Socrates
![](http://upload.wikimedia.org/wikipedia/commons/thumb/a/a4/Socrates_Louvre.jpg/220px-Socrates_Louvre.jpg)
Socrates (Oedgrieks Σωκράτης Sōkrátēs; Alopeke (Athene), ca. 470 v.Chr. – Athene, 399 v.Chr.) was e Grieksche filosoof die anzien wordt lyk ein van de groendleggers van de westersche filosofië. Je schreif gèen tekst'n, moa j' is bekend gekomn deur de versloagn van zyn student'n, lyk Plato en Xenophon, en deur de toneilstik'n van Aristophanes die in zyn tyd leefde.
Je was assan te vynd'n ip stroat'n en pleings van Athene, lyk d'n agora in 't center van de stad, vo te discuteern mè leirlyngn en vorbygangers over filosofische oenderwerp'n. Je voend 't belangryk vo jezelvn te leirn kenn en je wilde de menschn surtout kritisch leirn peizn. De dialoogn gyngn over 't algemein over deugd'n lyk rechtveirdigheid, zelfdiscipline, vroomheid, dapperheid en geleirdheid.
Socrates was nie alleine leiroare. Je vocht einigte keirn in 't leger van Athene teegn Sparta in de Peloponnesischn oorloge (431-404 v.Chr.) en je bemoeideg' hem ook mè pollitiek.
In 399 v.Chr. wierd Socrates berecht en schuldig bevoend'n an 't bedervn van de geist van de jeugd van Athene en in 't nie geloovn in de good'n van de stoat. Je wierd ter dowd verowrdeild deur 't drynk'n van e beker met 'n extract van e giftige plante.
![](http://upload.wikimedia.org/wikipedia/commons/thumb/8/8c/David_-_The_Death_of_Socrates.jpg/400px-David_-_The_Death_of_Socrates.jpg)