個研究同辯論嘅題目。但係有一種觀點就認為,同性戀作為一種現代概念,喺唔同時代有唔同嘅含義,係無辦法直接一一對應為現代嘅「同性戀」嘅。譬如古羅馬嘅「愛者」同「被愛者」嘅關係同現代嘅「同性戀」可能係唔同嘅。
同性戀曾經被病理學認為係有得醫嘅,但現代就將佢放喺生物學、心理學、政治學、基因學、歷史學同埋性行為以及性認同嘅多元文化呢個更大範圍上來研究。
詞源學
[編輯]歐洲
[編輯]單詞「Homosexual」(同性戀)來自希臘文嘅前綴「homo-」(相同嘅)同埋詞根「sex-」(性)。最早喺出版物用呢個單詞嘅係Karl-Maria Kertbeny。19世紀末,德意志帝國頒佈新憲法,當中嘅143條(之前為175條)規定對發生男性同性性行為嘅人判監一到四年。Karl Maria Kertbeny以匿名寫文批評並抵制呢部法令,並首次創出單詞「Homosexuality」,用來替代當時廣泛使用嘅帶有貶義色彩嘅「Pederast」(有譯作「㚻姦者」)一詞。之後,Richard Freiherr von Krafft-Ebing響佢1886年寫嘅一本書《性精神病態》,進一步討論同埋用呢個單詞。而19世紀嘅精神學通過根據個人性格來分類嘅傳統,亦都令「同性戀」呢個概念不斷被豐富並最終發展出「性取向」呢個概念。喺今日,西方好多語言都有從「Homosexual」衍生出來嘅單詞。而響英文當中,由於「Homosexuality」呢個單詞根源於精神病學,並且係非常正規嘅表達,所以好多同志都唔接受被叫做「Homosexuals」,而更鍾意用另外一個已經廣泛使用嘅單詞「Gay」。而呢個單詞,亦係粵語指稱同性戀嘅一個詞源。
「Gay」本身係一個隱諱語,原來嘅意思係「感覺快樂嘅」,「令人高興嘅」。19世紀,妓女開始被戲稱為「Gay women」,與此同時社會上將嗰啲游手好閑嘅花花公子稱為「Gay」。20世紀初,美國嘅部分同性戀者開始用「Gay」呢個詞作為自己自身嘅標簽,以區別響病理同臨床上被廣泛使用嘅單詞「Homosexual」。到咗20世紀60、70年代,美國同性戀團體強烈要求各個媒體喺報道同播放涉及同性戀消息嘅時候用「Gay」替代「Homosexual」。作為回應,「Gay」呢個單詞先至開始逐漸被媒體接受同使用。但實際上,呢個係一個好漫長嘅過程。譬如一直到1989年,美國主流媒體之一嘅《紐約時報》先至最終接受Gay呢個詞。
響西方,而家一般用「Lesbian」來稱呼女同性戀者。呢個單詞源於古希臘一個小島嘅名「Lesbos」。呢個小島位於愛琴海、土耳其西北部沿岸附近,多石山,係伊奧利亞人嘅一個重要居住地。公元前7世紀,Lesbos島以抒情詩人聞名,響呢啲詩人當中,最出名嘅係女同性戀詩人薩福(Sappho)。「Lesbian」本來係指居住喺呢個島上邊嘅人,但係響薩福以後,「Lesbian」呢個詞有咗新嘅注解。19世紀末,醫學界開始用「Lesbian」去指同薩福有同樣性取向嘅女性。由嗰陣時開始,「Lesbian」開始包含女性同性戀嘅含義,開始被廣泛應用。
中華
[編輯]古
[編輯]漢字古文獻之中,似乎無直接指「同性戀」嘅用語,往往只見隱晦表達。
形容男嘅,有:
- 「斷袖」:語出《漢書·佞幸傳》。漢哀帝同董賢訓覺,董然賢壓住咗皇帝嘅袖,皇帝唔忍心嘈醒佢,斷袖而起;
- 「龍陽」:《戰國策·魏策》入邊記載龍陽君係魏王拂枕席;
- 「餘桃」、「分桃」:《韓非子.說難》有段故提到彌子瑕同衛靈公分桃而食。[1]
講女嘅,有:
