Tímarit um Menntarannsóknir, 1 árg. 2004, 19-25
19
Fjarskipti í þágu menntunar
Sigrún Gunnarsdóttir,
Landssíma Íslands
Ebba Þóra Hvannberg,
Háskóla Íslands
Sæmundur E. Þorsteinsson
Landssíma Íslands
Tæknistutt nám býður upp á nýjar víddir í skólaumhverfinu. Í stað þess að einbeita sér að
upplýsingatækninni einvörðungu þá er nú farið að beina sjónum meira að námsefninu, nýjum
námsaðferðum, þjálfun kennara, samskiptum innan skólans sem og við aðra skóla, jafnt hérlendis
sem erlendis. Kennarar og nemendur eru að aðlagast nýju umhverfi og áhrifum þess á námskrár,
þörfum á tæknilegri aðstoð og breytingum á stjórnun innan skólanna. Þetta tekur tíma og krefst þess
að kennarar læri að nýta þau tækifæri sem í boði eru, nýtt námsefni og nýja þjónustu. Nemendur
verða einnig að læra að feta sig áfram í hinum nýja heimi og læra að vinna sjálfsætt, vinna markvisst
að framförum miðað við sína getu, til þess að verða sjálfstæðir, ábyrgir og skapandi einstaklingar
í framtíðinni. Það eru margar hindranir sem þarf að yfirstíga áður en upplýsingatæknin fer að skila
okkur áhrifaríku skólastarfi. Fyrst ber þar að nefna viðeigandi þjálfun fyrir kennara. Þjálfunin er
að færast úr því að kenna á tölvur í það að kenna hvernig hægt sé að nota þær til þess að nýta
nýjar eða núverandi kennsluaðferðir á áhrifaríkan hátt. Síðan ber að nefna að aðgengi að námsefni
er takmarkað og erfitt er að bjóða ólíkum einstaklingum mismunandi kennsluefni eins og krafist
er í einstaklingsmiðuðu námi. Möguleikar fjarskipta- og upplýsingatækninnar til þess að koma til
móts við aukna útbreiðslu og aðgengi að fjölbreyttu námsefni er umfjöllunarefni þessarar greinar.
Í grein þessari er fjallað um kerfin EducaNext4 og Snjallt námsver (e. Smart learning space2)
en þau hafa verið þróuð í tveimur evrópskum rannsóknarverkefnum sem höfundar starfa innan.
EducaNext er miðlari sem var hannaður með samvinnu háskólanna í Evrópu í huga. Þessi miðlari
aðstoðar kennara við að skiptast á námsefni með því að geyma og leyfa fyrirspurnir um námsefnið
en námsefnið sjálft er þó geymt hjá útgefendum eða höfundum. Hugbúnaðarkerfið Snjallt námsver
sem má líta á sem framhald af EducaNext hefur það að markmiði að setja upp þróað umhverfi til
endurmenntunar fyrir starfsmenn fyrirtækja. Nám í þessu umhverfi byggist á svonefndum P2P (e.
peer-to-peer) fjarskiptum þar sem unnt er að bjóða ýmiss konar námsþjónustu. Í P2P eða það sem
mætti kalla jafningjafjarskipti er efni ekki safnað á miðlægan þjón heldur geymt á dreifðan máta.
Hægt verður að halda utan um mismunandi þarfir einstaklinga og hanna námsferil sem hentar
hverjum og einum sem best. Grunnurinn að því að Snjallt námsver geti orðið að veruleika, er að
styðjast við þekkta staðla varðandi gagnaskráningu námsefnisins, persónuupplýsingar nemenda og
það samhengi sem nemendur vinna í eins og til dæmis starfsvettvang þeirra. Markmið greinarinnar
er að vekja athygli á því að þótt hver skóli eða kennari noti sitt eigið kerfi er nauðsynlegt að hægt
sé að tengja kerfin saman og að gæði þeirra jafnt sem gæði efnis sé haft í fyrirrúmi. Tímabært er að
fjalla um samþættingu kerfanna, því námsumhverfi á Íslandi er að þróast í átt að meiri samvinnu,
bæði innanlands og utan, bæði vegna hagræðingar og fjölbreyttara námsvals. Hér verður lýst
nokkrum tegundum upplýsingakerfa í námi og kennslu. Þar á eftir er fjallað um hvernig haga
má stöðluðum samskiptum á milli kerfanna og tekið dæmi úr Snjöllu námsveri og EducaNext.
