William Shakespeare

William Shakespeare
	William Shakespeare
Informacion basico
Nacemento	0 di aprel 1564; Stratford-upon-Avon
Fayecimento	23 di aprel 1616 jul.; Stratford-upon-Avon
Entiero	25 di aprel 1616 jul.; Holy Trinity Church
Luga di descanso	Stratford-upon-Avon
Causa di morto	Balor desconoci, disease
Modo di morto	kousa natural
Residencia	Stratford-upon-Avon
Lenga materno	Early Modern English
Educacion
Alma mater	King Edward VI School, Stratford-upon-Avon
Informacion profesional
Ofishi	dramaturgo, poeta, stage actor, eskritor, aktor, dramaturgo
Disciplina	fiction, teatro, English drama, drama, poesia, Actua
Obra
Genero	play, poesia
Influencia pa	Plautus, Plutarch, Christopher Marlowe, Thomas Kyd, Ovid, Seneca
Lenga literario	Early Modern English, Ingles
Obra notabel	Hamlet, Romeo and Juliet, As You Like It, Macbeth, A Midsummer Night's Dream, Shakespeare's sonnets, The Taming of the Shrew, The Two Gentlemen of Verona, King John, Richard II, Henry IV, Part 1, Henry IV, Part 2, Henry V, Henry VI, Part 1, Henry VI, Part 2, Henry VI, Part 3, Richard III, Henry VIII, Love's Labour's Lost, The Merchant of Venice, Much Ado About Nothing, The Merry Wives of Windsor, Twelfth Night, All's Well That Ends Well, Measure for Measure, Titus Andronicus, Julius Caesar, Othello, King Lear, Antony and Cleopatra, Coriolanus, Timon of Athens, Troilus and Cressida, Cymbeline, The Winter's Tale, Pericles, Prince of Tyre, The Tempest, The Two Noble Kinsmen, The Comedy of Errors
Famia
Casa	Anne Hathaway
Tata	John Shakespeare
Mama	Mary Shakespeare
Yui	Susanna Hall, Hamnet Shakespeare, Judith Quiney
Ruman	Joan Shakespeare, Edmund Shakespeare, Gilbert Shakespeare, Richard Shakespeare, Anne Shakespeare, Margaret Shakespeare, Joan Shakespeare
Otro informacion
Presente den obra	Star Trek: The Original Series Core Game Book
	graf
	Imagennan riba Wikimedia Commons
	dbnl-profiel
	(en) IMDb-profiel
	[Edita Wikidata] · [Manual]

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

William Shakespeare (☆ ± 23 di april 1564 na Stratford-upon-Avon, Warwickshire; bautisa 26 di april 1564 - † 23 di april 1616), tabata un dramaturgo, actor y poeta Ingles.

Hopi hende ta considera Shakespeare como e autor mas grandi cu Inglatera a yega di conoce. No solamente pa su trabou literal, tambe pa e influencia grandi cu tawatin den e idioma Ingles. Ta credita Shakespeare pa a introduci casi 3000 palabra den e idioma aki.

Shakespeare a skirbi cerca di 38 tragedia, documento di historia y comedia. Tambe el a skirbi 154 soneto y un cantidad di poema largo. Generalmente, hende ta di acuerdo cu mayoria di su piesanan cu el a contribui el a crea den periodo di 1585-1610. Dos di su obranan teatral mas conoci mundialmente ta Romeo y Julieta y Hamlet.

Hubentud

Aunke no ta existi documentonan referiendo na e nacemento di William Shakespeare, documentonan di misa ta indica cu a batisa un William Shakespeare na e Holy Trinity Church na Stratford-upon-Avon riba dia 26 di april 1564. A base di esaki ta estima cu e lo a nace rond di 23 di april 1564. Shakespeare tabata e di tres yiu di John Shakespeare, un comerciante di cuero (of catuna) y Mary Arden. E tabatin dos ruman muhe mayor, Joan y Judith y tres ruman homber menor; Gilbert, Richard y Edmund. Prome cu nacemento di Shakespeare, John Shakespeare a bira un comerciante exitoso y a tene posicionnan manera gobernador y hefe.

