PASOK

Mellom 1977 og 2012 var PASOK og det rivaliserande partiet Nytt demokrati skiftevis i regjering som dei to største greske partia. PASOK deltok for første gong i valet i november 1974 og fekk her 13,6 prosent av røystene. I 1981 fekk PASOK si største oppslutning nokosinne med rundt 48 prosent av røystene og danna med dette den første sosialistiske regjeringa i Hellas sidan 1924.

Ved parlamentsvalet i juni 2012 fekk PASOK knappe 12,3 prosent av røystene og 33 av 300 medlemmer i parlamentet. Etter lengre forhandlingar blei PASOK med i ei koalisjonsregjering med Nytt demokrati og Demokratiske Venstre (DIMAR). DIMAR trakk seg seinare frå regjeringssamarbeidet.

PASOK heldt fram med å falla på meiningsmålingane, og ved parlamentsvalet i januar 2015 fekk partiet sitt dårlegaste resultat sidan skipinga med berre 4,68 prosent av røystene og 13 av 300 parlamentsmedlemmer.

Ved parlamentsvalet i juli 2019, deltok PASOK og DIMAR som ein del av partiet Rørsle for endring, KINAL. KINAL fekk her 8,1 prosent av røystene og 19 av 300 medlemmer i parlamentet.

I Europaparlamentsvalet i mai 2014 fekk PASOK rundt åtte prosent av røystene og to medlemmer i Europaparlamentet. Som KINAL var det eit knapt fall i røyster under Europaparlamentsvalet i mai 2019. Partiet endte på 7,7 prosent og heldt fram med to europaparlamentsmedlemmer.

PASOK er medlem av Sosialistinternasjonalen, som i dag blir leia av Georgios A. Papandreou, sonen til Andreas Papandreou. Medlemskapet er frå mars 2018 vidareført gjennom partiet KINAL.

• Hellas' samtidshistorie
• Det politiske system i Hellas
• Hellas