丰臣秀吉
![Toyotomi hideyoshi.jpg](http://upload.wikimedia.org/wikipedia/commons/thumb/0/09/Toyotomi_Hideyoshi_c1598_Kodai-ji_Temple.png/220px-Toyotomi_Hideyoshi_c1598_Kodai-ji_Temple.png)
日語表記 | |
---|---|
日語原文 | 豊臣 秀吉 |
假名 | とよとみ ひでよし |
羅馬字 | Toyotomi Hideyoshi |
豐臣秀吉(日文:豊臣 秀吉〔豐臣 秀吉〕假名:とよとみ ひでよし 罗马字:Toyotomi Hideyoshi;1537年3月17日-1598年9月18日)是日本战国时代阿末阶段冒起,并在安土桃山时代大放异彩个武士大名。
冒起
[编辑]尾张国爱知郡出身。出身贫寒家庭,早先依附织田信长,因得计谋多来邪气,外加会得拍马,合帮结派,获得织田信长个信任。获得武士身份,让自家有羽柴秀吉只名头——迭个名字也是伊为仔取悦织田信长个两个宠臣丹羽长秀搭柴田胜家弄出来个。1582年,织田信长在京都本能寺碰着明智光秀叛乱,故脱哉。羽柴秀吉趁机夺权,获得仔关白个身份。之后,依靠一系列计谋搭巧取豪夺,逐步弹压各路大名。伊本身想通过获得源氏只姓氏,效仿之前个源赖朝搭足利尊氏开设幕府。弗过,因为伊出身个问题(一个连得武士也弗是个农民)畀行情贵族抵抗。个咾,便折衷请天皇赐畀自家丰臣只姓氏(迭个丰臣只姓弗是家名,属于搭源、平一只等级个本姓),外加充当关白、太正大臣。构建依附在拉京都朝廷下底个丰臣政权。1580年代末,伊讨平着末一只反抗伊个大大名后北条氏。彻底控制日本哉。并担自家个关白位置让畀外甥丰臣秀次,亲自出任太阁,并修造出规模惊人个大坂城。
征朝
[编辑]1590年代初,获得日本境内66国控制权个丰臣秀吉野心膨胀,幻想用日本战国时代练就个封建军队,征服东亚大陆上向个大一统帝国明朝。伊各到各处散发告示,要求琉球、南蛮(西属菲律宾)、朝鲜来朝贡,结果除脱琉球,基本无人睬伊。1591年8月,经过准备,伊下令第二年春天入支(日文:唐入り),在肥前国造仔规模庞大个名护屋城,作为指挥战争个大本营。同时,让自家个养子宇喜多秀家当统帅,1592年3月,出兵16万,席卷朝鲜,朝鲜一败涂地。后手,明帝国派遣辽东个军队进入朝鲜,在平壤之战里向击败小西行长,貤在拉碧蹄馆之战打成功平手。战争陷入胶着。1593年,丰臣秀吉命令小西行长搭明朝进行谈判。
朝后两年里向,日本军队在拉朝鲜王国基本处于冷战状态,一头在朝鲜半岛南许建碉堡,一头丰臣秀吉开始处理自家屋里个事体。为仔怀疑自家个外甥丰臣秀次要反对伊,便命令丰臣秀次切腹(弗过越加重要个原因是伊歇辰光伊得着侧室淀殿养个儿子丰臣秀赖);朝后,身体状态越来越推板。伊也越加开始反对天主教,1596年,处决26名天主教徒,外加开始迫害基督教。
1597年,沈惟敬搭小西行长个册封泡沫破灭,丰臣秀吉恼羞成怒,命令重新出兵朝鲜,迭趟目标现实着眼,要求占领朝鲜王国个全罗道、忠清道搭京畿道。明帝国貤来干涉,派遣三路军队征讨。虽则日本军队在加藤清正等指挥下,三趟大败明帝国个路上军队。弗过,在海里向,因为李舜臣个存在,日本个补给一径弗到位,只好防守。迭歇,丰臣秀吉貤开始信任起自家个贴身秘书石田三成。因为石田三成排人对加藤清正等弗满,后者畀回国关押,一直到伏见城地震再放出来。
故脱
[编辑]秀吉个身体衰败来结棍,1598年3月15日,在京都醍醐寺命令修造庭园,从各地收集仔700多株名贵樱花移植到此地,让各位大名进行冠上。迭个也是丰臣秀吉阿末一趟在大量贵族面前公开亮相。5月15日,伊召见各有力大名:德川家康、前田利家、前田利长、宇喜多秀家、上杉景胜、毛利辉元搭伊拉个嫡子,宣布自家个遗言。7月4日,再次召见德川家康,希望伊好相帮丰臣秀赖;8月5日,貤要五大老来自家病榻前,再宣誓画押一趟。8月18日,一代枭雄丰臣秀吉,故脱。