Helstu stöðlum og staðlahönnuðum í námsumhverfi er lýst þar næst. Í kaflanum Gæðatrygging
greinum við frá því hvernig EducaNext kerfið var notendaprófað og við lýsum því hvernig
rannsóknamiðstöð um framtíðarnám getur verið þverfaglegur vettvangur sérfræðinga og notenda.
1
Vefsíða EducalNext er http://www.educalnext.org
Vefsíða Elena verkefnisins er http://www.elena-project.org
2
Tímarit um menntarannsóknir, 1. árgangur 2004
20
Upplýsingatækni í
námi og kennslu
Með aukinni notkun tölva og fjarskipta í þágu
menntunar, hafa ýmis hugbúnaðarkerfi verið
þróuð til að hjálpa nemendum og kennurum. Í
þessum kafla munum við kynna helstu tegundir
kerfa, ásamt markmiðum þeirra. Hvatinn að
gerð margra kerfanna er fjarnám/dreifnám en
reyndin hefur verið sú að þau eru einnig notuð
til að styðja staðarnám.
Námsstjórnunarkerfi
Markmið námsstjórnunarkerfa (e. Learning
management systems) er að geyma og birta
þau gögn sem kennari vill koma á framfæri
við nemendur. Þau geta verið námsskrá,
kennsluáætlun, námsefni og námsmat. Eitt
meginhlutverk námsstjórnunarkerfa er að gefa
nemendum yfirlit yfir stöðu námskeiðs hverju
sinni, þ.e. hve mikið af námsmarkmiðunum
hefur náðst og/eða kennarinn veitt.
Kennari getur sent nemendum tilkynningar
og nemendur geta líka haft samskipti rafrænt
við kennara eða sín á milli. Samskiptin geta
verið á textasniði, með hljóði eingöngu eða
með mynd og hljóði.
Hvert námskeið inniheldur lýsingu á
markmiði, forkröfum, námsmati, einingafjölda
og hvar námsefnið fellur í heildarnámsskrá
svo eitthvað sé nefnt. Þessi gögn eru svokölluð
lýsigögn. Líta má á að námsstjórnunarkerfi
tengist við önnur kerfi, sem lýst er síðar í
kaflanum, því að námsstjórnunarkerfi fá (og
veita) upplýsingar frá þeim kerfum.
Í mörgum námsstjórnunarkerfum og
vefsetrum geta kennarar fylgst með aðgangi
og notkun nemenda á efni.
Nemendaskráningarkerfi
Markmið nemendaskráningarkerfa (e. Student
management systems) er að geyma námsferla
og námsáætlanir nemenda.
Nemendaskráningarkerfi leyfir nemendum
að skrá sig í námskeið eða skrá námsmarkmið
sín, jafnframt því að leyfa kennara að skrá
niðurstöður námsmats að námskeiðum loknum.
Tímarit um menntarannsóknir, 1. árgangur 2004
Þannig geyma nemendaskráningarkerfi upplýsingar um hvað nemandi hefur lært og
hverjar áætlanir hans eru um nám í nánustu
framtíð.
Höfundarkerfi
Þriðji flokkur kerfa er ætlaður til að búa til
námsefnið sjálft. Margir nota glærur sem eru
búnar til í þar til gerðum forritum, en aðrir nota
textaskjöl og stiklutextaskjöl (e. hypertext).
