Mozambique: Umwanzuro w'urukiko wateje indi myigaragambyo ku byavuye mu matora
Ahavuye isanamu, Reuters
- Umwanditsi, Jose Tembe
- Igikorwa, BBC News i Maputo
Imyigaragambyo yongeye kwaduka muri Mozambique nyuma yuko urukiko rurusha izindi ububasha rwemeje ko umukandida Daniel Chapo w'ishyaka riri ku butegetsi ari we watsinze amatora ya perezida yateje impaka yabaye mu Kwakira (10) uyu mwaka.
Icyo gihe hadutse imyigaragambyo yiciwemo abantu ubwo ibyavuye mu matora by'ibanze byatangazwaga.
Venâncio Mondlane, wabaye uwa kabiri, kuva amatora yaba yakomeje gusaba abamushyigikiye kwigaragambya bamagana amatora yavuze ko yabayemo uburiganya.
Ejo ku wa mbere, abigaragambya bumvikanye batera hejuru bavuga izina rye, batwika imipine y'imodoka, bafunga imihanda ndetse batera amabuye abapolisi. Abashinzwe umutekano babasubije n'imyuka iryana mu maso.
Mondlane ari mu buhungiro. Yahunze Mozambique ndetse ashinja polisi kugira imyitwarire imushyira ku nkeke nyuma yuko babiri mu bajyanama be bishwe barashwe mu Kwakira.
Mu butumwa yatangaje ku mbuga nkoranyambaga mu mpera y'icyumweru gishize, yavuze ko hashobora kubaho "imyivumbagatanyo mishya y'abaturage" mu gihe ibyavuye mu matora byaba bitaburijwemo.
Nubwo urukiko rushinzwe kurinda iremezo ry'itegekonshinga rwashimangiye ko umukandida w'ishyaka rya FRELIMO riri ku butegetsi yatsinze amatora, rwagabanyije ikigero cy'amajwi yatsindiyeho.
Ibyavuye mu matora by'ibanze byatangajwe mu Kwakira byagaragaje ko Chapo yatsinze ku majwi 71% mu gihe Mondlane yagize amajwi 20%. Ubu urukiko rwanzuye ko Chapo yatsinze amatora n'amajwi 65%, mu gihe uwo ukomeye bari bahatanye yagize amajwi 24%.
Mbere yaho ejo ku wa mbere, agace ko rwagati mu murwa mukuru Maputo ubusanzwe kaba gahinda ku minsi isanzwe y'akazi no mu gihe cy'iminsi mikuru, kari gacecetse ndetse n'imihanda irimo ubusa – ibyo bimaze kumenyerwa muri aka karere kuva imyigaragambyo y'abaturage yatangira ku itariki ya 21 Ukwakira uyu mwaka.
Mondlane, pasiteri w'umuvugabutumwa, ufite imyaka 50, mbere yaho muri uku kwezi yabwiye BBC ko "nta kuntu" ashobora kwemera ibyavuye mu matora.
Akanama k'amatora kahakanye ikirego cye ko amatora yabayemo uburiganya bubogamiye ku ishyaka FRELIMO, riri ku butegetsi kuva iki gihugu cyo muri Afurika y'amajyepfo cyabona ubwigenge mu myaka 49 ishize.
Ariko indorerezi z'amatora zavuye mu mahanga zavuze ko amatora yabayemo inenge, zikomoza ku mibare yahinduwe n'ibindi bibazo byabaye mu kubara amajwi.
Imyigaragambyo yamaze ibyumweru yatumye habaho urugomo hagati y'abigaragambya n'abapolisi. Ikigo Plataforma Decide cyo muri Mozambique gikurikiranira hafi ibihabera cyavuze ko abantu nibura 110 bishwe.
Bivugwa ko abapfuye benshi bishwe n'abashinzwe umutekano ariko mbere umukuru wa polisi Bernadino Rafael yabwiye BBC ko abapolisi ayobora bagiye birwanaho nyuma yo guterwa.
Mu butumwa bwo ku cyumweru Papa Francis yageneye abaturage b'iki gihugu cyiganjemo abanyagatolika, yasabye ko haba ibiganiro no gushyira imbere inyungu rusange.
Mondlane amaze igihe avugana na Perezida ucyuye igihe Filipe Nyusi, ariko icyavuye mu kuvugana kwabo ntikiramenyekana.
