Blocus
![](http://upload.wikimedia.org/wikipedia/commons/thumb/f/f9/Blockade_of_Toulon%2C_1810-1814.jpg/220px-Blockade_of_Toulon%2C_1810-1814.jpg)
Un blocus ò blocatge es una operacion militara que son objectiu es d'empachar l'avitalhament ò lei comunicacions d'una zòna (vila, region, estat) per fòrça. Es generalament un acte de guèrra menada còntra de linhas maritimas mai pòu tanben èstre organizat d'un biais pacific (per exemple, dins l'encastre de sancions diplomaticas sensa declaracion de guèrra) ò còntra de linhas terrèstras.
Es sovent una operacion malaisada d'organizar car un blocus eficaç despend d'unei factors. De'n premier, necessita una superiotat militara pron sufisenta per mantenir en plaça lo blocatge e empachar una sortida advèrsa ò lo passatge d'elements exteriors. Per exemple, dins lo corrent de la crisi dei missiles de Cuba, leis Estats Units mobilizèron sièis pòrta-avions còntra la flòta fòrça limitada de Cuba. Puei, l'objectiu dau blocus dèu aver una importància sufisenta per gardar mobilibilizadas lei fòrças importantas necessàrias a l'establiment dau blocus. Per exemple, la defensa dau territòri nacionau permetèt ais Aliats de mantenir un blocus de 1914 a 1918 còntra leis Empèris centraus durant la Premiera Guèrra Mondiala. Enfin, un blocus necessita una volontat pron fòrta per lo mantenir. Per exemple, en 1962, la volontat estatsunidenca de mantenir en plaça lo blocus de Cuba maugrat lo risc de guèrra nucleara entraïnèt finalament lo retirament dei missiles sovietic de l'illa.