Afurðir úr þessum höfundarkerfum geta líka
verið myndbönd, hljóðupptökur, kyrrmyndir
og fyrirlestrar sem eru birtir eftir þörfum eða
um leið og þeir eru fluttir af kennara. Mörg
hugbúnaðarkerfi eru til að þjálfa nemendur eða
miðla þeim ákveðinni þekkingu. Þau eru gerð í
höfundarkerfum sem hjálpa kennurum við gerð
margmiðlunarefnis. Önnur kerfi eru hins vegar
sérsmíðuð og eru ætluð til kennslu á sérstöku
efni svo sem stærðfræði eða eðlisfræði.
Flokkur kerfa hjálpar til við að útbúa og
framkvæma námsmat. Krossaspurningar, próf
og verkefni eru tæki til námsmats og kerfin
styðja kennara við að búa til námsmatið og
flytja það svo til nemenda til að spreyta sig á.
Samskiptaumhverfi
Við kjósum að setja þau kerfi í sérstakan flokk
sem leyfa samskipti milli fólks, í okkar tilviki
samskipti milli kennara og nemenda, milli
nemenda eða jafnvel milli kennara. Í einfaldri
mynd eru samskiptin um tölvupóst en geta
verið um spjallrásir, samtíma spjallrásir eða
með fjarfundum. Samskiptaumhverfi er einnig
hægt að nota til kennslu eða verkefnavinnu og
er þá ýmist flutt hljóð eingöngu eða bæði hljóð
og mynd. Flest þessara kerfa gefa færi á að
sýna gagnaskrár og uppfæra þær samtímis.
Áður fyrr einblíndu hönnuðir og notendur
á að miðlægur gagnagrunnur tengdi kerfin
saman. Netið hefur tekið við þessu hlutverki
og leyfir okkur að deila gögnum eins og
námsferlum, milli einstakra tegunda kerfa og
þannig deila þeim milli háskóla.
Leit að námsefni
Ýmiss konar leit að námsefni gagnast bæði
kennurum og nemendum. Vefurinn er helsti
21
brunnurinn fyrir leit og eru til þess notaðar
almennar leitarvélar en einnig geta nemendur
leitað í sérútbúnum söfnum eins og rafrænum
bóka- eða tímaritasöfnum. Í raun er ótakmarkað
hvers konar efnis er hægt að leita og nemendur
geta t.d. leitað að listaverkum á sviði tónlistar
og myndlistar. Líta má á námsefnismiðlara
eða námsefnisþjóna, líkt og þeim sem er lýst í
næsta kafla, sem tól sem gerir leit að námsefni
öflugri.
Jafningjanet
Margir háskólar hafa tekið í notkun hugbúnað
til að stjórna dreifingu námsefnis til nemenda
og til að eiga samskipti við þá, bæði í
fjarnámi og staðbundnu námi. Hugmyndin
með EducaNext hugbúnaðinum var að búa
til vettvang sem myndi auðvelda kennurum í
háskólum að skiptast á náms- og kennsluefni.
Til dæmis gæti jarðfræðikennari í Þýskalandi
fengið aðgang að úrvals námsefni frá jarðfræðikennara á Íslandi. Efni þetta gæti haft
verðmiða eða einhverjar aðrar kvaðir, en væri
aðgengilegt fyrir kennarann og nemendurna í
Þýskalandi á einfaldan hátt. Efnið gæti verið
fyrirlestur, gagnvirkir fyrirlestrar í rauntíma,
eða kennslubók á rafrænu formi, próf eða hvað
annað sem unnt er að miðla á rafrænu formi.
Kennarinn í Þýskalandi myndi nýta þetta efni
í sinni kennslu en nemendurnir væru ekki
nemendur Háskóla Íslands, heldur háskólans
í Þýskalandi. Upphaflega var vonast til að
heilu skólarnir væru þátttakendur í þessari
samvinnu en niðurstöður benda fremur til
þess að kennarar myndi með sér samfélög.
Skólar eða deildir þeirra eru ekki aðilar að
samfélögunum heldur einstakir kennarar.
Varð þessi niðurstaða til þess að umgjörð
þjónustunnar sem EducaNext hugbúnaðurinn
veitir breyttist og varð samfélagsdrifin.
