康有为
康有为（1858年3月19号－1927年3月31号），原名祖诒，字广厦，号长素，又号明夷、更生、西樵山人、游存叟、天游化人，南粤广东省南海县丹灶苏村人，一般称呼伊为康南海，伊是19世纪后半段东亚邪气有名个政治人物，也是戊戌变法个组织者搭后势来保皇党领袖。
生平
[编辑]年轻辰光
[编辑]康有为个祖宗侪是当官个，所以伊屋里比较有钞票。年轻辰光欢喜看杂书，考科举交关趟侪弗中。弗过因为欢喜发表激进言论，也慢慢在拉广州获得一批自家个弟子，个当中，就包括后势来中华民族个发明者梁启超。
名胜窜起
[编辑]1894年，清帝国在拉日清战争当中惨败，读书人慢慢侪认识到必须在拉制度层面对帝国进行改革。康有为抓住迭个机会，跑到北京，宣传自家个极端思想，慢慢获得交关粉丝。光绪廿一年（1895年），伊考中进士，弗过弗曾在拉北京蹲几天，又跑到上海广州，获得自家个存在感。
变法核心
[编辑]康有为个举动，引发想摆脱慈禧太后个光绪帝关注，到1898年，康有为得到机会，同自家弟子梁启超、谭嗣同之类一道，合作戊戌变法，又称百日维新，弗过，因为眼高手低，嘸多少辰光就宣告失败。康有为要躲避慈禧太后通缉，在拉失败之前就秘密跑路。
流亡海外
[编辑]变法失败之后，康有为跑到日本定居，创造出一个所谓个“密诏”故事，讲是光绪让伊在拉海外活动，恢复皇帝个实权。1900年代，康有为周游欧洲、美洲交关国家，利用自家个特殊地位，从海外华人当中招揽支持力量，获得经济赞助，并且依靠迭个手段，在拉瑞典买到过一个小岛，作为自家个别墅。弗过，因为留学生开始慢慢倾向孙中山搭伊个中国同盟会，保皇立宪派个力量，在拉后势来减弱，这也让康有为对革命党邪气反感，成为一个彻底个保皇派。
顽固不化
[编辑]1911年辛亥革命爆发，第二年2樾，宣统退位后，康有为跑到上海，一只反对共和，畀个辰光个年轻人当成一个典型个前清遗老。1917年，伊联络张勋，发动兵变，拥立宣统帝，是为张勋复辟，弗过十二天之后，就畀段祺瑞讨平。之后，康有为开始炮制所谓个“孔教会”，宣传要在拉中国创造一个“国教”，通过尊孔来团结全国。迭个做法同五四运动之后个新一代年轻人完全冲突，也让伊成为国民党、共产党侪准备做脱个反面人物。
惶惶暴毙
[编辑]1927年，北伐战争当中，蒋介石个军队进入到江浙地区，看到势头弗大妙个康有为，紧急拿自家在拉沪西个房地产卖脱，跑路青岛，准备在拉此地定居，继续同在拉天津个溥仪联络串联。弗过刚刚到青岛个第二天，伊就在拉一场宴会后突然死脱，死因到现在也弗大清爽。
墓地畀掘
[编辑]康有为死脱之后，埋到青岛李村东南侧的枣儿山，1948年正式安葬，第二年10月，举行康有为迁葬搭墓碑揭幕仪式。弗过，到文革辰光，因为康畀定性为“中国历史高头顶反动个保皇派”，导致墓地畀红卫兵掘开，遗骸畀造反派掘墓鞭打，并拿伊个脑子拉出来游街。