Ta existi masha poco documentonan tocante e hubentud di Shakespeare y practicamente niun tocante su educacion. Historiadonan ta kere cu Shakespeare lo a studia na King's New School na Stratford. Como yiu di un oficial publico e lo a haya lesnan gratis,pero e dudanan tocante su educacion ta hiba na preguntanan relaciona cu su trabou como autor di su obranan y hasta si el a existi di berdad.

Bida matrimonial

Shakespeare a casa cu Anne Hathaway na Worcester, provincia di Canterbury, riba dia 20 di november 1582. E tabatin diesocho aña,mientras cu su casa tabatin 26. Hathaway tabata na estado na momemento di e casamento y a haya yiu seis luna despues. Nan prome yiu, Susanna, a nace riba dia 26 di mei 1583. Dos aña despues, dia 2 di februari 1585 Hamnet y Judith, morocho, a nace. Hamnet a muri pa motibonan desconoci cu su diesun aña.

'E añanan perdi'

Despues di e nacemento di e gemelonan ta sigui shete aña cu historiadonan ta referi como 'e añanan perdi', pa motibo cu durante e periodo aki no ta existi registronan tocante Shakespeare. Ta existi diferente teorianan tocante e motibonan pa e 'añanan perdi'. Un teoria ta sugeri cu e lo tabata scondiendo pa e caza di bestianan den e tereno di un doño local. Otro ta sugeri cu e lo tabata trahando como asistente pa maestronan na un scol na Lancashire. Otronan ta kere cu e lo a haya placa for di Henry Wriothesley, earl di Southampton, ya cu e teatronan na Londres tabata sera entre juni di 1592 te cu april di 1594 pa motibo di e plaga. Shakespeare a dedica e prome dos poemanan cu el a publica;Venus and Adonis (1593) y The Rape of Lucrece (1594) na Henry Wriothesley. Tambe ta specula cu e lo a yega na Londres den e añanan di 1580 y lo a haya trabou como cuidado di cabay na algun di e miho teatronan na Londres.

Actuacion

E siguiente biaha cu ta menciona Shakespeare den algun registro ta den un pamflet na Londres,skirbi pa Robert Green. Den un articulo for di e edicion di 20 di september,1592 Green ta skirbi tocante Shakespeare : "...There is an upstart Crow, beautified with our feathers, that with his Tiger's heart wrapped in a Player's hide, supposes he is as well able to bombast out a blank verse as the best of you: and being an absolute Johannes factotum, is in his own conceit the only Shake-scene in a country,". Den e articulo aki Green ta referi na Shakespeare como un actor nobato. Ta posibel cu e lo a produci algun obranan ademas di a actua y skirbi algun den e aña aki.

Na 1594 Shakespeare ta drenta Lord Chamberlain's Company of actors, e grupo mas popular cu tabata actua na e Corte. Na 1599 el a drenta un grupo di Lord Chamberlain's Men, cu lo forma un sindicato pa traha y opera un teatro nobo ;The Globe. E teatro aki a bira esun mas famoso den su tempo. Despues di e coronacion di rei James I e compania a cambia su nomber pa The King's men. Cu su parti di e entrada di e teatro nobo el a cumpra e di dos cas mas grandi na Stratford pa su famia, New Place (of New House). Actualmente ta considera e hecho aki como un señal cu e tabatin exito y su situacion financiero a mehora hopi lihe. Ya cu e distancia entre Stratford y Londres ta specula cu Shakespeare lo a pasa gran parti di su tempo ta skirbi y actua na Londres y solamente lo a bay cas un biaha pa aña durante e temporada di Lenten cu ta dura 40 dia (teatronan na Londres tabata sera pa e temporada aki). E cultura di teatro no tabata considera como algo pa hende di rango halto na Inglatera di siglo 16. Sinembargo, hopi den noblesa tabata sponsor e artenan dramatico y tabatin amistad cu actornan. Na comienso di su carera Shakespeare mes a logra atrae e atencion di Henry Wriothesley, earl di Southampton.

Shakespeare su contemporaneonan tabata reconoce su logronan, Francis Meres a describi'e den 1598 como e escritor di comedia y tragedia mas grandi di Inglatera. E grupo "Lord Chamberlain's Men" (Despues King's Men) a yega na bira e compania dramatico lider na Londres, instala den e palacio real na 1603.