Þannig er markmið EducaNext að þjóna
þeim einstaklingum í háskólasamfélaginu sem
markvisst vinna að því að auka gæði þess
náms sem boðið er upp á ásamt því að styðja
við rannsóknir með auknum samskiptum við
háskóla í Evrópu. Ljóst er að mörg kerfi bjóða
svipaða þjónustu og EducaNext og því skapast
þörf á að leita í mörgum slíkum kerfum
samtímis. Ef við líkjum EducaNext miðlara
við hefðbundna leitarvél eins og Google þá
var hugmyndin að búa til kerfi sem leitaði
með aðstoð margra slíkra leitarvéla. Eins
og áður sagði, er uppbygging EducaNext
þannig að kerfið er miðlari (sbr. fasteignaeða hlutabréfamiðlari) sem er milligönguaðili
fyrir þá sem vilja skiptast á námsefni.
Námsstjórnunarkerfi (svo sem Clix, ULI,
Ariadne og European Schoolnet) tengjast við
EducaNext um kerfisviðmót sem nefnist UBP
(Universal Brokerage Platform). Þar sem slíkt
kerfi er viðamikið hentar ekki að byggja það
þannig upp að notandi tengist við miðlægan
þjón sem sækir svör við spurningum til margra
miðlara; slíkt myndi hamla afköstum kerfisins
því þjónninn gæti orðið flöskuháls ef mjög
margar fyrirspurnir eru sendar samtímis.
Í hönnuninni á Snjöllu námsveri, var
ákveðið að láta reyna á högun á dreifða kerfinu
sem kallast jafningjahögun eða jafningjanet
(e. peer-to-peer) og nota til þess Edutella
hugbúnaðinn sem er í flokki svonefnds frjáls
hugbúnaðar, þ.e.a.s. allir hafa aðgang að
forritskóðanum. Í jafningjaneti er ekki einn
þjónn sem svarar beiðnum frá öðrum, heldur
ríkir jafningjasamband á milli allra. Í jafningjaneti er fyrirspurn send samtímis til margra
hnúta, þ.e. námsefnismiðlara, á sama tíma og
þeir senda svör til baka til þjónustubeiðandans
sem framreiðir þær fyrir notandann. 1. mynd
lýsir því hvernig mismunandi námsstjórnarkerfi
geta ýmist tengst beint ákveðnum miðlara
(í þessu tilfelli UBP) eða jafningjaneti
(Edutella). Verið er að vinna að þessari
uppsetningu innan ELENA verkefnisins og
fyrirspurnir til námsefnismiðlaranna eða
námsstjórnunarkerfanna fara í gegnum ákveðið
viðmót sem heitir SQI Interface (Simple Query
Interface).
Jafningjanet hafa mikið verið notuð til að
miðla tónlist, en mun erfiðara er að leita
að og miðla námsefni. Ástæðan er sú að
lýsing á námsefni þarf að vera ítarlegri en á
tónlist. Til að kennari finni námsefni við hæfi
þarf hann að vita nánar um innihald þess og
Tímarit um menntarannsóknir, 1. árgangur 2004
22
• Ef þessar lausnir henta eru þær teknar
í notkun hjá fleiri aðilum innan samfélagsins
• Þessir aðilar koma lausnunum á framfæri
hjá staðlastofnunum sem búa til staðlana
1. mynd. Jafningjanet (Edutella) tengt við námsefnisþjón (EducaNext), námsefnismiðlara (UBP)
og námsstjórnunarkerfi (t.d. IteachYou)
lengd, á hvaða tungumáli efnið er skrifað
eða flutt, námsmarkmið sem því er ætlað
að ná og fleira. Ef fyrirspurnarkerfið á að
vera einstaklingsmiðað, er ekki nægjanlegt að
staðlar lýsi eingöngu námsefninu heldur þarf
einnig að halda utan um námsferil, reynslu
og starfsvettvang námsmannsins á stöðluðu
formi. Málið vandast enn fremur þegar tengja
þarf saman mörg kerfi og þau þurfa að geta
talað við þjónustubeiðandann á sama máli um
lýsingar á námsefni og skilja fyrirspurnir. Þetta
er einmitt meginforsenda dreifðra kerfa og er
að jafnaði stór þáttur hönnunar þeirra. Því fer
mikil vinna í að hönnuðir komi sér saman um
þau fyrirspurnar- og lýsigagnamál sem kerfin
tala. Þá koma staðlar til hjálpar en þeim verður
lýst nánar í næsta kafla.
