于謙

  想搵同名嘅相聲演員嘅話，請睇于謙 (相聲演員)。

《晩笑堂竹莊畫傳》裡面嘅于謙畫像

于謙（1398年5月13號—1457年2月16號），字廷益，號節庵，諡忠肅，大明浙江承宣布政使司杭州府錢塘縣（今日嘅浙江省杭州市）人，七歲時，就有僧人話于謙會成為「救時宰相」，後來嘅《明史》都有記載。明永樂十九年，于謙由進士出身，因為參與平定漢王朱高煦謀反有功，得到明宣宗器重，擔任過御史、山西巡撫、河南巡撫。明英宗時期，因得罪宦官王振而坐監，出獄之後被英宗起用為兵部侍郎。土木堡之變之後，于謙繼任兵部尚書，指揮明軍打贏京師保衛戰。景泰帝在位期間，于謙一路做到少保、太子太傅，因此後世尊稱佢「于少保」。英宗發動奪門之變並成功復辟之後，于謙被石亨、曹吉祥等人砌生豬肉，以謀逆罪喺集市被處死。直到明憲宗成化年間，于謙先至獲得平反。現北京市、杭州西湖都有紀念于謙嘅祠堂、故居。