- 「磨鏡黨」:《清稗類鈔》第38卷《洪奶奶與婦女暱》記載清代上海花街柳巷有班俾人噉樣俗稱嘅人,據講「磨鏡」用來借喻兩女互磨陰唇性交——兩個女性器官互動,睇落傍得一個同塊鏡度嘅影像摩擦相似;[2][3]
- 「對食」(多義):古時用來指宮女之間或宮女同宦官相戀,結成夫婦。[4]
重有啲帶地理特色嘅用詞,譬如:
- 「男風」(因為男同性戀盛行於南方,所以亦寫作「南風」。)、「走旱路」等等都係婉指男同性戀現象;[未記出處或冇根據]
- 古代閩南語有「挨石磨」、「石磨仔」……帶女同性戀相關意思嘅詞語。[5]
今
[編輯]響現代中文口語入邊,經常用「同志」來稱呼同性戀者(但係喺正式場合下,呢個詞嘅原意唔變)。另外重有粵語從英文單詞「Gay」吸收嘅稱謂「基」、「基佬」,但係呢個詞通常有唔好嘅意思。中國大陸照住「gay」同「基佬」,創造出「給」、「給佬」嘅稱謂,主要流行於新浪微博等後生仔聚集嘅網絡平台。帶有貶損意義嘅單詞重有譬如「玻璃」、「兔子」等。喺一啲地區嘅方言入邊,重會將男同性戀者叫做「飄飄」。另外,因為李安嘅電影《斷背山》奪得奧斯卡後,「斷背」亦開始用來稱呼同性戀者。香港亦有人喺互聯網上面用「hehe」[兩個英詞「he」(男性「渠」嘅意思)疊埋]指男性同戀。而隨著網絡同埋同性戀酒吧嘅出現,更多嘅中文詞彙喺同性戀社區出現。呢啲詞彙通常係非同性戀社區嘅人唔知嘅。譬如喺台灣,Motss(Member Of The Same Sex)通常使用響BBS上邊。
喺女同志當中,「頂」或者「T」係指特質傾向於陽剛,或鍾意作男性化/中性化裝扮者(「T」來自英文嘅 Tomboy,但「Tomboy」嘅本義並冇同性戀嘅意思);「底」或者「P」指裝扮、行為、氣質陰柔嘅女同志(又稱為婆)。台灣女同志文化中嘅T/P之分,相當於西方嘅Butch/Femme。「婆」呢個詞在最早是相對於T而來,指「T嘅老婆」。但近年來,婆嘅主體性已經逐漸浮現,用以泛指氣質較陰柔者。Uncle指年長嘅人;呢個詞起源於1960年代,係女同志用來對長輩嘅尊稱。喺中文入邊就稱呼「哥」,例如「張哥」、「金哥」。至於「拉子」、「拉拉」或「蕾絲邊」指女同性戀者(由 Lesbian 諧音而來),最早出現喺台灣作家邱妙津嘅女同志小說《鱷魚手記》入邊,於1990年代開始喺台灣流行。
而男同志亦有一套名詞同埋用語。例如台灣同志文化術語裏面比較普遍嘅用語係「C貨」,係由英語「Sissy」同埋「Nancy」衍生出來,指氣質陰柔嘅男同志。Macho Queen(金剛芭比)指外貌非常陽剛,身型健壯,但隱約有陰柔特質或動作同埋諗法嘅男同志。另外,類似女同性戀者嘅「T」同「P」,台灣男同戀者一般亦分為「哥」(普通亦稱為「葛格」)、「弟」(亦稱為「底迪」)兩種角色。但兩者主要嘅差別並唔係女性化或男性化嘅程度,而是保護及依賴兩種概念。但一般嚟講,個區分係唔明顯兼且無確實定義嘅。
社會
[編輯]社會對待同性戀嘅態度隨住時間同地點嘅唔同而有好大分別,從鼓勵社會中嘅所有男性成員發生同性關係到認為同性行為為罪惡;從喺法律上嚴厲對待同性戀者,甚至判處死刑,到給予同性戀者完全平等嘅地位。
好多國家都唔阻止成人之間自願嘅同性性行為。有一啲地方更進一步承認同性伴侶間嘅權利等。而有啲國家或地區就會嚴格限制呢種權力,包括對發生呢類行為嘅人處以極刑,好似伊朗或尼日利亞部分地區呢啲穆斯林原教旨主義地區。
出櫃
