克努王子 (基斯頓十世二仔)

克努王子 (基斯頓十世二仔)
私人明細
配偶	嘉芙蓮-瑪蒂爾德公主
仔女	伊利沙伯公主; 英戈夫王子; 基斯頓王子
父	基斯頓十世
母	亞歷珊王后
出世	1900年7月27號; 丹麥羅森堡寧比
過世	1976年6月14號（75歲）; 丹麥哥本哈根

克努王子（丹麥文：Prins Knud til Danmark，1900年 7月27號—1976年 6月14號），全名克努·基斯頓·費特力·米高（丹麥文：Knud Christian Frederik Michael），丹麥國王基斯頓十世細仔、費特力九世細佬，1947年至1953年係丹麥王儲。1953年改咗王位繼承法，侄女後嚟嘅丹麥女王瑪嘉烈二世升做王儲，而克努亦降做王子。

簡歷

克努1900年響羅森堡寧比無憂宮出世，係丹麥國王基斯頓十世同亞歷珊德蓮王后共同嘅第二個細路，有一個比佢大一歲嘅大佬費特力九世。阿爺係丹麥國王費特力八世，太爺係丹麥國王基斯頓九世。

1906年，太爺基斯頓九世走咗，阿爺費特力繼位，老豆升為王儲。1912年，阿爺費特力八世走咗，老豆登基做國王，而克努就升為王位第二繼承人。

克努響海軍學院接受教育，畢業之後亦加入海軍。響德國佔領丹麥之前，佢曾經係Dragør Fort嘅指揮官；當德國攻入丹麥嗰陣，佢響8月申請調離崗位。呢段時期，佢參加咗一個反抗德國嘅組織AMPA。

1947年，老豆基斯頓十世走咗，由大佬費特力繼位，係費特力九世。由於費特力九世冇仔（得三個女），而當時丹麥嘅王位繼承法又淨係畀男人繼位，所以克努係假定王位繼承人，畀人封為「Hereditary Prince」（王儲）。如果克努成功登基做國王，咁佢嘅稱號就係「克努七世」。

但係響1953年，丹麥改咗王位繼承法，由原先嘅一定由男人繼位，改為男人有優先權，但係如果國王冇仔，都可以畀個女繼承；換言之就算費特力冇仔，都可以畀佢大女繼位。結果響同年，費特力個大女瑪嘉烈公主升為王儲，而克努一下子變成王位第四繼承人，排響費特力三個女嘅後面；銜頭亦由王儲變成王子。

1972年大佬費特力走咗，侄女瑪嘉烈公主登基做瑪嘉烈二世。1976年6月14號，克努王子響哥本哈根根措夫特走咗，終年七十五歲，葬響羅斯基勒主教座堂。

屋企

1933年，佢同堂細妹嘉芙蓮-瑪堤爾德公主（哈爾王子個女、費特力八世個孫）響弗登斯堡宮結婚，有兩個仔一個女：

伊利沙伯公主（1935年5月8號－2018年6月19號），曾經係丹麥外交部人員，冇結婚冇仔女
英戈夫王子（1940年2月17號－），羅森堡伯爵，冇仔女，因為同平民結婚而冇咗王位繼承權
基斯頓王子（1942年10月22號－2013年5月21號），前羅森堡伯爵，因為同平民結婚而冇咗王位繼承權，有三個女

呢篇同人物傳記相關係楔位文。歡迎幫維基百科擴寫佢。