李亞男19歲選美入行變身人妻廚神 出書教煮上海菜
李亞男 爹哋鼓勵19歲選美
33歲的李亞男在上海出世,9歲舉家移民加拿大溫哥華,她說自己小時候被外公外婆湊大,長大則學校、教會、屋企三點連線,從來不出門、從來沒有自己的社交圈,21歲認識祖藍之前,也只交過一個男朋友:「其實拍得兩個散拖,咩都冇做過,我都唔知算唔算正式一段感情。」
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/8p0a0020x_2853967205a7424b9a0a71.jpg)
李亞男家有一妹,父母從事美術設計,從小她就把爸爸當偶像,覺得將來讀藝術、也找個相關工作安安穩穩做一世就好:
「當其時我喺UBC(英屬哥倫比亞大學)讀fine arts,因為12歲已經170cm高,年年都有Auntie叫爹哋媽咪畀我選美,到我19歲嗰年,爹哋終於幫我填咗份form,叫我試一次,可以多一種體驗⋯⋯」
李亞男:入TVB後無見過衰人
呢個時候我問亞男,做了將近廿年受保護動物,選美總該試過勾心鬥角被批踭吧,李亞男卻說生性簡單又遲鈍,一世人除了兩年前豪宅裝修誤墮裝修陷阱,真的沒見過衰人:「我以前好乖,屋企話點我就點,選美係因為豁咗出去想試吓新嘢,不過就唔係好想贏,淨係覺得快啲過咗個比賽就算。細個太少面對世界,可能有是非都因為我太遲鈍接收唔到。我覺得我當時面對世界嘅能力,十幾廿歲人都唔及依家三五歲嘅細路,可能人哋批批吓踭都覺得無癮走咗呢?」
接下來的故事大家都知道,總是冇諗過贏、當攞經驗的人最後誤打誤撞成功,李亞男贏完溫哥華小姐冠軍,再下一城成為國際華裔小姐冠軍,順理成章被無綫邀請簽約和回港發展。李媽媽之所以肯放行,是因為港姐保母擔保基督教團體藝人之家會照顧好亞男⋯⋯而李亞男和王祖藍的初邂逅,就是在藝人之家。
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/f01_897a_cove_p36_38_12513208275a7456cd44bc9.jpg)
目標出書學廚
14年台慶夜,王祖藍失驚無神跪地求婚,翌年情人節,兩人在迪士尼酒店大宴親朋,正式結為夫妻。一直愛煮、廚藝亦常被祖藍大讚,李亞男說農曆年推出烹飪書的計劃亦是靠祖藍鼓勵和一手策劃。去年聽祖藍安排離巢並成為祖藍旗下藝人,李亞男的短期目標就是出書、學廚、還有今年之內做媽媽。
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/7_12361873825a743e59a7b85.jpg)
要澄清的時間線
一坐下來,其實李亞男一直高呼,要幫她澄清一下和祖藍拍拖的時間線:「好多人以為佢開始紅我至同佢一齊,其實05年我哋對大家有feel嗰陣,佢仲係兒童節目主持、仲未幫《東方之珠》郭晉安代唱、仲未演《同事三分親》個樓華。」李亞男和王祖藍的初邂逅,就是在藝人之家。「當時大家對大家都冇感覺,淨係覺得佢細細粒幾得意。識佢以前,我鍾意嘅明星都係王力宏、黎明嗰啲⋯⋯」簡單嚟講,即是一概白馬王子型,並且高度一定要在李亞男之上,那些年,有排都未輪到王祖藍。
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/1_21139801105a741c5f7b4ab.jpg)
藍媽媽 推波助瀾
當時李亞男沒有考慮過王祖藍,連王祖藍後來也對李亞男承認,選美冠軍是自己能力與想像範圍之外,兩個人的關係開始起了微妙變化,多得祖藍媽媽推波助瀾。
「我記得有一次藝人之家燒嘢食,祖藍媽媽第一 眼見到我就讚我靚,跟住燒完隻雞翼又講『李小姐你好靚!』、燒完條腸又講『李小姐你好有氣質』,成晚讚完我十次八次之後,夜晚又返去同祖藍講。祖藍都話嗰晚開始留意我,然後有一次發現我個手袋隨身袋住本聖經,至真正刮目相看,覺得呢個女仔唔同其他選美出身嘅人,都幾虔誠唔係淨係追逐名利。」
![李亞男](https://imgs.orientalsunday.hk/wp-content/uploads/2017/12/nhv4dxh3MJN7gxp/d_1385421495a3a0f8f61f71.jpg)
一對一教學
也就是那一晚以後,王祖藍開始給李亞男教廣東話。話說多才多藝的祖藍一直在藝人之家教演技、教 唱歌亦教語言,不過人人都是大班教授,唯獨李亞男一個可以特別享受一對一教學:「嗰陣時冇諗太多,依家諗番,係喎?得我一個嘅?又好似係有小小追嘅成分。跟住係佢約我去主題樂園玩,大家喺Space Moutain入面坐過山車,驚驚吓就拖咗手仔⋯⋯不過嗰次之後我哋冇即刻一齊,反而係去咗問牧師意見。」
