Tupac Shakur
Tupac Amaru Shakur (16 de junh de 1971, Nòva York - 13 de setembre de 1996, Las Vegas), nascut sota lo nom de Lesane Parish Crooks, es un rapaire e un actor estatsunidenc deis ans 1990. Amb 75 milions d'albums venduts dins lo mond, es considerat coma una figura majora dau rap internacionau. Sei problemas judiciaris, sa rivalitat sovent violenta amb d'autrei grops de rap estatsunidencs e son assassinat li an tanben donat un imatge misteriós e melancolic qu'a renforçat son estatut d'idòla de la cultura populara modèrna. Seis òbras principalas son leis albums Strictly 4 My N.I.G.G.A.Z... e Me Against the World.
Biografia
[modificar | Modificar lo còdi]![](http://upload.wikimedia.org/wikipedia/commons/thumb/d/d2/Tupac_Shakur_1988_Yearbook.jpg/220px-Tupac_Shakur_1988_Yearbook.jpg)
Fiu d'Afeni Shakur (1947-2016[1]), una sòci dau Black Panther Party de Nòva York, Tupac Shakur passèt son enfança e sa jovença dins un mitan marcat per lei violéncias liadas a la lucha dei Black Panthers. Sa familha foguèt ansin frequentament menaçada per la polícia ò enseguida per la justícia. Lèu, Tupac Shakur mostrèt rapidament un certan talent literari. En 1986, après un desmainatjament a Baltimore, integrèt ansin la Baltimore School for the Arts ont estudièt lo teatre, la poesia, lo jazz e lo balet. En parallèl, s'interessèt au rap e s'impausèt lèu coma un rapaire reconegut au nivèu locau[2]. En 1988, la familha se desplacèt en Califòrnia.
Sa carriera professionala comencèt en 1991 amb son premier album, 2Pacalypse Now, que li permetèt de venir una figura dau rap de la Còsta Oèst deis Estats Units. Fins a sa mòrt, sortiguèt quatre autreis albums que foguèron de succès importants : Strictly 4 My N.I.G.G.A.Z. (1993), Me Against the World (1995), All Eyez on Me (1996) e The Don Killuminati: The 7 Day Theory (1996). La màger part de sei cançons parlan de son enfança passada dins la violéncia e la misèria dei guètos, dau racisme, dei problemas de societats e dei conflictes amb d'autrei rapaires. Militèt tanben en favor de l'egalitat raciala. Joguèt tanben dins un desenau de films que foguèron generalament de succès critics e, dins una mendra mesura, comerciaus[3].
Pasmens, la carriera de Tupac Shakur foguèt tanben marcat per sei problemas judiciaris. D'efiech, foguèt accusat dins plusors afaires sexuaus e condamnat en 1995 a un an de preson per tocaments sexuaus. Pasmens, lo pus grèu èra la multiplicacion deis atacas, compres de temptativas de murtre, entre rapaires dei còstas èst e oèst (rivalitat East Coast/West Coast). Tupac Shakur entreteniá de relacions fòrça ostilas amb plusors rapaires majors dau periòde, especialament amb The Notorious B.I.G. (1972-1997), una autra figura majora dau rap estatsunidenc deis ans 1990. Foguèt ansin assassinat lo 13 de setembre de 1996 a Las Vegas. Leis autors dau murtre son desconeguts e l'afaire foguèt definitivament classat en 2021 per la polícia.
Liames intèrnes
[modificar | Modificar lo còdi]Bibliografia
[modificar | Modificar lo còdi]- (en) Darrin Keith Bastfield, Back in the day : my life and times with Tupac Shakur, Nòva York, Ballantine Books, 2002.