Սիրելի հայրենակիցներ, ջերմորեն շնորհավորում եմ գալիք Ամանորի և Սուրբ Ծննդյան տոների առթիվ: Հատկապես կարևոր է, որ գալիք տարում շարունակենք զարգացնել հանրային ծառայությունների կարգավորման ոլորտը՝ ապահովելով բարձր որակ և արդյունավետություն։ Վստահ եմ, որ մեր միասնությունն ու համատեղ ջանքերը թույլ կտան իրականացնել Հանձնաժողովի կողմից սահմանված նպատակները։ Կրկին շնորհավորելով՝ մաղթում եմ քաջառողջություն, երջանկություն և բարեկեցություն Ձեր ընտանիքներին։ Թող 2025 թվականը դառնա վերելքների, խաղաղության և նորանոր ձեռքբերումների տարի:

Այսօրվա նիստում ՀՀ հանրային ծառայությունները կարգավորող հանձնաժողովը հաստատեց էլեկտրական էներգիայի սակագները: Սակագների վրա ազդեցություն ունեցող բոլոր դրական և բացասական գործոնների վերլուծության արդյունքում «Հայաստանի էլեկտրական ցանցեր» ՓԲԸ-ի կողմից սպառողներին վաճառվող էլեկտրական էներգիայի սակագների վերանայման անհրաժեշտություն չի առաջացել, և գործող սակագները սպառողների համար կմնան անփոփոխ։ Միաժամանակ տեղեկացնում ենք, որ հանձնաժողովի նախաձեռնությամբ սկսված էլեկտրաէներգետիկական համակարգի ընկերությունների սակագների վերանայման արդյունքում սահմանվեցին նաև 2025 թվականի փետրվարի 1-ից գործող էլեկտրաէներգետիկական համակարգի խոշոր արտադրող կայանների, ծառայություններ մատուցող ընկերությունների և շուկայի մրցակցային հատված դուրս չեկած բաժանորդների նոր սակագները։

Յուրաքանչյուր ամսվա վերջին ուրբաթ օրը՝ ՀԾԿՀ նախագահի մոտ քաղաքացիների ընդունելության օր է։ Սահմանված կարգի համաձայն ՀՀ հանրային ծառայությունները կարգավորող հանձնաժողովի նախագահ Մեսրոպ Մեսրոպյանն ընդունել է քաղաքացու։ Բարձրաձայնված հարցերը հիմնականում վերաբերել են էլեկտրաէներգետիկական համակարգի խնդիրներին, մասնավորապես էլեկտրամատակարարման վթարային ընդհատման վերականգնման ժամկետների խախտման դեպքում սպառողներին վճարվող տույժերին և այլ ոլորտային հարցերի։ Նախագահը ծանոթացել է քաղաքացու խնդիրներին, լսել նրա առաջարկները և տվել հանձնարարականներ համապատասխան ստորաբաժանումներին՝ հարցերին հնարավոր լուծումներ տալու վերաբերյալ։

«Գազպրոմ Արմենիա» փակ բաժնետիրական ընկերությունը ՀՀ հանրային ծառայությունները կարգավորող հանձնաժողովի համաձայնեցմանն էր ներկայացրել ընկերության 2025-2029 թվականների ներդրումային ծրագիրը՝ 144 027,51 մլն դրամ ծավալով՝ առանց ավելացված արժեքի հարկի: Ուսումնասիրությունների արդյունքում հանձնաժողովի կողմից ներդրումային ծրագրի ծավալը նվազեցվել է 981,84 մլն դրամով՝ կազմելով է 143 045,67 մլն դրամ: Սույն թվականի դեկտեմբերի 25-ի նիստում ՀՀ հանրային ծառայությունները կարգավորող հանձնաժողովը հաստատել է «Գազպրոմ Արմենիա» ընկերության 2025-2029 թվականների ներդրումային ծրագիրը, որի հիմնական ուղղություններն են՝ գազափոխադրման համակարգի Աբովյանի գազի ստորգետնյա պահեստարան-կայանի ընդլայնումը, գազափոխադրման համակարգի վերականգնումն ու վերակառուցումը,   նոր բաժանորդների միացումները, ինչպես նաև այլ ներդրումներ գազաբաշխման համակարգում։