Pitermaricburg

Pitermaricburg
Pietermaritzburg (angl. i afrikaans)
umGungundlovu (zul.)

Valdkund	Suviafrikan Tazovaldkund
Eläjiden lugu (2011)	223,448 ristitud
Pind	126,15 km²
Telefonkod	+27-(0)33
Aigvö	UTC+2

Pitermaricburg (angl. i afrik.: Pietermaritzburg, angline virkand [ˌpiːtərˈmærɪtsbɜːrɡ], zul.: umGungundlovu) om lidn Suviafrikan Tazovaldkundan päivnouzmas. Se om Kvazulu-Natal-agjan pälidn sädandan aigaspäi vl 1994. Lidn mülüb Msunduzi-municipalitetha 634 km² pindanke, sen ristitišt om 618 536 eläjad vn 2011 rahvahanlugemižen mödhe.

Istorii

Eländpunktan aluz om pandud vl 1838, nimitihe riktud zululaižil buralaižiden lideriden muštho: Piter Retif i Gerhard Maric. Lidn oli buralaižiden Natal'-tazovaldkundan pälidnaks alusenpanendan aigaspäi, vll 1910−1994 — valdkundan Natal'-provincijan administrativižeks keskuseks.

Pitermaricburg ezilidnoidenke šingotase alüminijan tehmižel, kivivoin ümbriradmižel, taholižen mecan i citruskazmusiden ümbriradajil edheotandoil. Tekstiline tegimišt i kengiden pästand oliba šingotadud i dominiruiba 20. voz'sadan lophusai.

Geografijan andmused

Lidn sijadase agjan keskuzpalan suvipäivlaskmas, 596 m ü.m.t. keskmäižel korktusel.

Klimat om subtropine. Ekstremumad oma −4 C° i +42 C°. Paneb sadegid 832 mm vodes, vähemba kezakus-elokus (23 mm pordos), enamba vilukus (155 mm).

Eläjad

Vl 2011 lidnan eläjiden lugu oli 223 448 ristitud.

Mamankel' (ezmäine kel', 2011): zulun kel' — 57,0 %, anglijan kel' — 28,9 %, afrikaans — 4,2 %, kosan kel' — 3,5 %, toižed keled — 6,4 %.

Durbanan tehnologižen universitetan (vspäi 2002) kaks' kampusad seičemespäi ratas lidnas. Kvazulu-Natalan universitet om sätud kahten universitetan ühtištusel vl 2004, sen üks' kampus videspäi om Pitermaricburgas.

Irdkosketused

• Lidnan Msunduzi-municipalitetan oficialine sait (msunduzi.gov.za). (angl.)