Юрий Думнич

Юрий Андрѣйов Думнич (чеш. Jurij Dumnič, укр. Юрій Андрійович Думнич; *27. май 1924, Нягово, Подкарпатска Русь, Чехословакия – †21. децембер 2017, Ужгород, Украина) — дохтор, организатор медицины, сполоченскый активиста, публициста.

Юрий Думнич Юрій • Dumnič
Увидьте фото
Чинность	дохтор, организатор медицины, сполоченскый активиста, публициста
Горожанство	Україна
Уроджѣня	мая 27., 1924(1924-05-27)
Нягово, Подкарпатска Русь, Чехословакия
Упокоеня	децембра 21., 2017 (93 р.) Ужгород
Ошкола	УжДУ (1945–1952)
Ту можуть быти податкы з Wikidata, не контролованы авторами статѣ

Вонковы образкы

[1] 90-рочный Юрий Думнич з женов

Биография

Походив з родины простого селянина. Закончив горожанку в Тячовѣ (1939), учительску семинарию в Ужгородѣ (1944) и медицинску факулту УжДУ (1945–1952). То быв первый выпуск медикох в новоотвореной универзитѣ. Яко новак-абитуриент достав придѣл на роботу на юг Украины, де быв дохтором на вшиткы хвороты на зачатку в тайном лагру про политичных арештантох, а пак в сельском штатном маетку, а заслуживши добру оцѣну, быв повѣреный министерством на организацию санатория про хворых на туберкулозу на березѣ Чорного моря. Одслуживши повинный час, в децембрѣ 1953 достав пост дохтора-ординатора в Закарпатском областном тубдиспансерѣ. Од децембра 1956 став у чоло противотуберкулозной службы области и быв в той функции 22 рокы.

Систематично звышовав свою квалификацию, быв участником Киевского протитуберкулозного семинара (1956), Всесоюзного зъѣзда фтизиатрох в Москвѣ (1957), пройшов курз шпециализации з костково-клубовой туберкулозы в Киевском инштитутѣ туберкулозы (1958).

В року 1970 обгаив дизертацию и зыскав ступень кандидата медицинскых наук з проблем туберкулозы. В значной мѣрѣ якраз дохтору Думничу треба дяковати за побореня туберкулозы в Закарпатю. В роках 1960–1962 в Ужгородѣ за його планами и активной участи выбудовали новый тубдиспансер в микрорайонѣ Шахта, а його персоналны контакты и просьбы помогли достати в дар из Прагы первый в области флуорографичный автобус, з котрым ходили по области и денно выявляли 10–20 хворых. Наступно тубдиспансеры были створены во вшиткых районах области. Працовав и конзултовав хворых до 90-рочного вѣку. Персоналный вклад Юрия Думнича в медицину оцѣненый высокым званьом Заслуженый дохтор Украины.

Сполоченска чинность

Од року 1990 активный участник русинского руху, предсѣдатель «Общества Подкарпатскых Русинох» (1994–1997), од року 1996 главный редактор печатного органа того общества, нерегуларной новинкы «Подкарпатска Русь», участник каждого Свѣтового Конгреса Русинох. Од року 1995 член середоевропского «Гелсинкского Комитета» (Прага). Член областной управы «Общества Подкарпатскых Русинох», член оргкомитета «Сойма Подкарпатскых Русинох». Яко член «Дочасной влады Подкарпатской Руси» опубликовав серию материалох о катастрофичной екологичной ситуации в Подкарпатской Руси, о резултатах унитаристской политики влады Украины в краю. На тоты темы выступовав на научных конференциях в Празѣ, Брнѣ, Оломоуцу (Чешска република), Будапештѣ, Дебреценѣ, Нѣредьгазѣ (Мадярщина), Кошицях (Словакия), Коложварѣ (Румыния), Римѣ (Италия).

Жерела и одказы

• Евеліна Гурницька (30.05.2014). Його прізвище — ключ до всіх дверей. РІО, Закарпатська Народна Газета. http://rionews.com.ua/newspaper/socio/now/n1414917415. [перевірено 2024.05.28].  укр.
• Дана Данко (2023). Юрій Андрійович Думнич. Календар краєзнавчих пам'ятних дат Закарпаття на 2024 рік. Ужгород: Департамент культури Закарпатської ОДА. pp. 178–180. ISBN 978-617-8276-82-9.  укр.
• Иван Поп (2001). Энциклопедия Подкарпатской Руси. Ужгород: Издательство В.Падяка. pp. 167–168. ISBN 966-7838-23-4.  русс.
• Помер відомий закарпатець Юрій Думнич. PMG.ua. 21 ГРУДНЯ 2017. https://pmg.ua/life/66240-pomer-vidomiy-zakarpatets-yuriy-dumnych. [перевірено 2024.05.28].  укр.
• В Ужгороді пішов із життя лікар Юрій Думнич.... Uzhgorod.net.ua. 21 ГРУДНЯ 2017. https://uzhgorod.net.ua/news/119082. [перевірено 2024.05.28].  укр.