羅仲謙拍《西遊記·女兒國》吐苦水:唔可以畀自己肚瀉
廣告
羅仲謙(現名羅子溢)第三度拍攝鄭保瑞電影《西遊記》系列飾演沙僧,曾經大吐苦水,話喺拍攝嘅四個月當中,因為負擔好重嘅特技化妝,令佢「食又食唔到、瞓又瞓唔到,連去廁所都去唔到」,最慘嘅係為咗件肌肉衫唔好穿崩,只可以小便,唔可以大便,所以佢話:「千祈唔可以畀自己肚瀉!」
撰文:東方新地
圖片:新傳媒圖片庫
羅仲謙:化妝師要求高
羅仲謙指自己同郭富城係鄭保瑞導演拍嘅三部《西遊記》入面都有份參與:
「今次難度同樣都係極高,高在演員嘅心理狀態,因為我哋維持四個月都要經歷負擔好重嘅特技化妝,變咗食又食唔到、瞓又瞓唔到,連去廁所都去唔到!」
佢話大家可能覺得佢只係著咗件肌肉衫、髹藍咗塊面,好似唔係好辛苦咁,其實內裡係有好多嘢:「顏色表面睇係一層,其實裡面噴咗好多層,頭皮同額頭黐咗啲假嘅皮膚,又黐住鬚,如果食嘢顏料就會裂開!化妝師全部係荷李活嘅化妝師,要求極高,覺得完美先會畀你出鏡,食完嘢裂咗,就算導演催都係要執好先。」
![羅仲謙 羅仲謙指今次《西遊記·女兒國》嘅化妝師全部來自荷李活,要求極高,要覺得完美先會畀佢出鏡。](https://imgs.orientalsunday.hk/wp-content/uploads/2018/02/nhv4dxh3MJN7gxp/img_5725-css_7392015a8fa16be5c2c.jpg)
肌肉衫縫口要個半鐘
羅仲謙又指自己件肌肉衫同樣要縫口先至冇穿崩位:「小便OK,想大嘅話,明天請早吖!四個月入面,我都保持住一個狀態,就係唔可以畀自己肚瀉,生活好規律,開工前、收工後一定要搞掂,千祈唔可以肚瀉,如果唔係就要片場成百人等你一個,同埋會阻礙進度,因為一開一合件肌肉衫要個半鐘頭,全日都係拍八個鐘頭。」羅仲謙話嗰段時間自己經常會驚「今日冇去廁所,如果肚痛點算呀?」心理壓力真係好大。
![羅仲謙 羅仲謙指戲中件肌肉衫一開一合縫口要個半鐘頭,會阻礙拍攝進度,因此唔可以畀自己肚瀉。](https://imgs.orientalsunday.hk/wp-content/uploads/2018/02/nhv4dxh3MJN7gxp/img_5757s_13622928065a8fa1a2c6ace.jpg)
同輩競爭大
但問到羅仲謙當初有冇抗拒演唔算「靚仔樣」嘅沙僧?佢就話:「冇抗拒,因為喺我哋呢輩演員,其實競爭唔係在於香港,台灣、韓國、大陸甚至泰國、馬來西亞,好多演員已經喺一個共同嘅市場入面,我哋呢輩需要嘅係機會,老實講,我依家階段係,你畀工作我做,只要個角色唔係過份,我都會做,因為爭取每一個機會,亦都可以幫自己累積到經驗同人際關係,自問依家唔係選擇嘅階段,我未到嗰個階段,你話去到四、五十歲為興趣而拍戲,可以揀自己鍾意嘅角色挑戰自己,但依家我呢輩仲係衝刺期,乜都要嘗試、累積!」
![羅仲謙 羅仲謙指自己天生Baby Face:「我依家三十四歲,我相信我到四十歲都係咁嘅樣,電影男主角嗰類好man嘅滄桑感發生唔到喺我身上!」](https://imgs.orientalsunday.hk/wp-content/uploads/2018/02/nhv4dxh3MJN7gxp/img_5746s_10620804385a8fa19acd3d2.jpg)
圖片來源:新傳媒圖片庫