Hjuston

Hjuston (angl. i isp.: Houston, virktas: angl. [ˈhjuːstən], isp. ['xjus.ton]) om AÜV:oiden lidn-millioner Tehas-štatan suves, sen kaikiš suremb lidn da AÜV:oiden nellänz' lidn ristitišton lugun mödhe.

Hjuston
Houston

Lidnanznam	Flag
Valdkund	Amerikan Ühtenzoittud Valdkundad
Eläjiden lugu (2020)	2,301,572 ristitud
Pind	1,740 km²
Pämez'	Sil'vestr Törner (viluku 2016—, Sylvester Turner)
Telefonkod	+1−281, +1−346, +1−713, +1−832
Aigvö	tal'vel UTC−6, kezal UTC−5

Istorii

Vl 1836 Avgust da Džon Allen-vellesed edheotajad paniba lidnan alusen sädamha Tehasan pälidnad. Hjuston-žilo sai lidnan statusad vl 1837. Se om nimitadud Tehasan Tazovaldkundan ezmäižen valitud prezidentan oiktastuseks (Semüel Hjuston).

Vozil 1837−1839 Hjuston oli Tehasan Tazovaldkundan pordaigaližeks pälidnaks.

Geografijan andmused

Lidn sijadase tazangištol, 15..38 metrad korktusil, 32 m ü.m.t. keskmäižel korktusel, Buffalo Baju-jogen molembil randoil. Ühthine pind om 1740 nellikkilometrad, sidä kesken vezi otab 80,89 km². Äiluguižed ezilidnad sasoiš Meksikan lahthesai, kudambaspäi lidnan keskuz sijadase 50 kilometras.

Klimat om subtropine neps. Läm' suvipäivnouzmaine tullei puhub Meksikan lahtespäi vodes läbi, ka om kaikenaigaine upar'. Voden keskmäine lämuz om +21,8 C°, kezakun-sügüz'kun +27,3..+29,5 C°, tal'vkun-uhokun +12,8..+14,9 C°. Ekstremumad oma −13 C° (tal'vku) i +42 C° (sügüz'ku). Kezaaigan minimum om +10 C° (sügüz'ku), tal'vaigan maksimum om +31 C° (tal'vku, uhoku). Paneb sadegid 1413 mm vodes, kuidme läz tazomäras, enamba semendkus-kezakus i elokus-redukus (138..155 mm kus), vähemba uhokus-keväz'kus (72..83 mm kus). Keskmäine relätivine nepsuz vajehtase 73..77 % röunoiš voden aigan.

Hjuston om AÜV:oiden kaikiš suremb lidn administrativižeta jagandata, jagase 11 valičemižümbrikoks.

Eläjad

Vl 2010 lidnan ristitišt oli 2 099 451 eläjad, vl 2017 — 2 312 717 eläjad, se oli kaikiš suremb ristitišt. Lidnan aglomeracii om videnz' surtte AÜV:oiš ristitišton lugun mödhe (7,1 mln eläjid vl 2020, oli 6,5 mln vl 2014).

Ižanduz

Lidn om aeronaftikan tedoidusiden keskuz, mugažo biotehnologijoiden keskuz. Meriport om kaikiš järedamb AÜV:oiš rahahidenkeskeižiden jüguiden vedandan mödhe. Hjustonas tehtas mašiništod samha kivivoid. Om äi kivivoinümbriradajid tegimid, tehtas täs AÜV:oiden polimeriden kaht videndest.

Suren Hjustonan kogosüdäiprodukt om 449 bln US$ (vl 2012, nellänz' sija valdkundas).

Nened mail'man kompanijoiden päfaterad sijadasoiš lidnas: Phillips 66, ConocoPhillips, Sysco, Halliburton, Occidental Petroleum, Apache.

Transport

Avtobusad, kiruhavtobusad da kiruhtramvaid (angl.: METRORail) oma kundaližeks transportaks lidnan südäimes. Velosipedoiden kortoman sistem om šingotadud vspäi 2012.

Kaik kaks' täut avtoterengast oma Sures Hjustonas. Koumanz' rengaz om sauvomas i linneb 290 km pitte, sen kahesa keskustad üks'toštkümnespäi oma saudud i avaitud jo vodele 2018.

Rahvahidenkeskeine civiline Džordž Buš Interkontinental-lendimport (IAH / KIAH, 45,2 mln passaziroid vl 2019) sijadase 32 kilometras pohjoižhe lidnan keskusespäi. Se om kudenz' lendimport mail'mas lendahtandoiden da ištutandoiden lugun mödhe. Tehtas reisid AÜV:oidme, Meksikha, Amerikan, Evropan da Azijan äjihe maihe.

Irdkosketused

• Lidnan e-ohjastusen oficialine sait (houstontx.gov). (angl.) (isp.)