Trabou como dramaturgo y poeta

Shakespeare tabata hopi productivo,cu registronan di su obranan desde 1594. Desde e tempo aki el a produci mas o menos dos pa aña te 1611.

Su prome obranan teatral tabata mas tanto comedianan y obranan historico manera Henry VI,Titus Andronicus,The Merchant of Venice,Richard II y A Midsummer Night's Dream.E tragedia Romeo and Juliet tambe el a publica den e temporada di 1594-1611. Pa e ultimo añanan di e reinado di Elizabeth I Shakespeare tabata conoci caba como un poeta y dramaturgo famoso y nan a yam'e varios biaha pa actua dilanti corte di reina. Den 1602, su exito continuo a permiti Shakespeare bay Silver Street, un mercado di nivel mas halto. E tabata bibando akinan tempo cu el a skirbi algun di su tragedianan mas conoci, entre otro Hamlet, King Lear y Macbeth.

Shakespeare a skirbi mas di trinta obra. Normalmente ta dividi esakinan den cuater categoria: historia, comedia,tragedia y romance. Despues di a skirbi e tragedia Romeo and Juliet el sigui uza e categoria aki pa e siguiente añanan, den cua el a produci e obranan pa cua e ta mas conoci actualmente. Esakinan ta: Julius Caesar, Hamlet, Othello, King Lear, Macbeth, y Antony and Cleopatra. Den su ultimo añanan el a haci mas uzo di romance cu e obranan Cymbeline, A Winter’s Tale, y The Tempest.

Solamente a publica diesocho di Shakespeare su obranan teatral separa durante su bida. Un coleccion completo no a aparace te 1623, cu e publicacion di The First Folio, algun añanan despues di su morto.

Estilo

William Shakespeare a skirbi su prome obranan den e manera convensional pa su epoca, cu metafornan elabora y frasenan retorico cu no semper ta cuadra cu e storia ni e personahenan. Sinembargo, Shakespeare tabata hopi inovativo, adaptando estilo tradicional pa su propositonan y creando un fluho di palabranan mas liber.

Poesia

Evidencia ta sugeri cu Shakespeare y otronan den su ramo di teatro tabata wak poesia como un fuente di fama mas duradero cu dramaturgia. Shakespeare a compone su sonetonan entre 1593 cu 1601 aunke el a publica nan na 1609. E edicion ey, titula The Sonnets of Shakespeare ta consisti di 154 soneto, tur skirbi den e estilo di tres cuartet y un couplet cu actualmente ta reconoci como Shakesperiano. E sometonan ta cay den dos grupo :Soneto 1-126 ta dedica na un amigo stima, un yoncuman di noblesa ; soneto 127-152 na un asina yama "Dark Lady" maligno pero fasinante.

Casi tur su sonetonan ta examina e decadensia di tempo y e inmortalisacion di beyesa y amor den poesia. Den su poemanan y obranan teatral Shakespeare a inventa milnan di palabranan, hopi biaha combinando of bruhando rais Latin,Frances y su Ingles nativo.

Ultimo añanan

Algun tempo despues di 1612 el a retira di e esenario y el a bay Stratford bek. Shakespeare a pasa su ultimo añanan na su cas na Stratford. Historiadonan ta di acuerdo cu el a muri riba di 23 di april 1616 cu cincuentidos aña y nan a der'e na e Holy Trinity Church na Stratford. Den e testament cu el a laga traha den januari di 1616 el a laga su propiedad na e herederonan masculino di su yiu muhe mayor, Susanna. Tambe el a nombra su casa como su 'second-best bed',esta di dos miho cama. Te dia di awe no tin siguridad di kico e gesto aki kiermen, ya cu e pareha tabata mas tanto separa durante nan 20 aña di matrimonio.

Fuente

Articulo di BBC tocante e bida di W.S. http://www.bbc.co.uk/history/people/william_shakespeare
Biografia di Shakespeare :https://web.archive.org/web/20161104153056/http://www.biography.com/people/william-shakespeare-9480323
Articulo tocante e poeta : http://www.poets.org/poetsorg/poet/william-shakespeare