Staðlar
Námsstjórnunarkerfi hafa verið í örri þróun
undanfarin ár og samhliða þessari vinnu hefur
þörfin fyrir staðlað umhverfi aukist til muna,
eins og lýst var hér að framan. Staðlar verða
ekki til staðlanna vegna heldur fara staðlar
yfirleitt í gegnum nokkur þróunarskref (Anido,
2002):
• Fyrst verður til þörf á að leysa vandamál í
samfélaginu
• Þörfinni er mætt með ýmsum tæknilegum
lausnum
• Lausnirnar eru síðan þróaðar áfram í
opinberar lýsingar
Tímarit um menntarannsóknir, 1. árgangur 2004
• Að lokum eru staðlarnir gefnir út til
notkunar
Á 2. mynd er reynt að draga upp hvernig
staðlanefndir á náms- og kennslusviðinu eru
tengdar (Masie, 2003).
• ISO/IEC JTC1 SC36 er alþjóðlegt samstarf meðal aðila frá 18 löndum. Þetta er
í raun lokastöð staðlanna. Staðall sem
þessi nefnd gefur út byggir á framlagi frá
alþjóðlegum nefndum.
Dæmi um staðlahópa innan ákveðinna
heimshluta eru IEEE LTSC, CEN/ISSS
LTSO:
• IEEE LTSC Námsstjórnunar staðlaráð
gaf út LOM (Learning Object Metadata)
staðalinn. Þetta er einn fyrsti og viðurkenndasti staðallinn fyrir námstækni. LOM
var hannaður í samstarfi margra þjóða þó
að hann sé gefinn út af bandarískum
aðila. Dæmi um aðila sem unnu mikið að
staðlinum var ARIADNE í Evrópu.
• CEN/ISSS Learning technology workshop
vinnur í samvinnu við alþjóðlega hópa en
leggur áherslu á þarfir Evrópuþjóða.
Efniviðurinn sem unnið er með innan áðurnefndra staðlasamtaka kemur frá ýmsum
hópum og verkefnum. Það eru margir
hópar sem hafa búið til tæknilegar lýsingar.
Þekktastir á sviði tæknistudds náms eru IMS
Global Consortium, Dublin Core og ADL sem
hannaði SCORM (Shareable Course Object
Reference Model) staðalinn.
SCORM staðallinn er sá staðall sem mest
er notaður. Staðlinum er skipt í fjóra hluta:
(i) Lýsing námsefnisins (ii) Forritunarviðmót
sem nota skal til þess að fá aðgengi að efninu
í námsstjórnunarkerfinu (iii) Gagnalíkan sem
geymir upplýsingar um hvernig efnið er notað
23
2. mynd. Staðlaheimurinn í eLearning
innan kerfanna (iv) Lýsigagnagrunnur (LOM),
sem inniheldur staðlaða eiginleika sem lýsa
námsefninu.
Fram hefur komið að það eru þrjár tegundir
staðla sem stuðst er við í námsumhverfinu.
Staðlar sem lýsa og bjóða aðgengi að
námsefninu eins og t.d. SCORM, staðlar um
hvernig á að geyma upplýsingar um nám
einstaklinga eins og LTSC (IEEE Learning
Technology Standardization Committee), PAPI
og IMS LIP, og þriðji hópurinn samskipti milli
þessara upplýsinga og annarra utanaðkomandi
aðila eins og t.d. Hagstofunnar. Þessum
stöðlum verður ekki lýst hér nánar en bent er
á vef CEN/ISSS.