[編輯]「出櫃」一詞係來自英文單詞Coming out。呢個術語用來表示一位同性戀者正式向外界公開自己嘅同性戀性取向。通常來講,出櫃會分為三個階段。第一個階段就係「認識自己」,以及對同性關係嘅認同。通常呢個過程叫做「自我出櫃」。第二個階段就係指同性戀者決定向其他人,譬如屋企人、朋友、同事或同學等。呢個階段最早可能喺11歲嘅時候就會發生,但亦有人到咗40歲或之後先至會意識到。第三個階段通常係指以同志身份公開生活。喺當今嘅美國,好多人會係高中或者大學嘅時候出櫃。但係喺呢個年紀,由於佢哋對其他人嘅唔信任,特別佢哋喺嘅性取向並無得到社會嘅接受,通常會連佢哋嘅父母都唔知情。
藝術同文學
[編輯]同性之間嘅愛情通過文學同藝術得以保留。喺西方文化中,男同性戀嘅印記可以追溯到藝術嘅根基,遠達古希臘文明。荷馬嘅《伊利亞特》被認為係以表達兩個男人之間嘅愛情為主旨。帕拉圖嘅Symposium亦都令讀者有呢方面嘅聯想,喺某啲地方甚至表現出男同性戀間嘅愛情優越過異性戀嘅愛情。歐洲同性之間嘅戀愛傳統一直持續到米高安哲羅同埋達芬奇時代。從文藝復興開始,男女同性之間嘅愛情喺西方嘅視覺藝術當中仍然係一個常見嘅主題。
喺伊斯蘭文化中,表現同性愛情嘅作家有Abu Nuwas同Omar Khayyam。而被稱為「世界上第一部真正嘅小說」嘅日本名作《源氏物語》亦有呢方面嘅記述。喺當代嘅日本,一種被稱為㚻嘅次文化動畫主要集中描繪男同性戀者。而通常呢啲漫畫嘅作家係女性,呢一點同西方嘅情況唔一樣。
響20世紀,Noel Coward同埋David Bowie將同性愛情帶入西方流行音樂入邊。亦係到咗呢個時候,女同性戀愛情文學先至從古希臘詩人Sappho之後嘅沉默時期,通過歌手、作曲家同埋詩人開始再度形成規模。
響1990年代,好多美國電視喜劇開始出現同志角色。1997年,Ellen DeGeneres響情景喜劇Ellen中扮演女同志出櫃嘅嗰集係美國曾轟動一時,並帶來呢部喜劇片嘅最高收視率。但係之後收視率就不斷降低,並最後取消。但係好快,響1998年至2005年期間,另外一部喺NBC電視台播出嘅《威廉同格雷斯》變成一部描寫男同性戀者日常生活最成功嘅一部情景喜劇。
戲劇作家創作咗好多膾炙人口嘅同性愛情劇,比如田納西·威廉斯嘅Cat on a Hot Tin Roof同Tony Kushner嘅Angles In America。同性戀主題亦頻繁出現喺百老匯嘅音樂劇中,比如A Chorus Line同埋Rent。2005年,華人導演李安嘅斷背山獲得國際認可。而呢部電影嘅成功,被認為係美國同志權利運動嘅一個里程碑。
暴力
[編輯]喺美國,根據美國聯邦調查局嘅報告顯示,2004年度喺差館備案嘅仇恨案件中,有15.6%係針對性取向方面嘅。而當中有61%嘅個案係針對男同性戀者[6]。1998年,一位同性戀學生Mattew Shepard被仇殺嘅案件係美國最著名嘅案件之一。
而家,重有一啲國家對發生同性性行為嘅人判處死刑,比如伊朗、毛里塔尼亞、尼日利亞、巴基斯坦、沙特阿拉伯、阿聯酋同埋也門[未記出處或冇根據]。歷史上亦有一啲國家判處同性戀死刑,包括Constantine時期嘅羅馬帝國、納粹德國同埋塔利班時期嘅阿富汗(1996年至2001年)。[未記出處或冇根據]
人類學
[編輯]研究同性戀社會結構嘅研究人員調查咗唔同時期唔同社會唔同嘅同性關係以及呢啲關係嘅模式同埋區別。佢哋將呢啲社會歷史學嘅變化分為三個唔同嘅類別:[7][8]
關係 | 註釋 | 參閱 |
---|---|---|
平等關係 | 兩個伴侶之間無年齡嘅聯係。除此之外,兩人都扮演相同嘅社會可以接受嘅性角色,譬如兩人都扮演傳統意義上嘅男性角色。而家西方社會最常見嘅兩人年紀相似嘅同性伴侶關係就屬於呢種類型。 | 基於性取向同性別認同嘅文化 |
