Потсдамска конференция
Потсдамска конференция — официална дипломатична встрѣча лидерох трьох найвекшых держав антигитлеровской коалиции в Другой свѣтовой войнѣ.
Час, участникы и тема конференции
едітоватиКонференция ся одбывала од 17. юла по 2. августа 1945 в замку Цецилиенхоф в Потсдамѣ (поблиз Берлина), а ей главныма участниками были Предсѣдатель Совѣта Народных Комисарьох СССР И. В. Сталин, Президент США Г. Трумен, Премьер-министер Великой Британии В. Черчил, которого 28. юла заступив новый Премьер-министер К. Еттли. Участниками конференции были тыж министры загранича, военны радникы и експерты.[1][2]
Конференция ся догваряла о повойновом урегулованю в Европѣ, але не складовала мирны договоры: тота задача была лишена на Раду министрох загранича.[1] До той Рады вошли министры загранича СССР, США, Великой Британии, Франции и Китая, а было на них покладене приготовлѣня мирного урегулованя з бывшыма союзниками Германии — Италиев, Румыниев, Болгариев, Мадярщинов и Финландиев, а по створѣню новой сполочной нѣмецкой влады — приготовлѣня мирного договора з Германиев.[2]
Рѣшѣня конференции
едітоватиНайскорше мав быти рѣшеный вопрос администрации пораженой Германии. Она была подѣлена на четыри окупачны зоны: совѣтску, британску, америцку и французску, кажда под войсковов администрациев. Про сполочны вопросы была створена Союзна Контролна Рада. Ей политика ся мала базовати на «пятьох Д», доеднаных скорше в Ялтѣ: демилитаризация, денацификация, демократизация, децентрализация, деиндустриализация.[1] Были догоджены репарации, дѣльба войскового маетку и заграничных активох Германии. Конференция постановила передати СССР Кенигсберг (од року 1946 Калининград) и прилеглу територию. По острой дискузии была догоджена западна границя Польщи, котра тыж достала часть Восточной Пруссии и вольный город Данциг (днесь Гданьск). Перемѣна границь была подкрѣплена рѣшѣньом о депортации нѣмецкого обывательства з Польщи, Чехословакии и Мадярщины.[2]
Атмосфера и вызнам конференции
едітоватиХоть в зачатку конференции чекали приятельску атмосферу и добру волю участникох, як то было на попередных встрѣчах еще в току войны, теперь, по конци войны в Европѣ, каждый остро стояв за властны интересы и Черчил быв найвеце застараный мотивами и неуступностьов Сталина.[1] З другого боку, Трумен, котрый при зачатку конференции достав новину, же в США успѣшно выпробовали атомову бомбу тискнув на Сталина з позиции силы, добиваючи ся уступок.[2]
Рѣшѣня конференции мали великый вызнам про наступне повойнове мирне урегулованя в Европѣ, выкорѣнѣня германского милитаризма и национал-социализма.[2]
Жерела и одказы
едітовати- БЕРЛИНСКАЯ (ПОТСДАМСКАЯ) КОНФЕРЕНЦИЯ 1945 // Большая российская энциклопедия. Том 3. Москва, 2005, стр. 381 Редакция: 2016. Одчитане: 02.08.2020[1]русс.
- Potsdam Conference. Encyclopædia Britannica. July 10, 2020. https://www.britannica.com/event/Potsdam-Conference. [перевірено 2020-08-02]. англ.