Ljóst er að mikill áhugi er fyrir hendi á
alþjóðlegum vettvangi fyrir því að ná sátt
um þessa staðla og hérlendis til að mynda
hefur menntamálaráðuneytið sett af stað
samstarfshóp sem vinnur að því að innleiða
staðla í þau námsstjórnunarkerfi sem eru notuð
hér á Íslandi (sjá nánar stadlar.menntagatt.
is). Þrátt fyrir mikinn áhuga ber að hafa
eftirfarandi í huga varðandi staðla í heimi
tæknistudds náms:
• það verður aldrei einn staðall, töfrastaðall
eða hópur sem mætir þörfum allra
• flestir staðlar og lýsingar sem nú er
stuðst við munu halda áfram að þróast,
þ.e. breytast og verða hæfari til þess að
uppfylla þarfir okkar.
Gæðatrygging
Ætlunin með Snjöllu námsveri er að það
aðstoði starfsmann fyrirtækis í að stjórna
símenntunarferli sínum, skilgreina námsþarfir og leita að námsefni við hæfi. Eitt
meginmarkmið Snjalls námsvers er að það leiði
til árangursríkara náms. Nemandi getur ekki
náð árangri nema hann treysti verkfærunum og
námsefninu sem honum stendur til boða. Með
aukinni upplýsingatæknivæðingu og úrvali
kerfa og gagna, gera notendur auknar kröfur
um að þeir geti treyst kerfunum. Notendur
byggja traust sitt á ýmsum þáttum svo sem
gæðum efnisins, hvernig þeir upplifa öryggi
kerfanna, áreiðanleika þeirra, þ.e. hvort þau
bili og hvort þau uppfylli væntingar þeirra um
virkni. Notendur byggja einnig traust sitt á því
hvort þeir eigi auðvelt með að nota þau. Þessi
kafli fjallar um síðastnefnda þáttinn.
Markmið með nytsemisprófunum á EducaNext kerfinu voru að greina vandamál eða
villur í samskiptum notenda við hugbúnaðinn.
Við þróun á EducaNext hafa verið gerðar
nytsemisprófanir á kerfinu á tvennan hátt.
Í fyrsta lagi var framkvæmt spámat sem er
svo kallað því nytsemissérfræðingar skoða
notendaviðmótið og reyna að sjá fyrir hvaða
villur notendur muni hugsanlega gera. Við
spámatið hefur nytsemissérfræðingurinn
lista af tíu til fimmtán atriðum sem eru
leiðbeiningar um bestu venjur við hönnun
notendaviðmóta. Ef leiðbeiningunum er ekki
fylgt í einhverju tilviki, skráir sérfræðingurinn
það sem villu. Í öðru lagi hefur verið gert
notendapróf með raunverulegum notendum,
þ.e. kennurum og stjórnendum í háskóla.
Ákveðin verkefni eru lögð fyrir notendur í
raunumhverfi þeirra og fylgst með hvort þeir
geri villur. Markmiðið með notendaprófunum,
fyrir utan að greina villur, er að mæla hvort
notendur geti framkvæmt verkin villulaust
annars vegar, þ.e. árangur (e. effectiveness)
og hve nýting þeirra er með tilliti til tíma (e.
efficiency) . Við lok notendaprófsins er einnig
mæld ánægja notenda með því að leggja fyrir
þá spurningar.
Þótt slík próf séu mjög gagnleg, eru flestir
sammála um, að þau séu gerð heldur of seint
í þróunarferli hugbúnaðarins og reyna ætti að
Tímarit um menntarannsóknir, 1. árgangur 2004
24
greina villurnar fyrr. Í því augnamiði reynir
kerfisgreiningarfólk að lýsa sviðssetningum
eða sögum með texta (Rosson & Carroll
2002). Sögurnar sem lýsa notkun í ákveðnu
umhverfi og samhengi eru bornar undir
væntanlega notendur og þeir geta komið með
athugasemdir eða viðbætur. Stundum fylgja
sögunum lýsingar á persónum (Cooper, 1999)
og jafnvel tilfinningum þeirra (Strom, 2003).
