შარლ IX (საფრანგეთი)
შარლ IX Charles IX | ||
![]() შარლ IX-შ პორტრეტი. ფრანსუა კლუეშ ნახანტა | ||
საფრანგეთიშ მაფა | ||
---|---|---|
პოსტის გერინაშ ბორჯი | ||
5 ქირსეთუთა, 1560 – 30 მესი, 1574 | ||
წიმოხონი | ფრანსუა II | |
მონძე | ანრი III | |
დუნაბადი | 27 მანგი, 1550 სენ-ჟერმენ-ან-ლე, საფრანგეთი | |
ნაღურა | 30 მესი, 1574 (23 წანერი) ვენსენი, საფრანგეთი | |
ნთხორუ აბანი | სენ-დენიშ ბაზილიკა | |
მუმა | ანრი II | |
ნანა | ეკატერინე მედიჩი | |
ალმასქუ | ელიზაბეთ ავსტრიალი | |
სქუალეფი | მარი ელიზაბეთი შარლი, ანგულემიშ ჰერცოგი (უკანონო) | |
რელიგია | კათოლიციზმი | |
ხეშმოჭარუა | ![]() |
შარლ IX, შარლ-მაქსიმილიენი (ფრანგ. Charles IX , დ. 27 მანგი, 1550 — ღ. 30 მესი, 1574) — საფრანგეთიშ მაფა 1560-1574 წანეფს, ვალუეფიშ დინასტიაშ წჷმმარინაფალი. რდჷ ანრი II-შ დო თიში ალმასქუ ეკატერინე მედიჩიშ ოშქარი ქომოლსქუა. ხვისტაშა ეშართჷ მუში უნჩაში ჯიმაშ ფრანსუა II-შ უსქეთ ღურაშ უკულ.
ხვისტაშა ეშულაშ ბორჯის შარლ IX ვითი წანერი რდჷ დო რეგენტო ჸუნდჷ დიამუში ეკატერინე მედიჩი. ქიანას რეალურო ეკატერინე მართუნდჷ. შარლიშ ხეშუულებაშ ბორჯის საფრანგეთის იბურჯანდჷ რელიგიური ლჷმეფი. 1562 წანაშ 1 მელახის კათოლიკეეფიშ ართ-ართი ლიდერიშ ფრანსუა დე გიზიშ ზოჯალათ კათოლიკეეფქ გოჭყვიდეს პროტესტანტი მახვამალეფი, ვასის. ჸათე ინციდენტიქ ძალამს გაუფრაშჷ კათოლიკეეფიშ დო პროტესტანტეფიშ (ჰუგენოტეფი) ურთიართალა. ქიმიძინჷ პროტესტიქ დო საფრანგეთიქ რელიგიური შანით გირთჷ ჟირო, ნამუთ სერიოზული პრობლემას წჷმარინუანდჷ სახენწჷფოშო. შარლი ოცადუდჷ პროტესტანტეფს დო კათოლიკეეფს შქას თინჩალაშ მეჭირინაფას. ჸათე ღანკით თიქ, 1572 წანას, მუში უკულაში და მარგარიტა ქიმიათხუ ნავარიშ მაფას ანრის. დიარაშ ცერემონია დოგეგმეს პარიზის, სოდეთ სუმარო ქომორთჷ ბრელი ჰუგენოტიქ. ეკატერინე მედიჩიშ გინოჭყვიდირით, კათოლიკეეფქ მანწყის ჰუგენოტეფიშ მასობური ზღოდაფა. 1572 წანაშ 23 მარაშინათუთას, წიმინდე ბართლომეშ დღახუშ წოხოლენი სერს, კათოლიკეეფქ ქიდიჭყეს ჰუგენოტეფიშ მასობური ჸვილუეფი. მასობური მოჯალაგუა იგინძორებუდჷ მარეფიშ გოძვენას. თეხანური მუნაჩემეფით ბართლომეშ სერიშ შედეგო დოღურჷ დოხოლაფირო 30,000-შახ ადამიერქ. ღურელეფს შქას რდჷ ჰუგენოტეფიშ ბრელი პოლიტიკური დო ოურდუმე ლიდერი. ბართლომეშ სერიშ ტრაგედიას შარლ IX-შ როლი ბოლოშა გჷმორკვიაფილი ვარე. უკულიანი პერიოდეფს, თინა ჰუგენოტეფს აქტიურო ოლიმუდჷ დო ოცადუდჷ თინეფიშ შანულამი ლა-როშელიშ ჯიხაზურგაშ ეჭოფუას, მარა უშედეგეთ.
ბართლომეშ სერიშ ტრაგედიაქ გეჸვენჯი ჟირი წანაშ გოძვენას სერიოზული ნეგატიური გოლინა იღვენუ შარლიშ მენტალური დო ფსიქოლოგიური სჷნთელეშა. შარლიქ ღურუ ტუბერკულოზით 1574 წანაშ 30 მესის. თის ლეგიტიმური მონძე ვადოსქილადჷ დო საფრანგეთიშ ომაფე ხვისტაშა ეშართჷ შარლიშ ჯიმაქ ანრი III-ქ.