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/8_888a_aunt_p8_7093546135a742434b3073.jpg)
冷靜期 三年零四十日
李亞男說,祖藍在遇到自己以前情路上有過不少波折,並不敢貿然開始新感情,而自己則是經驗太少,不敢自己做決定:「尤其係身邊有朋友提醒我, 我一個女仔嚟到陌生地方,第一個喺身邊出現嘅任何男性都有機會被我依賴,我都怕對祖藍嘅係感動唔係感情,最後傷害咗佢。所以牧師叫我哋畀自己四十日冷靜期先,四十日之後我哋兩個喺電話分手,大家都講到喊⋯⋯其實咩都未做過、完全未開始過, 咁都一齊喊,諗番轉頭都覺得好cute。」
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/b01_865a_cove_3542216785a742ab274364.jpg)
身高差距
那一年不敢開始的原因,李亞男承認,其中一個顧忌的正是身高差距,兩人衡量過利害關係,始終還是怕惹人話柄。「真心嗰句,如果唔使顧及人眼光,我哋應該會更早一齊。其實自己幸福就得,又唔係犯法,事實證明,之後真係公開戀情,(身高差)都唔係寫咗好耐啫!」
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/d7_904a_aunt_p12_3_15280199425a74286b7293b.jpg)
一起傳教重燃愛火
冷靜期一過就是三年,兩人因為一起到美加佈道會傳教而愛火重燃,一回港、李亞男收到第一封Email就是王祖藍徹夜趕工寫成的歌詞《墮入凡間的天使》,然後正式拍拖:「分開嗰三年,我哋真係放低咗,我甚至有睇吓身邊有冇其他人適合⋯⋯我 嗰陣時都以為係,我嘅世界可以好大,甚至喺身邊搵吓有冇其他人可以發展,不過慢慢都係發現冇人比祖藍更適合我。」
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/201411192216068351_19727544865a742b8ddc230.jpg)
我哋價值觀一致、好多嘢都一凹一凸,佢快我慢,佢複雜我簡單, 我鍾意飲紅酒佢鍾意飲朱古力奶。我自細慣咗畀人照顧,而佢係阿哥,爸爸早走十幾歲就要孭起頭家,對住屋企好有責任感,我細個好想要哥哥,佢會教我會幫我揸fit,唔好睇外形,佢內心好強大,從來唔會驚青。仲有佢好有才華,喺藝人之家教得好好,事實上係可以做教授嘅人,畢業咁多年好多嘢依家都仲可以拋書包,同埋我最敬佩佢,係咁叻都可以好謙虛,會放低自己學新嘢,又會聽我意見 ……」講到老公,就讚到冇停口!
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/4_17043720015a7425b7313cd.jpg)
李亞男讚祖藍好謙虛肯聽人意見,我問亞男,做了老闆以後、結婚以後,王祖藍是不是還肯聽老婆意見?李亞男弱弱答道:「佢追我時係聽晒我所有意見,結咗婚後,我嘅意見真係唔多,佢都知我放心畀佢安排晒所有嘢⋯⋯」
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/7_12361873825a743e59a7b85.jpg)
被岳父母誤會無禮貌
從被高攀,到如今成為成功男人王祖藍背後的賢內助,李亞男說,眼前的小個子其實沒有變:「人係會成長,我都做唔到以前嘅我,佢表面上變咗,但係本質係一樣,我知佢好多嘢做又做老闆,無時無刻都好多嘢諗好多嘢度,最開頭連我爹哋媽咪都誤會佢無禮貌、點解成日講電話⋯⋯作為佢身邊嘅人,知道佢同一時間處理緊幾多嘢,可以做嘅就係返到屋企時畀佢盡情放空、畀佢落台嘅時候可以做番自己,當佢忽略咗身邊嘅嘢時,提一提醒佢,幫佢去留意見唔到嘅嘢。」
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/5_17853919475a743b6681aa5.jpg)
順道一提,李亞男說王祖藍個子雖小,喜歡的東西卻都偏大:「所以佢揀咗我做老婆,又喺大埔買咗依家呢個三千幾呎嘅屋企,喺出邊做嘢辛苦,佢真係好需要一個屬於自己嘅地方好好放鬆。」
記得當時跟剛剛因為代唱冒起頭來的王祖藍第一次做訪問,他就說過要買 大屋、要給媽媽最好的生活,十年而已超額完成,這就是為甚麼個子小小的他,為甚麼身影總是很高大。
![李亞男](https://imgs.orientalsunday.hk/wp-content/uploads/2018/02/nhv4dxh3MJN7gxp/677d30aegy1fltmbqv0vdj20v90nf48k_14944698195a743c0aafd42.jpg)