Sviðssetningarnar þykja raunverulegri en
hugræn líkön og auðvitað mun kostnaðarminni
en frumgerðir og ekki talað sé um fullunnin
notendaviðmót.
Frumgerðir hafa löngum verið notaðar til
að prófa hugmyndir og eru frumgerðir af
notendaviðmótum gagnlegar, til dæmis til
að prófa hugmyndir, samtöl á milli manns
og tölvu og útlit. Til að minnka áhættu við
hugbúnaðarþróun, hefur síðustu ár verið lögð
meiri áhersla á þróunarskeið með endurteknum
og endurbættum milliútgáfum. Frumgerðir hafa
skipað stóran sess í slíku þróunarskeiði, en án
þess þó að fólk í hugbúnaðargerð hafi fengið
betri tól til frumgerðarsmíða. Frumgerðir geta
verið af ýmsu tagi, allt frá því að vera mjög
einfaldar, nánast gerðar með blaði og blýanti
þar til að vera mjög líkar í útliti og hin áætlaða
fullgerða vara.
Notkun reynslufrumgerða (Buchenau, 2000)
hefur aukist með tilkomu notendaviðmóta sem
einkennast af því að þau eru ekki bundin
við hinn hefðbundna skjá og því færanlegri
og minni í sniðum. Reynslufrumgerðir eru
notaðar til að vekja viðbrögð hjá notendum,
leyfa þeim að leika ákveðin hlutverk, spinna,
leggja sitt af mörkum í hönnunina eða meta
nytsemi á hefðbundinn hátt. Ýmist eru notaðar
mjög einfaldar frumgerðir jafnvel með
leikmunum. Slíkar frumgerðir geta gagnast
við hugbúnaðarsmíð fyrir námsumhverfið og
hafa þær verið reyndar að hluta til í þróun
Snjalls námsvers. Í framtíðinni er þörf á því að
kanna hvernig nám þróast í að fara fram utan
skólastofunnar, og þá ekki endilega dreifnám
þar sem skólastofan er færð inn á vinnustað
eða á heimilið, heldur færa námið líka nær
viðfangsefninu, t.d. í náttúrunni, í borgum, á
Tímarit um menntarannsóknir, 1. árgangur 2004
söfnum eða í samfélaginu og á vinnustöðum.
Rannsóknamiðstöðvar (Emile, 2003)
þar sem reynslufrumgerðir eru settar upp
til að notendur geti kannað þær eða prófað
geta gert vísindamönnum frá mörgum
sviðum kleift að vinna saman að því að
setja fram og prófa nýjungar á þessu sviði.
Rannsóknamiðstöðvarnar geta verið smáar í
sniðum í rannsóknastofu þegar hugmyndir eru
á frumstigi. Frumgerðirnar má svo færa yfir
í rannsóknamiðstöðvar í raunumhverfi þegar
frumgerðirnar eru orðnar raunverulegri eða
fyrstu útgáfur af vöru hafa verið smíðaðar.
Prófanir okkar á EducaNext sýna að samvinna
hugbúnaðarsérfræðinga og kennslufræðinga er
afar mikilvæg til að vinna hugmyndasmíði
fyrir dreifnám og margar villur má rekja
til þess að ekki var hugað nóg að þessum
þætti. Leiðbeiningar um notendamiðaða
hönnun tilgreina að kerfissmiðir verði
að þekkja notendur, takmarkanir þeirra og
getu, umhverfi notenda og þau verkefni sem
þeir eiga að leysa. Rannsóknamiðstöð um
framtíðarnám getur þannig verið vettvangur
fyrir vísindamenn í kennslufræði, tölvunarfræði
og fjarskiptaverkfræði eða hverja þá sem telja
sig geta lagt rannsóknunum lið.
