Reggae
![](http://upload.wikimedia.org/wikipedia/commons/thumb/3/3a/Bob-Marley-in-Concert_Zurich_05-30-80.jpg/300px-Bob-Marley-in-Concert_Zurich_05-30-80.jpg)
Reggae is en Musik, de ut Jamaika kummt. Vormols is up dat Eiland de US-amerikaansche Musik bannig populär ween. Later hefft Muskanten dor utprobeert, Experimente mit en egen Aart vun Musik to maken. So is Ska maakt wurrn, later denn Rocksteady un vun 1968 af an Reggae. De kulturelle un religiöse Twieg vun de Rastafaris hangt sunnerlich eng tosamen mit de Reggae-Musik.
Reggae-Aarten
[ännern | Bornkood ännern]De eerste echt „jamaikaansche“ Musik is de Ska. Sunnerlich bekannte Ska-Musikers sund de Skatalites ween. As de Ska-Musik wat suutjer speelt wurrn is, hett een vun Rocksteady snackt. Ska un ok Rocksteady staht faken up de Grundlaag vun Soul un Rhythm and Blues-Nummern, de man up en annern Rhythmus speelt weert („Ondedrop“ un „Skank“).
Dat gifft verscheden Aarden vun Reggae. De wichtigste Unnerscheed warrt maakt twuschen Rootsreggae un dat, wat een Kommerziellen Regaae nömmt. Unner Rootsreggae versteiht een de Musik, de vun de 1970er Johre af an maakt wurrn is un de veel to doon hett mit de Rastafari-Anhängers. Bekannte Rootsreggae-Musikers sund Bob Marley, Black Uhuru, Peter Tosh, Burning Spear, Eek-A-Mouse, Bunny Livingston, King Kong un Freddy McGregor. Roots warrt ok faken vun Gruppen sungen. Dat heet denn Vocal harmony. Bekannte Bispeele sund de Abyssinians, Israel Vibration un Culture.
En sunnerliken Twieg vun den Reggae is de Dub. Dor geiht dat um Remixes vun Nummern bi, wo meist blot noch Drums un Bass up to hören sund. Dub-Verschonen weert bruukt as Achtergrundmusik, wenn Diskjockeys togange sund un ok bi Toasters, wat de jamaikaansche Vorloper vun Rap-Musik is. Lee Perry, King Tubby, Prince Jammy, Scientist, un de Mad Professor hefft düsse Musik groot maakt.
Kommerzielle oder moderne Reggae is vun de 1980er Johre mit de Upkumst vun Raggamuffin un Regga jummers mehr wurrn. Later is dat denn to'n Dancehall wurrn.
Instrumente
[ännern | Bornkood ännern]De wichtigsten Instrumente bi den Reggae sund de Bass un de Drums. Tohopen sund se de Grundlaag for dat Leed, de so nömmte Riddim. For den sunnerlichen Raggae-Drumrhythmus is egen, dat de Bass-Drumslag up den tweeten un veerten Slag, un nich, as anners, up den eersten un drudden Slag liggt. De Kick vun den Drummer kummt up den drudden Slag. De warrt den faken noch füllt mit synoptische Patronen up de Snaredrum. De Bass speelt in den Reggae en grottere Rull, as in de meisten annern Musiktwiege, sunnerlich in de deepen Frequenzen.
Faken gifft dat en Leadgitaristen, de mit Bass un Drums mitspelen deit. De Slag-Gitarist speelt de Akkorde in den sunnerlichen Reggaeslag, up de achtste Noot na jedeen Slag.
Weblenken
[ännern | Bornkood ännern]![Wiktionary](http://upload.wikimedia.org/wikipedia/commons/thumb/c/c3/Wiktfavicon_en.svg/16px-Wiktfavicon_en.svg.png)
- Ken Boothe: It is not a documentary – it is a movie! Rocksteady: The Roots of Reggae.
- dancehallmusic.de/riddimbase – Diskografie
- Roots-Archives.com Diskografie