Агамемнон
Вызир
![](http://upload.wikimedia.org/wikipedia/commons/thumb/6/65/Detail_Taleides_Painter_Louvre_F340.jpg/220px-Detail_Taleides_Painter_Louvre_F340.jpg)
Агамемнон, дгр. Ἀγαμέμνων — в старогрецкой мифологии пановник Микен, найбогатшого в том часѣ города-штата на Пелопонезѣ. Еден из главных геройох Илиады Гомера.[1]
- Выкраджѣня Менелайовой жены
- Агамемнон мав младшого брата, Менелая. Обое мали за жены дѣвок спартанского краля Тиндарея, Агамемнон — Клитемнестру, а Менелай — Гелену Прекрасну. По тому, як Гелену Прекрасну выкрав троянскый кральович Парис, а Менелайови не удало ся мирно ся з ним догодити, Агамемнон зачав войну з Тройов.[2]
- Агамемнон во войнѣ з Тройов
- Быв то одважный и мудрый войвода, але хвальковатый и лачный. Раз на ловах, забивши олѣня, хвалив ся, же такому ловцю позавидѣла бы и Артемида. Богыня на то ся россердила и одняла грецкому флоту сопутный вѣтер, так же Греци не годны были плыти дале, покля Агамемнон не дав богыни в жертву свою дѣвку Ифигению. Часто не знать стримовати свою честолюбивость и тым шкодить сполочному дѣлу. Гонор и лачность Агамемнона приводить до того, же од свого найлѣпшого бойовника, Ахила, однимать його найкрасшу рабыню, зашто нагнѣваный Ахил не хоче дале брати участь в боях. Зоз тым конфликтом ся зачинать и розвивать сюжет Илиады. Хоть Греци мали и лѣпшых войвод, але велительом грецкого войска быв Агамемнон, як найбогач, котрый годен быв послати на Трою сто бойовых шиф. Сам Агамемнон по падѣ Трои добыв собѣ найвекшу корысть — дѣвку троянского краля Приама, Кассандру.[1]
![](http://upload.wikimedia.org/wikipedia/commons/thumb/c/c8/MaskOfAgamemnon.jpg/220px-MaskOfAgamemnon.jpg)
- Смерть Агамемнона
- Агамемнон вернув ся до Микен з Кассандров. Она мала дар вѣщбы и варовала, же там их чекать недобре, але Агамемнон не хотѣв тому вѣровати. Тым часом его законна жена Клитемнестра тварила ся, же рада навернутю мужа, але направдѣ мала на него сердце за то, же оддав их дѣвку Ифигению в жертву Артемидѣ. Гамѣшна, з любовником догодла ся, же забьють Агамемнона и Кассандру, а то ся им и повело. Забитя Агамемнона стало ся сюжетом великого числа литературных, музичных и вытварных кусох умѣня.[1][2]
Жерела и одказы
[едітовати | едітовати жрідло]- Козовик І. Я., Пономарів О. Д. (укл.): Словник античної міфології. — К.: Наукова думка, 1985. — 236 с. ISBN 5-12-001101-2 укр.
- Ярхо В. И.: Агамемнон // Токарев С.А. (гл. ред.): Мифы народов мира. Энциклопедия (электронное издание) — М.: Советская Энциклопедия, 2008. — 1147 с.русс.