Ray Online|李家超要求文體旅局盡快赴四川商討大熊貓來港安排 口誤稱「大龍貓」
香港迎嚟回歸27周年,宣布中央會再次送贈一對大熊貓。行政長官李家超話知道大家好鼓舞,佢一樣好興奮,一有資料會向大家公布更多詳情。唔知佢係咪太興奮,將大熊貓講錯成「大龍貓」呀。
李家超誤稱「大龍貓」
李家超今日出席行政會議前見記者,被問到大熊貓嘅性別、體重、趕唔趕得切喺國慶前嚟香港等等,佢都仍然未公布有關詳情。李家超話要求文化體育及旅遊局盡快起程去四川商討大熊貓嚟香港嘅安排,包括一般需要30日檢疫安排、「環境要做好,確保一對『大蒙烤』……『大龍貓』……大熊貓嚟香港嘅整體情況係良好」。
李家超明確表示希望大熊貓盡早嚟香港大家庭先,令大家知道有新成員嚟咗。佢相信新成員會為大家帶嚟歡笑同喜悅,以至吸引全球旅客。