性別結構 | 主要特徵係兩人分別扮演傳統異性戀意義上嘅唔同性角色(一方扮演傳統嘅男性角色,另一方扮演傳統嘅女性角色)。譬如女同性戀之間嘅T/P關係就係一個範例。 | 同性戀同伊斯蘭教,雙靈,同埋Hijra |
年齡結構 | 主要特徵係雙方嘅年齡唔同或者差別較大,通常係一個少年同一個成人。譬如古希臘嘅愛者同被愛者之間嘅關係。 | 眾道,孌童喜好 |
人口分佈
[編輯]要研究同性戀響人口嘅分佈係一件困難嘅事情,因為缺乏可信賴嘅數據:
- 關於個人感受或私人活動嘅統計通常係唔準確嘅。受訪者通常會避免做出社會、提問者或者佢哋唔鍾意嘅答案;
- 研究必須包含一啲關乎或者無關同性取向定義嘅特徵。有同性性欲望嘅人群可能比實踐呢啲欲望嘅人多,而實踐同性欲望嘅人可能比自身認定自己性取向為同志嘅人多;
- 響對性活動嘅調查入邊,受訪者可能對咩係「性行為」有唔同嘅睇法;
目前一啲關於同性戀所佔人口比例嘅研究根據唔同嘅估計會有唔同嘅結果,而根據著名心理學家佛洛伊德嘅講法,每個人或多或少亦有同性愛嘅傾向。所以,同性戀所佔嘅真正人口比例,到目前為止並無真正嘅答案;有啲鼓吹異性戀嘅人士認為呢個比例大概係介乎1%到4%,但係另一位性愛專家金賽就喺《金賽報告》指出,美國有37%嘅男性曾經喺同另一位男性嘅接觸中達到不同程度嘅快感;而喺另一個研究入邊,美國國家意見調查中心報告話淨得大約0.7%嘅美國男性認為佢哋係絕對嘅同性戀者(睇注腳1)。好多喺美國同歐洲進行嘅隨機調查趨向於認為喺過去有過同性性行為經驗嘅人嘅人數佔8%左右,而淨得同性性行為經驗嘅人只佔2%左右。
金賽以後,大量大規模嘅跨文化調查始終顯示人群中嘅同性戀比例少於金賽所宣稱嘅,呢啲調查涵蓋隨機抽取嘅上萬個對象。但係,不同嘅報告都會因為測試者嘅隱瞞而產生偏差。而不同嘅差異廣大嘅資料通常被人引用,譬如:
- 斯密斯1991年對國家民意調查中心報告進行分析後表示到18歲,有5.9%嘅活躍男性有過男性嘅伴侶,但係「18歲以後,淨係得1%嘅人係同性戀,4+%嘅人係雙性戀」。
- 由Christopher Bagley同Pierre Tremblay於1998年做嘅研究表示13.5%嘅男性「報告話有一定程度嘅同性戀」包括「自己聲稱嘅重複計算嘅同性戀(5.9%)同/或雙性戀(6.1%)」。
- NHSLS報告表示18歲以後嘅人群中同性戀佔4.9%。
通常來說,反同性戀者引用嘅資料通常顯示同性戀嘅比例係1%,而由同性戀活躍分子引用嘅資料就將近10%。
動物界嘅同性戀現象
[編輯]同性性行為的確喺動物王國中發現,特別係社交嘅物種。尤其係海鳥、哺乳動物、馬騮同人科。同性性行為已經喺大概1500種動物身上發現,而其中嘅500種已經良好㩒記錄咗落嚟。佐治城大學(Georgetown University)教授Janet Mann特別噉理論化咗動物同性戀現象,至少喺海豚中,同性性行為係進化嘅好處,可以最小化種內嘅侵略,尤其喺雄性中。
法律
[編輯]而家,響有啲文化入邊,同性戀仍然被視為「非自然」同埋非法嘅。響一啲穆斯林(例如伊朗)同埋非洲國家,同性戀甚至係會被判處死刑。譬如最近一單被廣泛報道嘅案件,兩名青少年,Mahmoud Asgari同埋Ayaz Marhoni由於被人發現響度進行同性性行為,而響2005年被絞死。
婚姻同民事結合
