Tshisekedi yakoze impinduka zikomeye mu buyobozi bukuru bw'ingabo

Perezida Félix Tshisekedi wa Repubulika ya Demokarasi ya Congo yashyizeho umugaba mukuru w'ingabo mushya, muri zimwe mu mpinduka zikomeye cyane kandi nyinshi akoze mu buyobozi bukuru bw'ingabo kuva intambara n'inyeshyamba za M23 yakongera kubura mu mpera y'umwaka wa 2021.

Liyetona Jenerali Banza Mwilambwe Jules yagizwe umugaba mukuru w'ingabo, umwanya asimbuyeho Jenerali Tshiwewe Songesha Christian wari uwuriho kuva mu 2022, we wagizwe umujyanama mu bya gisirikare wa Perezida Tshisekedi.

Itangazo ryasomwe mu Gifaransa kuri radio na televiziyo by'igihugu mu ijoro ry'ejo ku wa kane rigira riti:

"Bitewe no kuba ari ngombwa kandi byihutirwa, inama nkuru yateranye ku gitekerezo cya guverinoma itegetse [ko] ... Banza Mwilambwe Jules agizwe umugaba mukuru w'ingabo za Repubulika ya Demokarasi ya Congo..."

Izi mpinduka zibaye mu gihe amakuru avuga ko imirwano ikaze ikomeje hagati ya FARDC na M23 muri teritwari ya Lubero mu ntara ya Kivu ya Ruguru mu burasirazuba bw'igihugu, aho bivugwa ko M23 yigaruriye uduce twinshi kuva mu mpera y'icyumweru gishize.

Utwo duce twiyongera ku bice binini M23 isanzwe yarafashe muri teritwari za Masisi, Rutshuru na Walikale.

Inama yari kubera i Luanda muri Angola ku cyumweru gishize hagati ya Perezida Tshisekedi na Perezida w'u Rwanda Paul Kagame, ku buhuza bwa Perezida João Lourenço, yari yitezwe kugeza ku masezerano y'amahoro, ku munota wa nyuma ntiyabaye kubera kutumvikana ku ngingo ijyanye n'ibiganiro hagati ya DRC na M23.

Raporo y'inzobere z'Umuryango w'Abibumbye n'ibihugu byinshi byo mu burengerazuba bw'isi bishinja u Rwanda gufasha uwo mutwe w'inyeshyamba, ibyo u Rwanda na M23 byakomeje guhakana.

Umutwe wa M23 uvuga ko uharanira uburenganzira bwawo nk'Abanye-Congo, biganjemo Abatutsi, uvuga ko bambuwe uburenganzira n'ubutegetsi bwa Kinshasa.

Mu bandi bashyizwe mu myanya, harimo Liyetona Jenerali Ichaligonza Nduru Jacques, wagizwe umugaba mukuru wungirije w'ingabo ushinzwe ibikorwa bya gisirikare ('opérations') n'ubutasi bwa gisirikare.

Hari kandi na Jenerali Majoro Makombo Muinaminayi Jean Roger, wagizwe umugaba mukuru wungirije ushinzwe ubutasi bwa gisirikare.

'Général de brigade' Mulume Oderwa Balola Jean Berchmans yagizwe umugaba mukuru wungirije ushinzwe za 'opérations'.

Naho 'Général de brigade' Katende Batubadila Benjamin yagizwe komanda wungirije ushinzwe za 'opérations' n'ubutasi mu mutwe w'abarinda perezida.

Perezida Tshisekedi yanashyizeho abakuriye uturere twa gisirikare (cyangwa 'zones de défense' mu Gifaransa), ndetse n'abakuru b'ibigo bya gisirikare bya Kitona na Kamina.

Liyetona Jenerali Masunzu Pacifique yagizwe umukuru w'akarere ka gatatu ka gisirikare karimo n'intara za Kivu ya Ruguru, Kivu y'Epfo na Ituri.

Impinduka zikomeye mu buyobozi bukuru bwa FARDC zaherukaga mu Kwakira (10) mu mwaka wa 2022, ubwo Tshisekedi yagenaga Tshiwewe – wahoze akuriye umutwe w'abasirikare bamurinda – nk'umugaba mukuru w'ingabo, mu mavugurura ibiro bya perezida byavuze ko yari agamije kunoza imikorere.

Ibyo tuzi ku mugaba mukuru mushya wa FARDC

Liyetona Jenerali Banza Mwilambwe Jules ni umusirikare mukuru wize kurwanisha imbunda za rutura.

Mbere yuko agirwa umugaba mukuru w'ingabo, yari umukuru wungirije w'itsinda ry'abasirikare baba hafi ya perezida mu kazi ka buri munsi (cyangwa 'maison militaire'), wari ushinzwe za 'opérations' n'ubutasi.

Abonwa nk'umwe mu bizerwa cyane ba Perezida Tshisekedi, ndetse yigeze kuba komanda wungirije w'umutwe uzwi nka 'Garde Républicaine' w'abasirikare barinda perezida.

Yazamuwe ku ipeti rya Liyetona Jenerali mu mwaka wa 2022.