Kasimov

Kasimov
Касимов

Lidnanznam	Flag
Valdkund	Venäma
Eläjiden lugu (2023)	27,821 ristitud
Pind	31,6 km²
Telefonkod	+7−49 131-xx-xxx
Avtokod	62
Aigvö	UTC+3 (MSK+0)

Kasimov (ven.: Каси́мов) om Venäman lidn Räzanin agjan pohjoižpäivnouzmas. Se om agjan kahtenz' lidn eläjiden lugun mödhe, om Kasimovan ümbrikon (edel vn 2024 kezakud — rajonan) administrativižeks keskuseks. Ende lidn oli erižeks ümbrikoks i ei mülünd rajonha.

Istorii

Eländpunkt mainitase ezmäižen kerdan vl 1152 kuti Meščoran lidneihut-röunlidnuz (ven.: Городец Мещёрский) vähän mödvedhe nügüdläižes Kasimovaspäi. Se voz' lugese lidnan alusenpanendan oficialižeks. Vl 1376 polttihe lidnad täuzin mongolalaižiden londan aigan, no pigai uz' eländpunkt oli saudud Uz' Alahaine lidn-nimitusenke (ven. Новый Низовой Город) vhesai 1471.

Lidn oli Kasimovan hankundan (tot.: Касыйм ханлыгы / Qasím xanlığı) keskuseks vll 1452−1681, om pandud nügüd'aigaižhe sijha Šah-Ali-hanan-totarlaižen ohjastusen aigan, se oli 16. voz'sadan keskes. Kasimov (tot.: Ханкирмән, Касыйм) sijazihe hankundan pohjoižes. Hankund i lidn oma nimitadud ezmäižen Kasim-hanan mödhe (ohjasti vll 1452−1469), ned oliba alastunuded Moskvan ruhtinazkundan tobmudele. Kätihe makundan keskuzlidnaks vl 1773. Severz'-se istorižid erižpertid om kaičenus lidnas.

Kasimov šingotase kalližarvoižiden metalloiden tegimel, sauvondmaterialiden pästandal (meckombinat, savičuntegim, keramikan edheotand), medicinižladimiden tegimel (sterilizatorad), sömtegimištol (leibtegim, konditerine fabrik, maidon edheotand) i turizmal (samvaroiden i kelloiden muzejad), mugažo omblendfabrik i verkoiden fabrik ratas lidnas. Jogiport om olmas turistlaivoiden täht.

Geografijan andmused

Lidn sijadase municipaližen ümbrikon keskuzpalas, Okan hural randal tobjimalaz, 130 m ü.m.t. keskmäižel korktusel.

Matkad Räzanihesai om 111 km päivlaskmha-suvipäivlaskmha orhal vai 165 km avtotel. Lähembaižed lidnad oma Sasovo (raudtestancii) 74 km suvipäivnouzmha orhal vai 96 km avtotedme, Spas-Klepiki 81 km päivlaskmha orhal vai 88 km avtotedme, i Viks (Alalidnan agj) 65 km pohjoižpäivnouzmha orhal vai 88 km avtotedme.

Sijaližiden avtoteiden sol'm. Lähembaine Kasimov-raudtestancii radab vspäi 1964 penes Kasimov-žilos seičemes kilometras suvhe lidnan keskuzpalaspäi vai ani suvipäivlaskmha lidnaspäi. Se om 68-kilometrižen üks'raižuižen sarakon lopstancijaks Ušinskii-stancijaspäi «Räzan' — Saransk»-keskustal, radab passažiroiden i jüguiden täht, znamasine socialižikš.

Tobmuz

Edel vn 2024 kezakud Kasimov oli lidnümbrikoks, sen üks'jäižeks eländpunktaks. Lidnümbrikon pind oli 31,6 km².

Edeline lidnümbrikon pämez' oli Galina Abramova (reduku 2017—).

Eläjad

Vl 1897 lidnan ristitišt oli 13 547 eläjad, vl 1939 — 22 198 eläjad. Vn 2010 Venäman rahvahanlugemižen mödhe lidnan eläjiden lugu oli 33 491 ristitud, vn 2021 — 28 443 ristitud. Kaik 30 696 eläjad oli lidnas vl 2017. Kaikiš suremb lidnan ristitišt oli 36..37 tuhad eläjid vll 1989−2001 (37 900 rist. vl 1992).

Rahvahad (2010): venälaižed — 97,0 %, totarlaižed — 1,0 %, toižed rahvahad — 2,0 %.

Ortodoksižen hristanuskondan ühesa pühäpertid oma kaičenus i saudud lidnas: Sündun Voznesenjan päjumalanpert', seičeme jumalanpertid i časoun'. Niiden ližaks Kazanin naižjumalankodi ei ole rados. Islaman pühäpert' udessündutase.

Professionaližen opendusen aluzkundad oma Kasimovan vezitransportan tehnikum i Kasimovan kivivoigazan kolledž, mugažo Räzanin pedagogižen kolledžan filial.

Galerei

• 
  Istorižed torguindrived (2014)
• 
  Sündun Voznesenjan päjumalanpert' (om saudud vll 1854−1862), vn 2010 nägu
• 
  Jogivagzal vl 2002
• 
  Kodirandantedištandmuzei, enzne Alänčikov-torgovanan erižpert' (2010)
• 
  Avtobusstancii vl 2013

Irdkosketused

• Kasimovan municipaližen ümbrikon Duman sait (kasimovduma.ru). (ven.)
• Enččen lidnümbrikon tobmuden sait (kasimovgorod.ryazan.gov.ru). (ven.)