Kamišin
Lidnanznam![]() |
Flag![]() |
Valdkund | Venäma |
Eläjiden lugu (2022) | 106,879 ristitud |
Pind | 81 km² |
Pämez' | Stanislav Zinčenko (reduku 2018—) |
Telefonkod | +7−84 457-xx-xxx |
Avtokod | 34, 134 |
Aigvö | UTC+3 (MSK+0) |
![](http://upload.wikimedia.org/wikipedia/commons/thumb/e/ef/ISS015-E-8738_-_View_of_Russia.jpg/250px-ISS015-E-8738_-_View_of_Russia.jpg)
Kamišin (ven.: Камы́шин) om Venäman lidn da lidnümbrik Volgogradan agjan pohjoižpäivnouzmas. Se om agjan koumanz' surtte lidn eläjiden lugun mödhe, mugažo Kamišinan rajonan administrativižeks keskuseks, ei mülü rajonha.
Istorii
[vajehta | vajehtada lähtetekst]Nügüd'aigaižen eländpunktan aluz om pandud vl 1668 kuti lidnuz. 18. voz'sadan augotišespäi sen nimi oli Dmitrijevsk, ph. Mitrein (Salonikilaižen) nimen mödhe. Vl 1780 se sai lidnan statusad nügüdläiženke nimenke. Om kaičenus äi torgovanoiden vanhid pertid.
Kamišinan ižandusen päsarakod oma valamiž-mehanine (gazkranad, montažinstrumentan zbrujad), stökoltaran i puvillkanghiden pästand, sömtegimišt (leibänkombinat, maidon edheotand, sömproduktoiden kombinat), mugažo valamiž-ferroühthesuladusiden tegim i omblendedheotand oma olmas.
Geografijan andmused
[vajehta | vajehtada lähtetekst]Lidn sijadase Volgaveren ülüdel, 50 m keskmäižel korktusel valdmeren pindan päl. Reljef om kukhikaz. Kamišin vedase Kamišink-jogensun randištol (ven.: Камышинка 10 km pitte), pidust' Volgogradan vezivaradimen (Volgan) oiktad randad 11 kilometras. Matkad Volgogradan röunhasai om 180 km suvipäivlaskmha, Saratovhasai — 194 km pohjoižhe. Nikolajevsk-lidn seižub Volgas päliči (vides kilometras), toine lähembaine lidn om Petrov Val 10 km päivlaskmha raudtel vai avtol.
Kamišin om lidnümbrikon üks'jäine eländpunkt, jagase läz 23 lidnanlaptaks.
Eläjad
[vajehta | vajehtada lähtetekst]Vn 2010 Venäman rahvahanlugemižen mödhe eläjiden lugu oli 119 565 ristitud. Kaikiš suremb ristitišt oli 127..129 tuhad vozil 1993−1998 i 2002−2003. Vl 2017 kaik 111 775 ristitud eliba lidnas.
Rahvahad (enamba 0,4% vl 2010, ozutadud rahvahudenke): venälaižed — 94,6%, ukrainalaižed — 1,4%, saksalaižed — 0,9%, armenijalaižed — 0,6%, totarlaižed — 0,5%, toižed rahvahad — 2,0%.
Ortodoksižen hristanuskondan nell' pühäpertid[1] oma avaitud lidnas: ph. Mikulai-čudonsädajan kafedraline päjumalanpert' (1825) i koume jumalanpertid. Islaman pühäpert' om olmas.
Profopendusen aluzkundad oma Kamišinan industrialiž-pedagogine[2], politehnine[3], biznesan i medicinan kolledžad, Kamišinan tehnologine institut (Volgogradan valdkundaližen tehnižen universitetan filial), Volgogradan čomamahtoiden institutan filial[4], üläopendusen toižiden aluzkundoiden palakundad.
Lidnan Duman ezimez' om Vladimir Ponomaröv vn 2014 uhokuspäi. Edel vn 2018 redukud Duman ezimez' oli lidnümbrikon pämehen, sid' Administracijan pämez' kändihe lidnümbrikon pämeheks. Stanislav Zinčenko radab lidnan Administracijan pämehen vn 2014 keväz'kuspäi.
Transport
[vajehta | vajehtada lähtetekst]Ühtennimine raudtestancii om lopstancijaks «Tambov — Petrov Val — Kamišin»-jonol vspäi 1894. Borodinan avtotesild ühtenzoitab Kamišinkan randoid (vanh lidn da uz' lidn).
Ehtatimed ujudas Volgas päliči jädumatomal pordol (järgeližešti 15. sulaku — 15. kül'mku), avtod il'mpölusel — tal'vel. Jogiport om lidnas.
Galerei
[vajehta | vajehtada lähtetekst]-
Sodakaumišt i muštnik ottud plenha mad'jaralaižile sodamehile (2010)
-
Kamišinan istorine muzei (2010)
-
Ph. Mikulai-čudonsädajan kafedraline päjumalanpert', vn 2016 nägu
-
Arbuzan festival' (2012)
-
Kamišinan LEK vl 2010
-
«Sberbank:an» palakund vl 2011
-
«Opava»-adivpert' vl 2010
-
Volgogradan valdkundaline čomamahtoiden i kul'turan institut — Kamišinan filial (2016)
-
Ujundbassein (2010)
Homaičendad
[vajehta | vajehtada lähtetekst]- ↑ Kamišinan pühäpertid sobory.ru-saital. (ven.)
- ↑ Kamišinan industrialiž-pedagogižen kolledžan sait (kamyshin-college.ru). (ven.)
- ↑ Kamišinan politehnižen kolledžan sait (kamtk.ru). (ven.)
- ↑ Volgogradan valdkundaline čomamahtoiden i kul'turan institut — Kamišinan filialan sait (artkamyshin.ru). (ven.)
Irdkosketused
[vajehta | vajehtada lähtetekst]![]() |
Kamišin Vikiaitas |
Volgogradan agjan lidnad | ||
Dubovk | Frolovo | Kalač Donal | Kamišin | Kotel'nikovo | Kotovo | Krasnoslobodsk | Leninsk | Mihailovk | Nikolajevsk | Novoanninskii | Pallasovk | Petrov Val | Serafimovič | Surovikino | Žirnovsk | Urüpinsk | Volgograd | Volžskii | ||