[編輯]目前全球一共有30個國家認可同性婚姻。荷蘭響2001年首先合法化同性婚姻,成為全球第一。而家響比利時、加拿大、南非、西班牙同埋美國嘅麻薩諸塞州,同性婚姻都得到政府承認。以色列嘅最高法院裁定該國認可響其他國家嘅同性婚姻,但係同性婚姻響當地仍然係非法嘅。
而其他國家,包括歐盟嘅大部分國家,就立法允許民事結合。呢種關係畀同性戀伴侶同其他異性戀夫婦相似嘅法律權利,包括繼承同埋移民。好多斯堪的納維亞國家(丹麥、挪威、瑞典、冰島、芬蘭除咗法羅群島)都通過咗民事結合法律。而響美國,承認民事結合或者家庭伴侶關係並提供幾乎所有婚姻權利嘅州有加州(2000年)、佛蒙特州(2000年)、康涅狄格州(2005年)同埋新澤西州(2006年)。承認民事結合或者家庭伴侶關係並提供部分婚姻權利嘅州有夏威夷(1996年)、緬因州(1999年)、俄勒岡州(2007年)、華盛頓州(2007年)以及哥倫比亞特區(2001年)。
其他法律議題
[編輯]- 就業歧視指喺就業方面嘅歧視行為,包括喺僱傭、晉升、工作分配、評比、賠償金以及各種類型騷擾等方面嘅歧視。響美國,「好少法令法規、習慣法同埋判例法將基於性取向嘅歧視認為係非法嘅」。
- 住房歧視
- 㚻姦法
- 仇恨罪行
- 性傾向歧視立法
政治
[編輯]宗教
[編輯]基督教立場
[編輯]基督教普遍反對同性戀行為,對有關同性戀睇法嘅最重要聖經依據係《羅馬書》1:24-27。經文咁講:「所以 神任憑他們,逞著心裡的情慾行污穢的事,以致彼此玷辱自己的身體。他們將 神的真實變為虛謊,去敬拜事奉受造之物,不敬奉那造物的主,主乃是可稱頌的,直到永遠。阿們。因此 神任憑他們放縱可羞恥的情慾,他們的女人,把順性的用處,變為逆性的用處。男人也是如此,棄了女人順性的用處,慾火攻心,彼此貪戀,男和男行可羞恥的事,就在自己身上受這妄為當得的報應。」 《羅馬書》1:20說明神創世嘅秩序係明明可知嘅,男女先至係必然嘅配對(亦參考《創世記》2:18-24)。 基督教人士認為有同性戀行為嘅人往往係俾情慾所支配咗,做神唔鍾意嘅事。新舊約聖經亦都一貫視同性戀行為為罪,引用嘅聖經經文係《利未記》18:22及20:13),認為同性戀行為本質係違反神創造嘅秩序,違反自然同人性。基督教人士認為人如果只有同性戀傾向,而冇行為,咁個傾向對人只係一種試探、一種困惑,都唔算係罪。當然有同性戀傾向或行為嘅人仍然可以依靠神嘅恩典改變佢哋嘅性傾向。即使於一段好長嘅日子都改變唔倒,只要認罪悔改就冇問題;正如「貪心」係一種罪,信徒信主認罪悔改後可能仍然會喺一段相當長嘅時間入面改變唔倒貪心嘅行為,但仍然可以得到赦免,唔使因為「貪心係天生傾向」而將「同性戀行為有罪」改定成「同性戀行為冇罪」。
基督教中都有支持同性戀者嘅釋經者,佢哋認為《羅馬書》1:24-27保羅所指嘅係嗰個時代流行嘅豢養孌童,即係男人對小童嘅㚻姦,而唔係成人之間同意下嘅同性戀行為。戀童係羞恥嘅行為,因為咁樣係權力唔平衡嘅行為,連現今同性戀者都反對。基督教中反對同性戀行為嘅人對呢個講法嘅反駁係:保羅已經講明反對同性戀嘅原因係違反神創造人嘅原意,理據並非權力唔平衡。另外,唔少早期希臘羅馬嘅文獻顯示當時社會都同樣反對成年人之間嘅同性戀行為。基督教中支持同性戀行為嘅人再反駁嘅理據係:保羅喺呢道定罪嘅,係指嗰啲明明本身係異性戀傾向,但係又做出同性戀行為嘅人,因為咁係違反本性(性傾向)。基督教中反對同性戀行為嘅人再反駁嘅理據係:如果咁講都通嘅話,其他聖經反對嘅性行為又係咪可以按同樣邏輯推理,自認有嗰啲特殊性傾向而合理化呢?保羅指嗰啲人「慾火攻心、彼此貪戀」,其實就係指雙方俾對方吸引,雙方同意之下,俾情慾牽引而做嘅同性性行為,咁就係保羅同樣反對嘅。其實保羅所指係違反上帝創造「性」嘅目的(v.20),而唔係指違反個人本身嘅性傾向。