Notendaviðmót EducaNext hefur verið
þýtt á nokkur tungumál: Frönsku, þýsku,
slóvensku, og íslensku. Við prófanir á
íslenska notendaviðmótinu kom enn betur í
ljós að notendur eru mjög viðkvæmir fyrir
hugmyndum eða orðanotkun sem samræmast
ekki þeirra hugarheimi. Það gæti verið eitt
hlutverk rannsóknamiðstöðvar eins og lýst er
hér að ofan, að byggja og prófa orðasafn fyrir
dreifnám. Með dreifðum kerfum og frekari
dreifingu upplýsinga er orðanotkunin ekki
bundin við einn skóla eða eina deild heldur
nær hún til allra nemenda sem tala íslensku.
Lokaorð
Ljóst er að nokkur þróun er hérlendis í notkun
námsstjórnunarkerfa. Lærdómurinn sem við
getum miðlað af þátttöku okkar í ýmsum
tilraunum innan rannsóknaverkefnanna sem
hafa þróað EducaNext og Snjallt námsver
25
er að staðlað umhverfi er forsenda framfara.
Staðlar sem valdir eru þurfa að uppfylla þarfir
viðkomandi og að þeir þurfa að vera undir
virku eftirliti.
Notendur, þ.e. kennarar og nemendur hvort
sem er í skóla eða í símenntun, gera gæðakröfur til slíkra kerfa, bæði um notkun og
innihald. Við höfum lagt til að þverfagleg
samvinna sérfræðinga í rannsóknamiðstöð um
framtíðarnám geti stuðlað að nýsköpun og
veitt umhverfi þar sem hægt er að prófa gæði
kerfanna.
Íslenskt orðasafn fyrir hugtök innan þessara
fræða er nauðsynlegt. Greinilegt er að margir
sitja einir úti í horni og finna upp íslenskt orð
eða orðatiltæki sem enginn annar skilur. Við
verðum að sameinast um íslenskt orðasafn
fyrir tæknistutt nám.
Með þróun kerfanna tveggja EducaNext og
Snjöllu námsveri höfum við unnið á vettvangi
tveggja ólíkra markhópa, þ.e í hefðbundnu
skólasamfélagi og fyrirtækjasamfélagi. Vonandi verður reynsla okkar einnig innlegg inn
í framtíðarumhverfi sem þáttar samfélögin
meira saman.
Anido L., Fernandez M., Caeiro M., Santos
J., Rodrı´guez J., Llamas M ( 2002)
Educational metadata and brokerage
for learning resources Computers &
Education vol. 38 p. 351–374
Heimildir
Rosson, M. B. & Carroll, J. (2002),
Usability Engineering, Scenario-Based
Development of Human-Computer
Interaction, Academic Press
Aarts, E. (chair); Herve Bourlard; JeanClaude Burgelman; Florin Filip; Gabriel
Ferrate; Manuel Hermenegildo; Ebba
Hvannberg; Irene McWilliam; Jerzy
Langer; Paul Lagasse; Paul Mehring;
Andrea Nicolai; Paul Spirakis; Berit
Svendsen; Mikko Uusitalo; Keith Van
Rijsbergen; Jim Ayre (rapporteur) (2003)
ISTAG Working Group 1 IST Research
Content, ftp://ftp.cordis.lu/pub/ist/docs/
istag-wgl-final_en.pdf
Buchenau, M. & Suri, J. F. , (2000)
Experience Prototyping, í ráðstefnuriti
DIS’00, ACM 2000
Cooper, A., (1999) The inmates are running
the asylum, Sams Publishing Company
Lethin, R., (2003) Technical and Social
Components of Peer-to-Peer Computing,
an introduction to a special issue on peerto-peer computing, Communications of
the ACM, February, vol. 46, no. 2
MASIE Center, e-Learning Consortium,
(2003) Making Sense of Learning
Specifications & Standards: A Decision
Maker's Guide to their Adoption
- 2nd Edition. November 2003. http://
www,masie.com/standards/s3_2nd_
edition.pdf
Strom, G., (2003) Perception of Humancentered Stories and Technical
Descriptions when Analyzing and
Negotiating Requirements, Proceedings
of Human-Computer Interaction
INTERACT’03
Tímarit um menntarannsóknir, 1. árgangur 2004