總體講,雖然聖經視同性戀行為為罪,但係聖經亦話基督係愛每一位嘅,包括每一位同性戀者,甚至喺每一位重係罪人嗰陣時就為人而死。(《羅馬書》5:8)成為信徒愛心嘅榜樣,按住真理愛世上每個人。
關於同性戀嘅理論
[編輯]歷史
[編輯]歷史上嘅同性戀文化
[編輯]通常認為同性性關係喺古希臘係好普遍,但係K.J.多佛(Kenneth Dover)話,咁樣嘅關係同男女間嘅婚姻關係並存,而係發生喺之前定係一齊,一個成年男人會有一個未成年男人同伴,佢會成為「愛者」(erastes),而較後生嘅成為「被愛者」(eromenos),喺呢種關係入面,被愛者覺得渴望被認為係唔適宜嘅,因為佢重未有男子氣概,受到欲望同尊敬嘅驅使,愛者會無私咁奉獻嗮所有被愛者要求嘅用於繁榮社會嘅教育。
一個成日拗嘅焦點係喺現代社會以前嘅同性戀唔同而家嘅同性戀,批評者拗,雖然唔同時代嘅同性戀者有唔同嘅特徵(同異性戀者),但係潛藏嘅欲望機制一直存在,佢唔係現代社會嘅產物,同時,儘管同性戀嘅表現方式同社會結構緊密相連,但佢嘅特質就總是穩定嘅、持久嘅。
參考
[編輯]- ↑ https://stedu.stheadline.com/sec/article/13898/%E6%82%85%E8%AE%80%E4%B8%AD%E6%96%87-%E8%B7%A8%E6%99%82%E7%A9%BA%E7%9A%84%E5%9F%BA%E6%83%85
- ↑ 〈"磨镜"与"对食":揭秘古代女同性恋[图]-新闻中心-南海网〉. www.hinews.cn. 原著喺2021-05-16歸檔. 喺2021-05-16搵到.
- ↑ 〈【奇趣史話】古代同性戀男稱斷袖女叫咩呢? | 蘋果日報〉. 《Apple Daily 蘋果日報》 (香港中文). 原先內容歸檔喺2021-03-31. 喺2021-03-29搵到.
- ↑ 〈存档副本〉. dict.revised.moe.edu.tw. 原著喺2021-03-30歸檔. 喺2021-03-29搵到.
- ↑ Pan, Rong-li; 潘榮禮. (2005[min 94]). Tai wan xian zhi ji li yan yu (第Chu ban版). Tai bei shi: Qian wei chu ban. ISBN 957-801-466-X. OCLC 82303638. 原先內容歸檔喺2021年3月30號. 喺2021年3月29號搵到.
{{cite book}}
: Check date values in:|date=
(help) - ↑ 〈存档副本〉. 原先內容歸檔喺2005年10月20號. 喺2007年7月14號搵到.
- ↑ Homosexualities (Worlds of Desire: The Chicago Series on Sexuality, Gender, and Culture) (2002) p.2
- ↑ "Queering Anthropology" (published in Theo Sandfort e.a. (eds) Lesbian and Gay Studies, London/NY, Routledge, 2000) [1] 互聯網檔案館嘅歸檔,歸檔日期2007年6月8號,.